Janh tŭr ăp nău chĭng bah năp năch pâl nđaih, jêh nĕ quay phim, chŭp rup ăp nău ƀư văn hóa n’hanh n’hanh nkoch ta ăp mạng xã hội, Y Justin Adrơng, ta ƀon Krơng Prong A, xă Ea Tu, nkual ƀon têh Buôn Ma Thuột, dŭt rhơn. Nô Y Justin an gĭt:

Gâp dơi nti tŭr chĭng, nkre lah trong chŭp rup, quay gay mpla nsơ chĭng gông, dŭt uĕh an êng n’hanh an lĕ rngôch ƀon lan ăp rnoi nuĭh ta Tây Nguyên geh tâm ntŭk ntô văn hóa chĭng gông aơ. Geh ăp rup mô lah nău blău, trong gay quay phim, chŭp rup dơi sŏk rup nĕ, video nĕ gay mpôl hên mât rƀăy n’hanh nkoch tât ăp nuĭh.

Dŏng rup gui gay nkoch nkô̆ nău văn hóa bah rnoi nuĭh, hôm kuăl lah Photo Voice, lah ngoăy tâm âk nău blău dơi Cục Di sản Văn hóa, mpeh tâm N’gâng kan Văn hóa, Thể thao n’hanh pâl nđaih mbơh ƀư ta Dak Lak bah dŭt năm 2024 mbơh an trong ƀư boăt nthoi drăp ndơ ơm yău “Ntŭk ntô văn hóa chĭng gông Tây Nguyên tâm trong hăn pâl nđaih drăp ndơ ơm yău Buôn Ma Thuột-Dak Lak”. Tâm ban ma nĕ, nuĭh nti hôm dơi gĭt tât ăp nău blău tŭr chĭng bah bôk năp tât n’hao prêh, nkra ăp nău tih way mâp tâm nău tŭr chĭng, mĭn joi tay du đêt nău chĭng yău bah nuĭh Êđê... Wa Y Bây Kbuôr, ta ƀon Kmrơng Prong A, xă Ea Tu, nkual ƀon têh Buôn Ma Thuột an gĭt:

Bah năp đaơ ri ăp nău chĭng bah nuĭh Êđê ri mô dơi geh nti nău uĕh kơt rơh aơ. Jêh ăp jrô tiăr nti ri săk gâp dơi saơ rơh druh ndăm geh nău wât âk lơn mpeh nău khlay bah chĭng gông bah nuĭh Tây Nguyên, nău gĭt n’hanh nti ăp nău chĭng bah u che he glơi an.

Ntrong ƀư boăt nthoi drăp ndơ ơm yău ntŭk ntô văn hóa chĭng gông tâm trong hăn pâl nđaih lah nău ƀư tâm trôm Nău nchrăp ƀư 6, mpeh tâm bôk nău kan rƀŏng tĭng lam dak hun hao wăng sa, rêh jêng nkual rnoi mpôl đêt n’hanh nkual yôk, lvang 2021-2030. Ta Dak Lak, ntrong ƀư tĭng ta ăp ƀon tâm xă Ea Tu, ñkual ƀon têh Buôn Ma Thuột.

Knŭng jêh 1 khay mbơh ƀư, lĕ geh 60 video, rlău 100 rup gui yor nuĭh ƀon lan ƀư êng, lah ăp nău nkoch dơi nkoch đah rup du trong geh êng, dăch dêh. Wa Lại Đức Đại, Groi Giám đốc N’gâng kan Văn hóa, Thể thao n’hanh pâl nđaih n’gor Dak Lak an lah, ntrong ƀư mhe lĕ mât uĕh săk rnglăy đah ăp nău mât ndrăy n’hanh mât nău khlay drăp ndơ Ntŭk ntô văn hóa chĭng gông Tây Nguyên, rƀŏng tât jêng ndơ an pâl nđaih ntŭk gŭ rêh.

Nthoi tay lôch uĕh bah ntrong ƀư rơh aơ, ndrel đah nău uănh bah Ntŭk kan Drăp ndơ ơm yău, bah N’gâng kan Văn hóa, Thể thao n’hanh Pâl nđaih, tâm năm 2025, n’gâng kan n’gor mbra ntĭm rđău ăp jrô kan way kan, ăp ntŭk dăn ƀư tĭng tay ăp ntrong ƀư ta ăp ntŭk êng lam n’gor Dak Lak. Mbra geh nău rgop rjăp lơn, mbơh ƀư âk ntrong kan ndrel du tơ̆, ăp jrô dơi lah nthoi ndrel đah nău râng bah ăp nuĭh way kan, ăp nghệ nhân.

Ndrel đah Dak Lak, ăp jrô nti dơi ƀư ta ăp n’gor Gia Lai, Kon Tum n’hanh Tây Ninh, an nuĭh ƀon lan ăp nuĭh rnoi mpôl đêt. Nău ntĭm yor ăp nghệ nhân geh nău blău n’hanh nsing nơm tâm ntŭk gŭ rêh ƀư, ntĭm uĕh, geh kỹ thuật, nghệ thuật tŭr. Tĭng Tiến sĩ Nguyên Thị Thu Trang, Kruanh jrô kan Mât uănh drăp ndơ văn hóa mô mpơl săk, Ntŭk kan Drăp ndơ ơm yău Văn hóa, rnôk dơi năp nău blău, nuĭh ƀon lan mbra geh tay nău blău ơm tâm nău joi drăp ndơ ơm yău gay joi nău rêh, hun hao nsum mpôl, mât ndrăy nău uĕh.

Nău boăt nthoi ăp nsum mpôl geh ndrel drăp ndơ văn hóa mô mpơl săk tâm ban, nău boăt nthoi đah ăp rơh gŭ ndrel du ntŭk gŭ rêh n’hanh mpôl hên ntĭm an nsum mpôl trong ƀư Photo Voice lah ntŭk gŭ rêh mbơh êng nău ngơi bah nuĭh, nkoch êng ăp nău nkoch văn hóa bah nơm. Rlău ma nĕ, yor ƀon lan nuĭh rnoi nuĭh Êđê mbra dơi nkoch ăp nău nkoch mpeh bah khân pơng uĕh ngăn, ŭch ngăn, di ngăn, ngăn ngên, rêh uĕh ngăn, kơt nkoch êng nău uĕh bah nuĭh nơm, ŭch ndơ êng, nău uĕh bah nsum mpôl nơm.

Mô knŭng n’hao nău wât mpeh mât ndrăy n’hanh mât uĕh nău khlay văn hóa bah drăp ndơ ơm yău ntŭk ntô văn hóa chĭng gông Tây Nguyên-ndơ văn hóa mô mpơl săk bah kon nuĭh, nău boăt nthoi drăp ndơ tâm trong hăn pâl nđaih hôm rgop geh soan nâp nâl an văn hóa chĭng gông tâm nău rêh mhe. Dŏng ăp ndơ geh mpeh công nghệ n’hanh mạng xã hội, du hê dơi rgum, boăt nthoi n’hanh geh ăp rup gui ngăn ngên mpeh nău rêh bah nsum mpôl nơm, bah nĕ rgop ƀư uĕh lơn nău mât ndrăy nău way ơm uĕh lăng bah ăp rnoi nuĭh.