Nar ntri (5/2), jêng lah nar 8 khay ngoăy âm lịch, ƀon lan nuĭh Mường ta xã Hòa Thắng, nkual ƀon têh Buôn Ma Thuột, n’gor Dak Lak ndrel rgum ta đình Lạc Sơn, xã Hòa Thắng gay ntơm ƀư lễ khai hạ (hôm kuăl lah lễ njŭr tơm njuh).

Aơ lah du nău way kan tuch tăm ơm bah jŏ ƀon  tơm Hòa Bình dơi kônh wa nuĭh Mường mât ndray, ntik n’hao ta ƀon tơm  mhe Dak Lak. Lễ khai hạ (hôm kuăl lah lễ njŭr tơm njuh) lah ngoăy tâm 3 lễ khlay tâm năm bah nuĭh Mường, dơi ƀư rnôk ntơm bôk năm khay tuch tăm tâm năm. Dự lễ khai hạ, ăp nuĭh ƀon lan nsoh ndơ way ơm uĕh reh, ndrel rgum ta bôk ƀon. Lơn  lah, năm aơ ta đình Lạc Sơn, xã Hòa Thắng geh 3 rmôt chĭng Mường bah 3 thôn tâm xã rgum tâm nđŭr, ƀư nău nteh chĭng gong lơn ma n’gloh lam.

Ăp rmôt chĭng gong tâm dăp mbor jong bah mpông mpêr đình, tŭr goh ăp nău chĭng gong n’gôr gră gay wơt năch. Kêng dŭt ƀư brah, tât nău pâl rlưn ntơm đah ăp ndơ pâl way ơm kơt ncho lơng djơng, hao jrŏng mbĭr ngi, mbang sŭr uk, ntŭp đúm, têk rse, nhŭp kik,…