Lơ 24/2, N’gâng kan Văn hóa, Thể thao n’hanh Pâl nđaih Dak Lak ƀư mbơh ƀon Kli A (ta nkual têh Buôn Hồ) lah ƀon pâl nđaih nsum mpôl. Ƀon Kli A, phường Đạt Hiếu, nkual têh Buôn Hồ, tă bah nkual ƀon Têh Buôn Ma Thuột rlău 40km. Ƀon aƀaơ geh 276 rnăk gŭ rêh, lĕ rngôch lah nuĭh Êđê, hôm e dơi mât âk nău uĕh văn hóa kơt chĭng gông, mboăt n’hôm rnoi nuĭh, ăp nău ƀư brah n’hanh du đêt nău way ơm. bah năm 2023, ƀon Kli A lĕ dơi nkual têh Buôn Hồ ntuh kơl ndâk ƀư ndơ dŏng đah nkual mpla nsơ văn hóa, jay nhih, rdâk ƀư tay n’hanh mât rƀăy ndrâm dak.

Năm 2024, UBND n’gor Dak Lak lĕ săch ƀon Kli A n’hanh 4 rnăk tâm ƀon an ntop kơl n’hanh jêh nău ntuh kơl hun  hao pâl nđaih nsum mpôl. Tĭng trong nchrŏng, ƀon Kli A mbra hun hao ăp ndơ pâl nđaih nsum mpôl kơt ƀư ngăn, mĭn joi nău rêh gŭ âm, pah kan bah kônh wa nuĭh Êđê; ƀư ngăn văn hóa way ơm kơt chĭng gông, nsơr mpla văn hóa nghệ thuật dân gian, văn hóa ndơ sông sa n’hanh tâm nđŭr, boăt nthoi đah ăp nsum mpôl; râng ntŭk ntô bri dak n’hanh boăt nthoi ăp ntŭk tât ta trong pâl nđaih.