Bâh dŭt năm e tât aƀaơ, rnôk trôk jur măng, trong hăn ma bê tông văr ƀon Nú, xã Ia Nan, n’gor Gia Lai chrat ang êng bâh đèn ŭnh nar. Oh kon se nchoăt pâl ta trong, nuĭh têh bâh ta mir sĭt geh sol ang chrat đŏng. Ta măng geh điện ang trong, oh H Oanh dôl ndrel đah mpôl băl hăn jâng tât ngih văn hoá pâl rlưn. “Ntơm nơh rnôk ê hŏ geh điện măt nar yor công ty kơl ƀư an rĭ mpôl bu ur hên hăn măng ta trong klach ngăn. Bâh ntơm geh điện hên saơ mô hôm geh nău mĭn rvê êng dŭt đăp mpăn ngăn”.

Ndrel đah Ia Nan, âk xã rgŏ trong n’har bri ta mpeh nhâp nar n’gor Gia Lai lĕ geh ăp ntŭk kan Binh đoàn 15 mbơh ƀư bôk nău kan “Mpoh ang trong ƀon”. Năm 2024, Binh đoàn lĕ ƀư mpoh ang rlău 23km, lĕ rnoh prăk ƀư rlău 1,5 rmen prăk. Tât năm 2025, lvang rơh 2 bâh bôk nău kan geh mbơh ƀư tay ta âk thôn, ƀon hôm nha jêr jŏt ta n’har bri, đah nău jong rlău 10km. Ta xã Ia Mơr, bu ranh ƀon Ksor H’Blâm rhơn nkoch. “Bu ranh ƀon rĭ lĕ rhơn ngăn hôm, ƀon lan dŭt rhơn, trong hăn lĕ dŭt ueh ang. Hăn pah kan, hăn kor rtăk, mô lah ăp ntŭk hăn geh điênj mpoh ang rĭ rhơn ngăn hên”.

Đại tá Nguyễn Chí Kiên – Bí thư Đảng ủy, Groi Giám đốc Công ty 72, Binh đoàn 15 an gĭt, ăp nău kan mpoh ang ma điện măt nar mô dơn kơl an ăp ƀon ta n’har bri ueh ang lơn, kơl an ta ntŭk rdâk njêng nău rêh văn hoá n’hanh ƀư lôch ueh ăp nău mpŏng kan nkual ƀon lan mhe ma hôm nha kơl ntop mât đăp mpăn rnă njrăng, bah ir geh nău tât mô ueh ta ntŭk rêh jêng n’hanh bah prah tâm tom ndeh.“Bâh ntơm geh ăp bôk nău kan mpoh ang trong ƀon ta ăp ntŭk geh ăp n’gâng kan bâh Binh đoàn 15 pah kan rĭ geh ntop dŭt âk dŭt khlăy ta nău mât đăp mpăn rnă njrăng, mât đăp mpăn nău ueh ta trong hăn”.

Bâh ăp ŭnh ang nĕ, bôk nău kan “Mpoh ang trong ƀon” mô dơn mpoh ang trong ƀon, ma hôm nha mpoh nău knơm, nău ŭch rŏng mpeh du nău rêh hơm răm let năp tay, jêng nău ueh an nău tâm rnglăp ƀon lan-tahen dăch mêr ta nkual neh n’har bri Gia Lai.