Nchrăp du pơh jêh lôch Đại hội, n’gor Dak Lak ƀư dơi Nar rbŭn ntrơn rgâl mrô năm 2025 đah nkô̆ ‘Nau kan mrô-ndâk nau mhe”. Đah nkô̆ jêng n’gor hăn leo trong tâm ntrơn rgâl mrô nkuăl Tây Nguyên-Duyên hải Nam Trung bộ. Jêh 3 khay rnglăp, Dak Lak ƀư jêh 100% nau dơi ntrơn rgâl 102 xã, phường, rnoh hồ sơ trực tuyến lam lĕ geh 34,5%, gưl xã geh rlau 37%. Ntŭk kan kơl an nau kan hành chính công bar gưl ndơn geh rlau 350 rbăn hồ sơ, đah 76% rklaih trực tuyến. Lam n’gor geh 83% nŭih ƀon lan gehpă tài khoản định danh điện tử mrô 2, bơi tât 79% hŏ geh dŏng.

            Ăp nau tă geh aơ ân saơ nau rgâl mhe bah n’gâng kan tâm nkuăl bar gưl Dak Lak tâm nau ntrơn rgâl mrô, rƀŏng tât nau kan tâm dăch ƀon lan, kloh rvah ndrel mhe. Wa Bùi Thanh Toàn, Giám đốc Sở Khoa học ndrel Công nghệ n’gor Dak Lak, mbơh:

            ‘Mhâm ƀư gay n’gâng kan tâm êp ma ƀon lan lơn tâm rnôk lah rnoh neh âk lơn lŏ mô hôm gưl nkuăl ri khoa học công nghệ rgâl mhe, blau mhe ndrel ntrơn rgala rmô nê lah ntrong ƀư. N’gor mra lŏ ntuh kơl mpeh ntŭk ntu, kon nŭih mra geh du rơh leo lăp nau kan rnglăp jur pah kan bah ăp cán bộ tâm n’gor tât gay kơl an ân xã, phường. Êng nê, kŏ rgum nŭih ƀư nau kan ta bah dih ndrel kŏ ndưn nau kơl an bah ăp ntŭk ƀư nau kan tăch rgâl tâm n’gor”.

            Năm kan mhe, Dak Lak leo nkŏ nau hao 10,5% nsing tâm hun hao nŭih ƀư nau kan nâp, ntrŭt dăng khoa học, công nghệ, rgâl blau mhe ndrel ntrơn rgâl mrô, ntuh kơl tâm ban ăp ntŭk ntu gay pơk hvi nau tâm rnglăp nkuăl.

            Ndrel ma n’gâng kan, nŭih ƀon lan ndrel ntŭk ƀư kan tăch rgâl bah n’gor kŏ ndơn saơ kloh, lvang ănm 2025-2030 Dak Lak mô êng ƀư nau kan tâm ntŭk ân hun hao ma nau khlay lơn lah pơk hvi ntŭk kan bah nau mĭn. Wa Ngô Tường Vy, Tổng Giám đốc Ntŭk kan tăch luh play sa Chánh Thu, nkoch tât nau dăng bah tuch tăm Dak Lak rnôk aơ mra geh moh ntil ndơ ndrel trong rƀŏng mhe, nau ntrŭnh mhe:

            ‘Nau khlay lah ân geh ndơn uănh tuch tăm kơt lah du nau kan văng sa dăng, nsing tâm công nghệ, ntrong geh khlay ndrel nau ueh dơi bah ndơ tăm bah nkuăl neh Dak Lak leo ngai lơn, jêng nau rhơn bah tuch tăm Việt Nam’.

            Đah nkô̆ rgâl mhe, hun hao, Dak Lak nkre ntrŭt dăng khoa học, công nghệ ndrel ntrơn rgâl mrô, nkre n’hao ntŭk ntu gung trong.  Wa Tạ Anh tuấn, Kruanh UBND n’gor Dak Lak mbơh, tâm rnôk ntrơn rgâl mrô, ntŭk ntu mrô lah ‘mâng ndră” ri trong hăn lah mâng dră ân nau ntrŭt dăng văng sa rêh jêng:

            ‘N’gor mra rgum tu tơm gay ntuh kơl ƀư ân dơi ăp trong hăn tơm, ngăn lah trong hăn ngăch nthoi Đông Tây bah n’gor, nthoi mpông dak lêng ndrel tach ndeh mpar kŏ kơt lah tâm nthoi ăp trong hăn ngăch bah lam dak kơt trong hăn Bắc Nam, trong hăn ngăch Buôn Ma Thuột-Vân Phong ndrel trong hăn leo trong du nhoat mra pơk jêng trong dơi hun hao mhe ndrel n’hong ueh ăp tu tơm nau kan êng”.

            Đah ăp nau dră gay hun hao dôl geh ƀư nâp, ăp nau kan tât mhe ân ntuh kơl, tăch rgâl tâm Dak Lak dôl pơk luh.  Wa Lê Đức Huy, Kruanh rmôt kan nsum bah Công ty TNHH du ntŭk kan tăch luh 2/9 Dak Lak, nkoch:

            ‘Phung hên rhơn ngăn lah mra leo Dak Lak hun hao ngăch dăng tâm rơh tât, ngăn lah ăp nau kan rgâl mhe. Tal bôk năp mpeh ntŭk ntu ung trong mra hun hao, nthoi Đông tây gay hun hao nau ê nkra jri, ăp ntŭk kan n’gâng kan mpeh khu công nghiệp, ăp ndrâm dak lêng kŏ kơt lah ăp ntŭk ndrâm dak lêng geh rgum âk, leo ndơ tuch tăm ndrel tui ka bah Tây Nguyên lah nau tăch luh dak ba dih tĭng trong dak lêng tâm mpeh ba lơ Dak Lak”.

            Jêh Đại hội Đảng bộ n’gor, Dak Lak mô êng nkoch tât nkô̆ nau ma hôm ƀư ăp nau kan ngăn, gay njêng nau mhe, ntŭk ma tuch tăm, công nghiệp ndrel dak lêng rnglăp nsum nau hun hao. Rnôk nau ntrŭnh geh ƀư ngăn đah nau kan, rnôk nuih n’hâm rgâl mhe geh rêng leo tât ăp nŭih ƀon lan ndrel ntŭk kan, Dak Lak mra mô knŭng lah neh tăm âk cà phê, ma hôm lah nau ntoh bah nkual neh dôl hun hao rjăp dăng ta ưbah yôk prêh tât dak lêng têh./.