Dak Lak dôl rdâk njêng 4 nhih nti phổ thông dân tộc nội trú rep gưl ta ăp xã n’har bri, đah rnoh têh uĕh mhe, ăp kôp. Nhih nti dơi mpŏng nsĭt tay nău geh ndơ gŭ nti uĕh lơn an kon se nkual n’har bri, ntruch huêt tâm ƀah đah nkual n’hanh rgop mât nâp rnă njrăng n’har bri.

Dak Lak geh trong n’har bri jong 73 km kâng n’har đah n’gor Mondulkiri (dak Campuchia) ta 4 xã: Ea Bung, Ia Rvê, Ia Lốp n’hanh Buôn Đôn. Aơ lah nkual mha êng, ƀon lan rnoi mpôl đê̆ âk tât rlău 50%. Ntung trong ƀah ngai, nhih nti jŭr khuch ƀư nău kơt nti bah âk kon se mâp âk jêr jŏt. Ăp nar khai giảng, mô đêt nai ntĭm ân hăn rgŏ tĭng ƀon, goh tĭng jay rgŏ jă kon se hăn nti; âk kon se ân hăn ngai 15 – 20 km gay joi rplay siƀŭt. Nău lư n’gor mbra ntuh kơl rdâk njêng nhih nti nội trú rep gưl ta ăp xã n’har bri jêng nău nsing nơm n’hanh nău mpŏng kâp mhe đah kônh wa ta aơ. Yuh H’Đa Nê Byă, ta xã Buôn Đôn mpơl nău:

“Săk gâp nơm tâm ban kơt kônh wa dŭt rhơn đŏng. Rnôk nhih nti dơi rdâk ƀư, ăp kon se mbra geh ntŭk gŭ nti ren âk lơn, dơi ntop kơl tay mpeh siƀŭt, drăp ndơ n’hanh năp nti têh uĕh mhe. Aơ lah nău lư dŭt di ma rhơn, mpôl hên mpŏng nhih nti mbra ơm an ƀư gay oh kon nkual n’har bri geh ntŭk gŭ nti.”

Tĭng weh ƀư, ăp nhih nti geh rnoh hvi 1.000 – 1.200 kon se nti, rnoh hvi ntơm bah 5 – 10 ha, lĕ ma jrô nti, ký túc xá, thư viện, jay gŭ sa, nkual thể thao, jrô máy tính, trong dak kloh uĕh n’hanh ăp ndơ ntop dŏng. Lĕ rngôch rnoh nchrăp nchrăp ƀư nklăp 420 rmen prăk an 4 nhih nti. Đah ăp nai ntĭm, aơ lah njuat hăn khlay droh rklaih âk jêr jŏt tâm trong ntĭm nti. Wa Nguyễn Văn Sơn – Hiệu trưởng Nhih nti THCS Lê Quý Đôn, xã Ea Bung nkoch:

“Dơi ntuh kơl rdâk njêng du trong rvăt năp drăp ndơ ăp tŏng mbra nta trong dơh an ăp kon său bah ir ntlơi nti. Ăp kon se dơi gŭ tay ta nhih nti sông nar mô lah dơi gŭ nội trú ri aơ lah ngoăy tâm ăp ndơ dŭt uĕh an lĕ ma kon se nti n’hanh me bơ̆ nđăp ma nai ntĭm nti.”

Mpeh bah n’gâng kan ta ntŭk, ăp xã hŏ lor nchrăp tâm pă ntŭk neh ƀư nhih nti rep gưl. Nhih nti nchrăp ƀư ta xã Buôn Đôn hŏ dơi dăp rgum ta rnoh neh hvi rlău 5 ha, nchrăp ƀư ntơm tâm khay 10/2025. Wa Lê Thanh Sơn – Groi kruanh UBND xã Buôn Đôn an gĭt:

“Mpôl hên hŏ rong an rlău 3,6 ha n’hanh dôl pơk hvi rlău 5 ha gay njêng nhih nti. Nhih nti mbra nsĭt tay geh ntŭk kơt nti dŭt uĕh an kon se nti, nai ntĭm, nkre lah trong kơl ăp tŏng geh nău rêh khlay, kơl kônh wa krêp dêh, hun hao wăng sa ntŭk n’har bri.”

Lam n’gor Dak Lak aƀaơ geh rlău 4.300 kon se nti ta 4 xã n’har bri. Nău njêng luh nhih nti nội trú rep gưl mô dơn nta geh ntŭk gŭ nti, ntŭk gŭ rêh an kon se nti, ma hôm geh nău khlay jŏ jong. Wa Nguyễn Đình Trung – Bí thư Tỉnh ủy Dak Lak lah rjăp: Aơ lah nău n’glêh an têh, geh nău hôr rŏng nuĭh têh jru, pơk trong gay oh kon rnoi mpôl đê̆ ta nkual n’har bri dơi kơt nti tâm ntŭk gŭ rêh uĕh lơn, rgop ntĭm nti tơm nuĭh kan săk blău âk an n’gor. Nkre, nhih nti lah ntŭk nsing ndăl nâp lam ƀon lan njrăng n’gang neh dak, rnă njrăng ta njok n’har bri đŏng. Bí thư Tỉnh uỷ Dak Lak lah rjăp:

“Dăn đă n’gâng kan ntĭm nti ndrel gưl ủy, n’gâng kan ta ntŭk tĭng nău dơi kan, nău dơn kan jao ngăch an ƀư nhih nti, siƀŭt geh tât gay ơm rdâk mon nhih nti. Tỉnh ủy mbra ndrel hăn tay, rđău đă grêt dêh, gay đăp mpăn ăp trong nchrăp dơi n’glăp dŏng di rnoh ngăch, njêng đăt ndal an n’gâng kan ntĭm – nti bah n’gor, lơn lah ta nkual n’har bri”.

Ăp jay têh hvi bơi ntoh mpơl ngăn ta ntŭk n’har bri mô dơn lah ntŭk “sui găr rplay siƀŭt” ma hôm lah ntŭk ndum luh hon nău nđơr, pơk trong gĭt blău an hang rbăn kon se nti. Đah nău nsum ti bah Trung ương, n’gor n’hanh ƀon lan, nău mpŏng rplay siƀŭt ntŭk n’har bri dôl mbrơi jêng ngăn ngăn.