Mbrơi mbrơi jŭt ăp dak măt bah kon ta nsưng ji, uănh măt kon mbâl ntŭk sôt, mpang ty ma sôt bơi lĕ n’hanh an dôh nglău ty me n’hanh nglău tal 2, nuih n’hâm yuh Trần Thị Thu Hằng ta xă Tam Giang, nkuăl Krông Năng, n’gor Dak Lak kơt luh mham. Dơi ăp nai dak si Khoa chấn thường chính hình, Ngih dak si Đa khoa nkual Tây Nguyên săm ndal, ntŭk sôt lĕ dơi oi, yơn nău rmanh tă bah pháo rtoh bah kon, hôm n’glơi an tâm nuih n’hâm nuĭh me dŭt hô.

Rnôk rtoh nuĭh ƀon lan bu săm hăn ngih dak si, điện an mê̆, rnôk nĕ mê̆ khĭt yơ̆ dâl. Nai dak si lah mpang ty bah mon an koh 2 nglău ty rnôk nĕ mê̆ kơt tăch proch, tăch klơm, mê̆ mô gĭt m’hâm ƀư gay ma ntrok an kon.

Yuh Nông Thị Tiên, mê̆ bah mon Trần Nhật Phong, ta xă Dak Rla, nkuăl Dak Mil, n’gor Dak Nông, mhe rlet rlău du nău ndrăt tâm ban đŏng. Phong n’hanh băl  ê nkra pháo rtoh, jêh nĕ djôt sĭt put. Yor dak si pháo geh mpêh, mon lĕ an tâm n’glah n’hanh pơk ŭnh gay ƀư kro dak si, jêng tât rmanh rtoh têh.

Oh gĭt đŏng nău klach bah pháo, sĭt oh nkri klach kon dŭt âk yơn kon mô djăt. Nar kon geh, uănh saơ măt kon lah drăt, mô dơi ntôn kon geh mbăn kơt nĕ.

Sôt ta ty n’hanh măt bah ăp oh dơi bah tĭng nar, yơn nău rngot nuih n’hâm jêr dơi roh. Đah kon se, rmanh pháo rtoh mô knŭng lah ăp ntŭk dô, ma hôm n’glơi an ăp khuch đah nău mĭn, khuch tât nău hun hao n’hanh gĭt đah ntŭk kiău ma. Mon Hoàng tâm ăp nar săm ta ngih dak si, lĕ gĭt wât nău klach bah pháo.

Kon uănh ta Tiktok n’hanh nchăm ăp chất sĭt jêh nĕ tâm pot. Kon nkhŭt rơh tal 3 ri ndrăt ndal rtoh. Nai dak si mhing n’hanh chuh dŭt ji, kon dŭt wơl bâh đah nău pâl pháo.

Hôm aơ lah nău mĭn bah mon Phong rnôk dôl ât rdâng nău ji tă bah pháo rtoh ƀư.

Aƀaơ ty ji ol n’hanh mô, âk dak luh, măt ri ji đŏng. Oh wơl bâh yor oh mô gĭt nău klach bah pháo rtoh.

Nai dak si Nguyễn Minh Trực, Kruanh Khoa Chấn thương Chính hình Ngih dak si Đa khoa nkual Tây Nguyên, nkoch, ăp nău rmanh pháo rtoh way geh lăp rơh rlu nti n’hanh Tết, n’hanh rnoh kon se sôt rmanh dŭt âk. Ăp năm, khoa wơt dơn nklăp 20 nuĭh ji geh sôt săk tă bah pâl pháo. Ăp ntŭk sôt yor pháo ƀư dŭt mbăn, bah dô mbăn, tăch ty tât cheh măt. Ăp nuĭh dô hóa chât bah pháo ê nkra êng lơ klach lơn, yor pơng ƀư sôt săk hô tât ăp ntŭk khung klơm, an rek jŏ gay săm.

Pháo rtoh yor kơt ntŭk sôt hóa khí dŭt mbăn. Geh ăp nuĭh an dôh jăng ăp nglău ty ri mpang ty mô hôm nâm ơm kơt bôk năp, n’glơi an koet nte lôch săk an ăp mon. Đah rnăk wâl, an uănh tât ăp mon, yor ăp ntŭk sôt kơt nĕ n’glơi an khuch dŭt mbăn.

Rmanh pháo rtoh mô knŭng lah nău bah du rnăk wâl mô lah nău êng ta n’gor Dak Lak ma bah lĕ kon nuĭh. Nău bah ăp nuĭh rmanh, ăp nuĭh an mbak anh ăp ntŭk sôt ji, lah nău mbơh njrăng hô đah nău an wât kloh n’hanh geh ăp trong njrăng dêr; ăp nuĭh n’hao êng lĕ đah nău mât njrăng săk nơm n’hanh nuĭh bên bah ăp nău rmanh yô̆ nđach.

Yuh Tiên mô dơi mpôn nău rngot uănh saơ kon geh sôt mbah pâl pháo