Bah ôi ơm, jay văn hóa cộng đồng ƀon Khal, xă Cư Pơng, lĕ mô ru nuĭh luh lăp nchrăp an ƀư brah rhơn lăp jay mhe. Bu ranh ƀon n’hanh ăp nuĭh nsing nơm tâm ƀon ndrel dăp nchrăp ndơ ƀư brah, rlong tŭr chĭng; druh ndăm nchrăp ndrănh yăng, poăch n’hanh dăp nsưng; bu ur nchrăp mbân ao tanh peh ba, săch trau, khôm ŭnh nkret gâm ndơ sa. Du hê du nău kan, jêng mông nar n’gŭr răm. Yuh H Hinh Niê, ta ƀon Khal, nkoch:

Bah ôi ơm oh yuh lĕ nchrăp nuih n’hâm, hăn ta aơ gay kơl ăp nău kan kơt gŭch gâm, nchrăp ăp ndơ sa, mpêh koăih tay tâm wâl gay wơt rhơn ăp nuĭh năch têh. Săk gâp nơm dŭt rhơn, răm yor mât kơt rƀăy tay nău way uĕh ơm bah nuĭh Êđê bah kăl e tât aƀaơ.

Ƀư brah jay mhe dơi ƀư tĭng nău way ơm bah nuĭh Êđê, gay rhơn jay văn hóa cộng đồng ƀon Khal-“jay nhih nsum” bah ƀon mhe dơi ƀư jêh. Yor lah jay nsum jêng lĕ nsum mpôl ndrel nchrăp ƀư brah. Ndơ ƀư brah geh: du mlâm sŭr, du mlâm djăr, 6 yăng ndrănh ndrel du đêt ntil ndơ sa yor kônh wa ƀư êng.

Rnôk ăp ndơ ƀư brah dơi dăp jêh, tŭr chĭng wơt năch nteh mbơh ƀư brah ntơm ƀư. Bu nuĭh kuăl brah ƀư ăp nău way kuăl brah tĭng gưl. Nău kuăl brah n’ăp nău tŭr chĭng boăt nthoi nsum mpôl, djôt tĭng nău mpŏng ŭch bah nuĭh ƀon lan mpeh nău mât njrăng, nking n’gang an jay nhih n’hanh ăp nuĭh ƀon lan đăp mpăn, ngăch prăl, tâm rnglăp, krêp dêh, rêh hơm răm, bôh ba săk geh.

Tĭng bu nuĭh răch brah Y H’Liêm Mlô (ea Phước)-bu ranh ƀon Khal, bah năp đaơ nău ƀư brah jay mhe bah nuĭh Êđê rlău 5 gưl: bôk năp lah kuăl brah mbơh đah brah yang mpeh jay mhe, jêh nĕ ƀư brah u che yău ye, ƀư brah rao jay, ƀư brah săk soan n’hanh mbah rhơn nuĭh tơm jay geh jay mhe. Nar aơ, ƀư brah dơi săch ntlơi tĭng rnôk, tĭng nău geh bah ăp rnăk wâl.

Nkô̆ nău khlay bah ƀư brah lăp jay mhe tĭng nău way ơm u che kăl e ta ăp ƀon lan yor tâm rnôk rdâk ƀư jay geh nău ƀư tih ăp nău mô uĕh jêng an ƀư brah gay ntru lơi ăp nău mô uĕh, mât tay ăp nău uĕh gay nuĭh tơm dơi geh âk nău lap, săk soan ngăch prăl.

Nteh n’gôr bah chĭng jêng n’gŭr răm lơn rnôk lôch ƀư brah, yor nĕ lah ntơm gưl răm, đah sông sa nsum n’hanh ăp yăng ndrănh dơi troch bêng yăng. Tâm jay mhe, ăp nuĭh rgum ndrel ngêt sa ăp ntil ndơ n’hanh tâm rnglăp ndrel đah nău uĕh bah chĭng. Wa Y Yuynh Kbuôr Kruanh ƀon Khal an gĭt:

Ƀư brah jay mhe lah di an kônh wa rgum rƀŭn, nkah gĭt tay nău uĕh chĭng gông, ngêt ndrănh n’hanh mât nău uĕh rnoi nuĭh. Mpôl hên lơ răm m’ak, dăch dêh, ndrel ƀư sa, hun hao ƀon lan nơm.

Ƀư brah jay mhe bah rnăk wâl nuĭh Êđê đah nkô̆ nău tĭng brah yang lah uĕh an ăp brah yang lĕ kơl an nuĭh tơm jay bôh ba săk geh n’hanh dơi geh ndơ ƀư jay mhe. Đah jay nsum bah nsum mpôl, ƀư brah aơ geh nkô̆ nău boăt nthoi ăp nuĭh, n’hanh saơ nău nsing nơm tâm nău uănh tât bah Đảng, Ngih dak tâm nău rƀăy n’hanh mât uĕh ăp nău khlay văn hóa uĕh bah rnoi nuĭh.