A Riêu Âr Pục mô dơn êng lah du nău way ơm bah nuĭh Pa Cô. Aơ hôm lah ntŭk nkra an tâm ban di ma nău nsing nơm bah ăp bu ranh ƀon, ma ăp nău tâm nkol hŏ lăp jru tâm nău rêh nsum mpôl lam ƀon lan. Lor rnôk pháp luật Ngih dak ntoh ta nkual yôk prêh, ăp nău way ơm nê hŏ rgop mât ndray rĭng grep, nkra tâm rkeh n’hanh krêp dêh đah kon nuĭh tâm ƀon lan. Tĭng nău way bah nuĭh Pa Cô, ăp nô nău geh tât tâm rkeh ntoch jong đah ăp rnăk lah mô dơi nkra mbra n’gluh bah năp mpôl bu ranh ƀon. Rnôk nê, lễ hội A Riêu Âr Pục dơi ƀư kơt du rơh nkra nău tâm rkeh têh bah ƀon lan. Bu ranh ƀon Lê Tuấn Mõ, thôn Kê Ré, xã A Lưới 3 an gĭt, nău way dơi ƀư gay nkra ăp nău tâm rkeh geh tât nău rêh nsum mpôl ƀon lan.

“Lễ hội Âr Pục rơh dja lah nkra ăp nkô̆ nău tâm rkeh geh tât nău rêh bah kônh wa, lơn lah nkra mô dơn tâm nău kuăt ndrôi ma hôm nkra ăp ntil nău tâm pit neh ntu, tâm pit nhih jay đŏng…. Ăp nău tâm rkeh mô dơi nkra êng tâm rnăk wâl ri dơi jă bu ranh tâm ƀon n’hanh jă lĕ rngôch ăp bu ranh ƀon êng gay tâm nchră n’hanh tâm ban ŭch trong nkra ăp ntil nău tâm rkeh đŏng”.

Nău ƀư jêng rup uĕh êng bah A Riêu Âr Pục lah nău an geh tâm ban tâm rnôk nkra nău tâm rkeh. Mô dơn geh bu ranh ƀon bah ăp ding geh tât, âk bu ranh ƀon geh nsing nơm ta ăp ƀon êng ƀa ƀă dơi râng đŏng. Du hê nuĭh geh nsing nơm, mô geh tât nô nău tâm rkeh mbra dơi sơch nuĭh dâk ƀư ndranh, đăp mpăn geh nău tâm ban an lĕ rngôch ăp ding.

Lễ hội ƀư âk nău way êt lhăt. Ntơm bah nău nchrăp ndơ, jă mpôl bu ranh ƀon tât ăp gâl tâm ơh, rblang gĭt n’hanh tâm rlăch ndăng. Ăp nuĭh râng dơi nkoch nău mĭn bah he ma ăp nău di ngăn, ma ăp nău mprĭng mprơ way bên. Lôch djăt lĕ nău rgop, mpôl bu ranh ƀon mbra ndrel n’gluh nău tih di n’glĕ dŭt.

Nău dŭt khlay bah A Riêu Âr Pục mô gay ma rmal ma rƀŏng tât nkra bah tâm rkeh. Tâm nău rblang, nău njrăng đă bah ăp bu ranh way geh nkô̆ hôr uănh khlay nuih n’hâm mô klăp ndăng, nău yô̆ n’hanh nău dơn kan đah nsum mpôl ƀon lan. yor nău khlay lơn, ma nuĭh Pa Cô mpŏng lah mât nău tâm rnglăp tâm ƀon lan.

Lôch ăp ding tâm ban ŭch đah nău nkra n’glĕ dŭt, nău way tâm ton dơi tĭng ƀư. Rnôk mô hŏ geh chữ nchih, nuĭh Pa Cô dŏng dĭng lŏng nkar jê̆ gay ƀư ndơ tâm ton bah he. ăp dĭng lŏng nê jêng ndơ ntĭt bah nău sơm, nău dơn kan n’hanh nău nsing nơm bah năp ƀon lan.

Aƀaơ, ndrel đah nău nsrôih mât ndray văn hóa way ơm, lễ hội A Riêu Âr Pục hŏ rdâk tay n’hanh nkoch mbơh lam hvi. Wa Hồ Thị Tư an gĭt, nău rdâk tay lễ hội mô dơn gay mât ndray săk tơm văn hóa bah rnoi nuĭh Pa Cô ma hôm rgop kơl năch  n’hanh rơh mom ndăm wât kloh mpeh ăp rnoh khlay rŏng nuĭh, nuih n’hâm tâm ban n’hanh nuih n’hâm nsum mpôl dơi mât ndray âk rơh kơn.

“Nău mpơl tay lễ hội Âr Pục bah rnoi Pa Cô gay nkoch mbơh ăp rsang rnglay văn hóa rnoi mpôl đê̆ tâm ban kơt pháp luật kăl e an ăp năch n’hanh bah ngai tâm ban kơt ăp băl mom ta ntŭk dơi gĭt đŏng. Ri lôch rnôk saơ dơi lễ hội dja khân păng mbra nklân năl dơi, wât dơi rnoh khlay rŏng nuĭh bah lễ hội dja”.

Bol nău rêh nar aơ hŏ rgâl âk, yơn ăp rnoh khlay glo tơm bah A Riêu Âr Pục hôm dơi nuĭh Pa Cô mât ndray đŏng. Nê mô dơn lah nău nkoch mpeh nău way ơm mô lah rơh nkra nău tâm rkeh bah ƀon lan, ma hôm lah ndơ an saơ n’grêh rêh nuih n’hâm uănh khlay nău way tâm di, nău tâm rnglăp n’hanh nuih n’hâm rŏng nuĭh hŏ dơi bun dăp ma âk rơh kơn nklang dor yôk Trường Sơn.