Nar rgum pâl ƀư tâm bar nar 12 n’hanh 13/4, đah nău tât râng bah rlău 800 bu mprơ, ƀon lan ăp rnoi mpôl đê̆ tât bah 17 nkuâl, thị xã, nkual ƀon têh ta n’gor Gia Lai. Đah bôk moh “Âm vang đại ngàn”, măng ƀư ntơm pơk ma nău way mpơl tay rup gui ƀon lan ăp rnoi mpôl đê̆ ndrel wăch rgum sĭt ta “ƀon nsum”- ntŭk tâm rlai lăp săk tơm, buăt nthoi nău nsing nơm, ndrel rƀŏng tât rdâk njêng Gia Lai ndrŏng uĕh, tâm rnglăp n’hanh hun hao nâp dăng. Nthoi tay măng njroh mprơ đah ăp nău chĭng gong treh têl nău rêh văn hóa way ơm, nđơr nsan hao bah ƀon lan ăp rnoi mpôl đê̆.

Lôch măng ntơm pơk, ăp bu mprơ hŏ nchreng an uănh, rdâk tay âk nău way ơm, ntĭt uĕh êng kơt: nău way wơt dak sĭt ƀon, sreh rpu, nău way nsĭt n’glĭng, nău way Sơmă Kơcham, nău blău mprơ tuồng, ndơ uh goh rnoi mpôl đê̆, trah mon rup, tanh tôk, tanh bok rui brai...

Wa Lê Thị Thanh Thủy-Giám đốc Trung tâm Văn hóa-Thông tin n’hanh Thể thao nkuâl Mang Yang, n’gor Gia Lai, an gĭt:

“Mang Yang nsĭt tât nar rgum ăp ntil nău dŭt săk ntơr uĕh êng. Bah meng nê, gâp mpŏng nar rgum pâl dơi ƀư tay gay mât dơi ăp rup uĕh văn hoá bah rnoi nuĭh Bahnar n’hanh ăp rnoi nuĭh êng ƀa ƀă ta nkuâl”.

Năm aơ, mpôl njroh mprơ thị xã Ayun Pa lah 46 nuĭh râng âk nkô̆ jroh mprơ săk ntơr êng kơt nchreng an uănh  tŭr goh chĭng gong, cheh tanh bok brai, râng ăp nău pâl rlưn way ơm... Bu mprơ Nay Ka ta Bon Phu Ama Nhuer 2, xã Ia Rtô thị xã Ayun Pa, nkoch:

“Mpôl bu mprơ thị xã Ayun Pa mpôl hên mbra rdâk tay nău way "Sa Pơthi" (Huă Blan) – du nău way ơm uĕh êng bah ƀon lan Jrai. Aơ lah nău way ơm ôp huêng phan bah nuĭh hŏ roh tâm ƀon lan Jarai Cheo Reo. Nău rdâk tay nău way ơm dja gay mpơl tay rup uĕh văn hóa săk ntơr êng bah rnoi Jarai, nkah rơh kơn mom ndăm gĭt wât n’hanh uănh khlay ăp rnoh khlay way ơm bah u che he.”

Bu mprơ Siu Thưm – ta Plei Ku Roh, nkual ƀon têh Pleiku, an gĭt, rmôt njroh mprơ bah thôn geh 40 nuĭh, mbra tŭr goh ăp nău chĭng gong khuh n’gôr “Rhơn lơh dơi”, ndrel ăp nău mpât mprơ săk tơm. Aơ lah rnôk gay nkoch mbơh tât năch pâl nđaih ăp rnoh khlay văn hóa săk ntơr êng bah rnoi nuĭh he:

“Rnôk dja mô di lah tâm rlong đah ăp mpôl êng ƀa ƀă, ma lah tâm nđŭr. Yor kơt nê̆, mpôl hên ŭch rŏng ăp nău njroh mprơ săk ntơr êng bah nuĭh Jarai ta Pleiku nkoch mbơh tât ăp mpôl njroh mprơ băl n’hanh năch tât Gia Lai. Yor kơt nê̆ bu mprơ rhơn mƀak n’hanh rah rơch da dê”.

Mông nar rgum pâl ntơr uĕh săk tơm văn hóa đah ăp nău kan kơt mpơl tay nău rêh nsum mpôl, nchreng an uănh ndơ nsoh, uh oh, ndơ sa way ơm n’hanh ăp nău pâl rlưn way ơm; ăp ndrơng ndơ săk kah khlay ta ntŭk kơt cà phê, ndrănh yăng, mƀêk prung, puăch gŭch…rgop nkơnh n’hơ âk mbâl n’hanh mpưm âk văn hóa bah kônh wa ăp rnoi mpôl đê̆ tâm n’gor./.