Bu ranh ƀon Điểu Dray ta ƀon Bu Prâng 1, xã Quảng Trực, n’gor Lâm Đồng, mô dơn ntĭt leo lor trong pah kan jan sa, păng hôm lah nuĭh ntĭt leo lor chrat ang tâm mât ndray săk tơm văn hóa rnoi mpôl đê̆ n’hanh trong leo lam ƀon lan mât njrăng ƀư tơm neh dak, rnă njrăng n’har bri.

Năm 2022, lôch rlu ranh ntơm bah nău kan Kruanh Hội Nông dân xã Quảng Trực, wa Điểu Dray dơi nsing nơm sơch ƀư Groi bí thư chi bộ, Kruanh ƀon Bu Prâng 1, nkre ƀư groi kruanh rmôt mât njrăng êng trong n’har bri. Ta ah ntŭk gŭ kan, păng dơi n’hao nuih n’hâm dơn kan da dê, lĕ nuih n’hâm an nsum mpôl.

Tâm pah kan jan sa, wa Điểu Dray lah nuĭh leo lor tâm rgâl si tăm ndơ mât, rgâl mir mô săk jêng, nsĭt tay nău geh wăng sa âk. Năm 2010, bôk nău kan ntrŭt nsôr tuch tăm nsĭt tơm mắc ca sĭt tăm ta nkual n’har bri Quảng Trực. Tâm rnôk hôm âk rnăk wĭ wĕ, ri rnăk wa Điểu Drây dơn tăm rlău 1ha mắc-ca. Nău dơi bôk năp, rnăk păng pơk hvi neh tăm tơm mắc ca tăm rlŭ tâm mir cà phê, tiêu. Bu ranh ƀon Điểu Dray an gĭt:

“Aƀaơ, lĕ rngôch rnoh hvi neh tăm tơm mắc ca bah rnăk gâp lah 8 ha, tâm nê 1,5 ha dôl klêh ngăn, 1 năm klêh 2 tơ̆, ăp rơh nklăp 2 tấn, rnoh khlay tăch nklăp 70 rkeh prăk/tấn tâm (khay 3–4), hôm khay klêh tơm (khay 9–10) tăch khlay lơn”.

Gay mât chăm jŏ jong, rnăk wa Điểu Dray hŏ râng tâm HTX tuch tăm ta ntŭk. Păng nsrôih kơt nti n’hao âk kỹ thuật, rêng mât chăm, klêh donh, nkret njêng tuch tăm tĭng trong rƀŏng nâp dăng. Păng rgŏ jă kônh wa ndrel râng hợp tác xã gay tâm rgop hun hao wăng  sa đăp mpăn.

Tât aƀaơ, xã Quảng Trực, n’gor Lâm Đồng hŏ geh nklăp 1.500 ha mắc ca, pơk luh trong ƀư geh ndrŏng an ƀon lan kan lŏ mir, lơn lah ƀon lan rnoi mpôl đê̆. Ta ƀon Bu Prâng 1, geh bar pe jât rnăk tăm mắc ca; âk rnăk nsĭt geh đăp mpăn ăp năm bar pe rhiăng rkeh prăk. Wa Đoàn Lê Anh – Kruanh Ủy ban MTTQ Việt Nam xã Quảng Trực an gĭt, gay geh nkual tăm mắc ca kơt aƀaơ, geh nău rgop khlay bah bu ranh ƀon Điểu Dray.

“Wa Điểu Dray lah bu ranh ƀon nsing nơm, tă lah Kruanh Hội Nông dân xã, jêng pah kan nkoch trêng, kơi năp nti ntrŭt nsôr tuch tăm bah păng dơi  kônh wa nsing nơm. Păng lah nuĭh râng bôk nău kan tăm mắc ca lor bôk năp ta Bu Prâng 1, Bu Prâng 2 đŏng, ntơm bah nê kônh wa kơt tĭng, kơl ăp ƀon n’har bri nar lơn lhut săk rgâl ntô.”

Mô  dơn dâk hăn lor tâm pah kan jan sa, bu ranh ƀon Điểu Dray hôm uănh khlay mât ndray n’hanh ntik n’hao săk tơm văn hóa nuĭh Bu Nong đŏng. Mhe aơ, lôch kăch rek, nuĭh Bu Nong ta xã Quảng Trực ƀư nsĭt ba n’hao rhe tâm nău nteh chĭng gong khuh n’gôr. Bu ranh ƀon Điểu Dray lơp uĕh tâm ndơ nsoh cheh tanh  leo rmôt chĭng gong Bu Prâng 1. Wa Thi Sư, cán bộ Jrô kan Văn hóa Xã hội xã Quảng Trực, nkoch: bu ranh ƀon Điểu Dray ndrel rmôt chĭng gong hŏ geh âk nău dơi ta ăp rơh tâm rlong, liên hoan văn nghệ nsum mpôl.

“Păng dŭt rah rơch tâm ăp  nău  kan bah ƀon, lah nuĭh tơm leo trong rgŏ jă kônh wa mât ndray nău way ơm. Lah kruanh rmôt chĭng gong, păng leo ƀư tŭr goh tâm ăp rnôk lễ hội, tâm nđŭr, hôm trêng nti tay an rơh kơn mom ndăm kơt nti n’hanh mât ndray săk tơm rnoi nuĭh.”

Ta njăr trong n’har bri Quảng Trực, n’gor Lâm Đồng, Bu ranh ƀon Điểu Dray dơi gĭt tât kơt du “n’gâng rêh”. Khay 6 năm e nơh, păng dơi Bộ Tư lệnh Biên phòng mpư rnê lah “nuĭh geh nsing nơm ntoh lư ta nkual n’har bri, gôl dak” tâm bôk nău  kan “ntŭk nsing ƀon  lan”. Bu ranh ƀon Điểu Dray lah Groi kruanh rmôt mât njrăng êng trong n’har bri Quảng Trực. Păng nsrôih kan nsum đah tahen n’har bri hăn rsong uănh, mât njrăng n’har bri; way nkoch trêng an kônh wa mô djăt nău bu nsŭk nsôr têk klônh, nsrôih râng ăp trong leo ƀư “Lam ƀon lan râng mât njrăng ƀư tơm neh dak, rnă njrăng n’har bri”.  Wa Điểu Minh Nhật, Groi kruanh Ủy ban MTTQ, Bí thư Đoàn TNCS Hồ Chí Minh xã Quảng Trực an gĭt, Bu ranh ƀon Điểu Dray lah nuĭh ntoh lư an rơh mom ndăm bah kơi kơt tĭng.

“Đoàn xã kan nsum đah ăp ƀon, rmôt mât njrăng n’har bri ndrel Pôih n’har bri mât đăp mpăn rĭng uĕh n’har bri. Bu ranh ƀon Điểu Dray hôm kan nsum đah Đoàn Thanh niên xã ƀư tâm nđŭr chĭng gong, nkoch trêng druh ndăm mât ndray văn hóa, tĭng jăp pháp luật, mât njrăng bri, mô djăt tĭng nău têk klônh hăn kan mô geh nău way…”

Ăp nău nsrôih mô gŭ rlu bah bu ranh ƀon Điểu Dray hŏ rgop kơl ƀon Bu Prâng 1, xã n’har bri Quảng Trực (n’gor Lâm Đồng) mât nâp đăp mpăn rnă njrăng, hun hao wăng sa, mât ndray săk tơm  văn hóa. Săk bu ranh ƀon nơm hŏ âk tơ̆ dơi ăp gưl n’gâng kan n’hanh tahen n’har bri nkhôm rnê yor geh nău dơi ngăch prăl tâm  pah kan rgŏ jă nsum mpôl, rdâk njêng thôn ƀon mhe n’hanh mât njrăng n’har bri./.