Ơi yuh H’Bình, dăn yuh mbơh du đê̆ nau mpeh nau ndâk rmôt ƀư tâm boh tanh njuh Dak Nia?

            Yuh H’Bình: Tâm boh tanh njuh vay ơm aơ hên ndâk ntơm năm 2018 tât rnôk aơ, tâm rmôt tâm boh tanh njuh aơ geh 12 nŭih. Nau kan ngăn bah ăp nŭih lah mât nau tanh njuh, tŏng dơi nau ŭch rvăt ƀa bơ bah nŭih năch. Geh rnôk dôl tâm yan klih, rek ri ma ăp nŭih kŏ ndăn tanh tâm rnôk măng tâm ngih gay ma năn geh ndơ jao ân năch, hôm rnôk êng ăp nŭih tâm rgum êng tâm ntŭk kan nsum gay ma tanh nsum”.

            Tâm rnôk ntŭk ƀư nau tăch ndoh ndơ rnôk mhe dôl ma geh hun hao, nau ndâk tay nau tanh njuh ơm gay rƀŏng tât ntă nŭih bu rvăt, ơi yuh?

            Yuh H’Bình: Ndơ ma hên tanh ngăn lah tăch ân ăp ntŭk bu ƀư nau kan njroh mprơ, bu rvăt tĭng nau bu đă ma rhŏ ân nau njroh mprơ. Ndơ hêng geh tăch ân năch ta Lâm Đồng, Gia Lai rvăt âk ngăn, khân păng gĭt tât ndrel rvăt bah Zalo, Facebok”.

            Ơi yuh, njuh lah ndơ ơm, yơn nau kan tăch rgâl ân mhe. Ndri, ntŭk tâm boh nơm hŏ dŏng nau kan mạng xã hội gay ma tăch ndơ nê mhâm êh?

            Yuh H’Bình: Ndơ hên tăch ngăn lah tâm Zalo, facebok lah âk. Hên nkoch mbơh ăp ndơ tâm mạng xã hội ndrel ân nau geh mbơh bah ăp mrô điện thoại ma năch bu kuăl êng ndrel joi hên gay ma rvăt ân nôh”.

            Dơi gĭt, ntŭk tâm boh tanh njuh tâm Dak Nia kan hŏ 6 năm, ndri nau geh bah ăp nŭih dŭm âk ơi yuh?

            Yuh H’Bình: Nau geh prặ bah ăp yuh tâm ntŭk tâm boh nau kan aơ nklăp 7-8 rkeh/khay. Aơ lah nau kan ntop tay ân ăp oh yuh ndăn mông măng mô lah rnôk ru, dĭng nar ăp yuh hôm kan mir, hăn klih tiêu, cà phê. Râng ntŭk tâm boh aơ mô êng pơk trong pă kan ân ăp yuh geh tay prăk ma hôm mât nau ơm tanh njuh bah rnoi nơm, ntĭm nti ân rơh mom đŏng”.

            Xã Dak Nia lah ngoai tâm ăp ntŭk tât bah Công viên địa chất lam ntur neh UNESCO Dak Nông mhe geh kơp dơn tal 2. Nau aơ leo tât moh nau ân tanh njuh đŏng yuh?

            Yuh H’Bình: Rnôk ma geh nau mbơh lah xã Dak Nia phung hên geh nkah mbơh lah ntŭk tât Công viên địa chất lam ntur neh UNESCO Dak Nông ri hên rhơn yor aơ lah nau nkhêp gay bu năch gĭt âk lơn, rnôk năch pâl n’aih tât ri hên geh nau dơi gay ma nkoch mbơh ndơ nơm tanh lah êng ndrel nkoch nau ueh ơm bah rnoi nơm lah nsum tât ma ăp nŭih âk lơn. Kơt nê kŏ njêng nau ueh gay kônh wa n’hao nau dơi ndrel mât nau ơm nkre rgum geh âk nau mhe, kơl an nau rêh bah kônh wa hun hao”.

            Tâm rnôk tâm rnglăp lam ntur neh, ăp nau kan ơm kŏ mâp nau jêr, yuh geh đŏng nau ŭch, nau đă njoăl tât ăp gưl n’gâng kan uỷ đảng, nkuăl gay kơl, hun hao nau kan aơ?

Yuh H’Bình: Rnôk aơ hên ŭch lah n’gâng kan, Đảng ngih dak pơk trong âk lơn đŏng gay hên ƀư ueh nau kan tanh njuh ơm tâm nau mbơh tăch ndơ. Dăch tât ri hên mra ntĭm oh nur nau blau kchoh, nkra ndơ tă bah njuh nơm geh tanh gay ma nơm dơi kchoh, dơi tanh nkre”.

Năm mhe, yuh geh đŏng nau njoăl tât ƀon lan lam dak ndrel ma ƀon lan Tây Nguyên nơm?

Yuh H’Bình: Rơh năm mhe 2025 gâp dăn rhơn njoăl tât ăp kônh wa ƀon lan dăch ngai năm mhe săk dăng lăng ngăch, geh nau dơi. Rhơn ân kônh wa ƀon lan năm mhe geh tiêu, cà phê âk play lơn”.

Ơ, lah ueh yuh, Rhơn ân yuh ndrel oh nur tâm ntŭk tâm boh kan nsum tanh njuh vay ơm du năm mra geh âk nau dơi lơi./.