Gay ma mât rbăy di sản văn hóa chĭng gong tâm nău rêh nuĭh ƀon lan rnoi đê̆, năm mhe nơh, n’gâng kan têh ta n’gor Kon Tum lĕ geh ƀư âk jrô nti nău kan, kĩ thuật tŭr chĭng, njroh xoang n’hanh ăp nău chĭng way ơm an mom ndăm. Nghệ nhân mom A Huyền lah mom ndăm nuĭh Xơ Đăng lĕ tât ntĭm nti an 30 học viên ta nkuăl têh Đăk Tô mpeh nău tŭr chĭng goh gong, njroh xoang n’hanh ăp nău chĭng way ơm bâh nuĭh Xơ Đăng. ‘Yor gâp saơ aƀaơ rơh nuĭh ranh ba năp gĭt pâl ndơ kăl e mô hôm geh âk tay, jêng gâp min gâp an geh ndơn tay n’hanh ntĭm nti tay an rơh ba kơi, ntĭm nti tay an rơh mom aƀaơ gĭt aơ lah nău way ơm bâh nơm, he an geh hun hao păng, gay ma băl mpôl tâm dak n’hanh dak bah dih gĭt tât âk lơn mpeh nău way ơm bâh rnoi nơm, ndơ ueh bâh rnoi nơm”.

Jêh  lôch năm nti n’hanh nău hăn du học chuyên ngành thiết kế thời trang ta Malaysia, nô K’Jô Na (nuĭh K’Ho) lĕ sĭt ƀon lan n’hanh ntơm lăp nău kan thiết kế thời trang, ƀư geh âk ndơ đah brai cheh tanh ta nkual ƀon têh Đà Lạt, n’gor Lâm Đồng, nô K’Jô Na nkoch:

 Gâp lah nuĭh kon bah ƀon lan K’ho jêng dŭt ŭch n’hanh ntô̆ n’hao đah văn hóa way ơm bah rnoi nuĭh nơm. Tâm nĕ, cheh tanh lah ndơ văn hóa tĭng đah nơm bah jêt rnôk u gâp, mê̆ gâp gŭ cheh tanh. Rnôk têh ri gâp ŭch ndơ̆ ndơ cheh tanh mpla nsơ tât đah âk nuĭh lơn, âk ntŭk lơn. Gâp dŭt ŭch âk ndơ ê nkra bah gâp ri cheh tanh bah ƀon lan Tây Nguyên dơi tât dăch lơn đah lĕ rngôch ăp nuĭh, uĕh mhe lơn, kơl ăp nuĭh ŭch tay văn hóa rnoi mpôl đêt lơn.