Ôi 5/3, Hội Liên hiệp bu ur Việt Nam n’gor Dak Lak ƀư bôk nău kan tâm Mâp khay 3, ndrel nchreng an uănh ao dai n’hanh ntroh hăn ta nkual rvăch Ndah rup lơh dơi Buôn Ma Thuột. Đah nkô̆ “Bu ur Dak Lak dăng - uĕh – nsing nơm nsan hao lăp tâm rơh hun hao mhe” bôk nău kan wăch rgum rlău 800 hội viên bu ur râng. Ăp yuh hŏ ndrel nchreng an uănh ao dai Việt Nam ta nău mprơ “cánh chim phượng hoàng”.

Nchreng an uănh 3 blah ao dai bok cheh tanh, ao dai rup ndrang kao sen n’hanh rup ndrang ƀon tơm. Ntroh hăn njok ăp trong Lê Duẩn, Nguyễn Tất Thành n’hanh rvăch Ndah rup lơh dơi Buôn Ma Thuột. Nkhêp geh rnôk dja, Hội Liên hiệp bu ur Việt Nam n’gor rgŏ jă trong leo ƀư tâm rlong “Rdâk njêng nuĭh bu ur Dak Lak rơh mhe” nkre đah kơt nti n’hanh ƀư tĭng nuih n’hâm, trong gŭ rêh Hồ Chí Minh. Ndơ̆ nklâm ndơ, ndeh wah jâng, học bổng an hội viên bu ur n’hanh kon se ach o ta nkual ƀon têh Buôn Ma Thuột. Aơ lah nău kan geh nkô̆ hôr khlay bah bu ur n’gor rƀŏng tât ăp nar lễ têh bah n’gor, bah neh dak, tĭng “Pơh lễ Ao dai” năm 2025 n’hanh ntrôl dăng trong leo bu ur Dak Lak tiăr nti thể dục, thể thao.