Ơi kônh wa n’hanh băl mpôl! Đah nuih n’hâm dâk leo lor bah nuĭh đảng viên, wa Kơ Să Ha El ta xã Lạc Dương, n’gor Lâm Đồng mô dơn lôch jêh uĕh nău dơn kan tâm rnôk pah kan, ma hôm an lĕ n’hâm suan he rnôk rlu ranh sĭt ƀon lan. păng lah nuĭh ntĭt leo lor trong chrat ang tâm ƀon lan rong neh ƀư trong, hun hao tuch tăm mât rong, rdâk njêng ƀon lan mhe.  

Tâm jay đar ƀơch rgơm, rĭng grep, wa Kơ Să Ha El rong an nduang ta n’gul dŭt uĕh khlay yông rup wa Hồ n’hanh âk bằng khen, tâm nê geh Huy hiệu 30 năm Đảng. Păng tă rlău âk ntŭk gŭ kan khlay ta ntŭk, lah Bí thư Đảng ủy xã Dà Chais, lôch nê lah Kruanh Hội Nông dân nkuâl Lạc Dương. Păng tă ƀư Groi kruanh Ban Tuyên giáo Huyện ủy Lạc Dương, n’gor Lâm Đồng ơm, n’hanh rlu ranh bah năm 2022.

Đah nău dơi n’hanh nău nsing nơm bah he, rnôk plơ̆ sĭt ƀon lan, wa Kơ Să Ha El dơi sơch ƀư tay Bí thư Chi bộ thôn Dà Blah, xã Lạc Dương. Păng rhơn nkoch mpeh rnôk rgâl bah ƀon lan.

“Ntơm nơh nuĭh ƀon lan ta aơ dŭt ach o jêr jŏt ngăn, ntơm bah gung trong, tuch tăm mir ba mô geh ngăn…Tât năm 1992, dơi geh nău ntop kơl ntil cà phê bah n’gâng kan ta ntŭk hŏ njêng nău geh đăt ndal tâm nău gĭt êng bah kônh wa. Mpôl hên rgŏ jă kônh wa mô lơh n’hang bri, rgŏ jă kônh wa tăm tơm cà phê, tơm hồng, hun hao mât rong kơt ndrôk, rpu nsĭt tay nău geh wăng sa âk….

Ntơm bah rnôk tĭng ƀư bôk nău kan rdâk njêng ƀon  lan mhe, rnăk đảng viên Kơ Să Ha El dâk leo lor. Păng hŏ ndrel đah rmôt kan đă ntrơn du rgŏ jă kônh wa rong neh ƀư trong, rdâk njêng ăp ndơ dŏng nsum an ƀon lan. Na nê̆, rnăk păng hŏ rong rlău 20 mét neh măt trong rnoh khlay hang rmen prăk gay nhih dak ƀư pơk hvi tay trong quốc lộ 27C. Aƀaơ ngih dak an pơk hvi tay n’glău dak bât Rơhoa, rnăk păng rong an 2,5 sào neh tăm cà phê.

Nuih n’hâm dâk leo lor n’hanh ăp nău n’groh an bah rnăk đảng viên Kơ Să Ha El  hŏ rêng lam tâm ƀon lan ta ntŭk, nsum suan du nuih n’hâm rdâk njêng ƀon lan mhe n’hanh nsrôih pah kan jan sa n’hao geh nău rêh. Năm e nơh, rĭng geh tĭng bôk nuĭh bah thôn Dà Blah geh 45 rkeh prăk/nuĭh. Thôn mô hôm geh rnăk ach o, dơn hôm bar pe rnăk dăch kêng ach  o dơm. Wa bu ur Cil Pam K’Quyên, Bí thư Chi bộ ơm thôn Dà Blah, xã Lạc Dương, an gĭt:

“Đah mpôl hên, wa Kơ Să Ha El way lah nuĭh dâk leo lor, ntĭt leo trong chrat ang. Păng hôm lah ntung njŏ nsing nơm đah Đảng đah ƀon lan, nău lah bah păng way geh nău ring tam, kônh wa djăt n’hanh  kơt tĭng.”

Xã Lạc Dương aƀaơ dơi njêng ta nău n’glăp nsum 3 xã Đạ Sar, Đạ Nhim, Đạ Chais bah nkuâl Lạc Dương ơm. Đah rnoh hvi bơi 830 km2, Lạc Dương jêng xã dŭt hvi n’gor Lâm Đồng, đah rnoh âk nuĭh rnoi mpôl đê̆ rlău 82%. Wa Ya Tiong - Bí thư Đảng ủy xã Lạc Dương, an gĭt, năm kan 2025 – 2030, xã hun hao tay sŏk tuch tăm lah rgum tơm, n’gâng ndăl; pâl nđaih lah đăt ndal. Gay tĭng ƀư geh nău dơi ăp Nghị quyết bah Đảng gay mô an n’hao geh nău rêh nuĭh ƀon lan, xã uănh khlay nău dơn kan bah ăp gưl ủy Đảng, ntik n’hao nău khlay dâk leo lor bah đảng viên tâm nkual rnoi mpôl đê̆.

“Ntŭk dja geh dŭt âk đảng viên jŏ năm, ntĭt kơt wa Kơ Să Ha El, bol hŏ dơi geh an rlu ranh bah Ngih dak, yơn aƀaơ, yor nău tâm rŏng ndrăng băl kan, yor oh nô, kônh  wa ƀon lan, păng nha hôm n’groh an gay rgop suan ndrel đah n’gâng kan ta ntŭk nđơn tay n’gâng kan hun hao wăng sa- rêh jêng kon nuĭh bah Lạc Dương dja đŏng.

Nuih n’hâm dơn kan, nuih n’hâm an lĕ nău gĭt blău bah đảng viên Kơ Să Ha El hŏ rgop rdâk nâp tay nău nsing nơm bah ƀon lan đah Đảng, rêng lam nău mĭn nsan hao, nsum suan rdâk njêng ƀon tơm Lạc Dương, n’gor Lâm Đồng nar lơn ma ntơr uĕh./.