Ta Đại hội tâm rlong rŏng dak bah xã Đắk Tô, n’gor Quảng Ngãi mhe aơ, wa Y H’Xuân, rnoi Xơ Đăng, Bí thư Chi bộ nkre ƀư Kruanh thôn Kon H’ring, hŏ dơi rnê lah nuĭh ntoh lư tâm nkual rnoi mpôl đê̆. Păng lah ngoăy tâm ăp nuĭh ntoh lư rgop kơl nuĭh ƀon lan ta ntŭk rdâk njêng nău rêh hơm răm, rgâl muh măt ƀon lan.

Nklang trôk duh n’heng, wa Y H’Xuân – Bí thư chi bộ nkre ƀư Kruanh thôn Kon H’Ring, xã Đăk Tô, n’gor Quảng Ngãi hăn tât jay yuh Y Nai gay rgŏ jă kon său hăn nti. Yuh Y Nai, an gĭt, mô êng đah rnăk yuh, wa wa H’Xuân way uănh khlay grêt dăch tât nău rêh bah ăp rnăk nuĭh Xơ Đăng ta Kon H’Ring:

“Wa Y H’Xuân lah du hê cán bộ ntĭt leo lor, păng way rgŏ jă n’hanh nkoch trêng kônh wa tâm hun hao wăng sa, ntĭm nti oh kon. Păng lah nuĭh ntĭt leo lor thôn gay mpôl hên kơt tĭng nti, gay jêh aơ tay mpôl hên ntĭt leo lor an kon său he kơt tĭng”.

Đah nău rgŏ jă n’hanh ntĭt leo lor bah wa Y H’Xuân, lĕ rngôch oh kon nuĭh rnoi mpôl đê̆ ta Kon H’ring hăn nti ăp tŏng da dê. Păng nkoch “Ŭch klaih rlău ach o ngăn ri ân nti rplay siƀŭt. Geh nău gĭt blău mơ pơk aih bôk rngok, nti dơi nău mhe”. Nơm geh kơt nti ma nău rêh bah nuĭh ƀon lan tâm thôn mbrơi rgâl nar lơn ma hơm răm.

Thôn Kon Hring geh rlău 400 rnăk, lĕ rngôch lah nuĭh Xơ Đăng, aƀaơ hôm 6 rnăk ach o n’hanh 7 rnăk dăch kêng ach o dơm. Đah nău ntop kơl bah ngih dak, aƀaơ lĕ rngôch ăp rnăk tâm thôn hŏ geh jay nâp uĕh, đăp mpăn pah kan jan sa.

Nkoch mpeh njăr trong hăn tât klaih rlău ach o bah nuĭh ƀon lan, wa Y H’Xuân, nuĭh hŏ geh bơi 20 năm ƀư kruanh thôn, bí thư chi bộ thôn Kon H’Ring, an gĭt tay:

“Gâp way rgŏ jă kônh wa rdâk njêng ƀon lan mhe, rgâl nău rêh, nhih jay ân ƀư mpêr n’gar n’hanh srăch uĕh, gung trong ƀon ân tăm kao si gay ƀư uĕh an thôn ƀon. Gâp rgŏ jă kônh wa rgâl “nău mĭn, trong ƀư” ntlơi ăp nău kan wăng sa rluk mâl kơt ntơm nơh. Kăl e kônh wa ƀư lŏ du tơ̆ dơm, aƀaơ du năm bar tơ̆ tăm. Neh mir ri rgâl tơm tăm. Tâm mir jay n’hanh mir ba kônh wa ân tăm tơm jong nar geh rnoh khlay âk gay n’hao nău geh wăng sa. Tâm thôn aƀaơ hŏ rgâl dŭt âk, rơh kơn mom ndăm aƀaơ dŭt jăp gơih pah kan jan sa, tâm rlong ƀư wăng sa, âk rnăk rvăt năp ndeh honda, ndeh công nông, ndeh máy cày, mpăl kĭn cà phê, lĕ rngôch ăp rnăk rvăt năp ăp tŏng ndơ dŏng an nău kan ƀư mir ba”.

Nkoch mpeh bu ur Bí thư chi bộ Y H’Xuân, wa Lê Thị Kim Hiển – Kruanh Jrô kan Văn hóa Xã hội xã Đăk Tô, n’gor Quảng Ngãi, an gĭt, aơ lah nuĭh dŭt jăp gơih nti n’hanh ngăch ngăr đah nău kan. Wa Y H’Xuân lah ngoăy tâm dŭt đêt cán bộ nuĭh rnoi mpôl đê̆ ta ntŭk bol năm hŏ ranh yơn nha hôm gĭt dŏng mạng xã hội Zalo gay tâm ôp nău kan đŏng. Ăp trong leo kan bah xã an ƀư tât thôn Kon H’Ring dơi ƀư dơh ngăch da dê. Wa Lê Thị Kim Hiển, an gĭt:

‘’Yơ Y H’Xuân lah ngoăy tâm ăp nuĭh ntoh lư đah êng nơm tâm ban kơt tâm nsum mpôl đŏng. Mhe aơ thôn Kon H’Ring dơi Đại hội tâm rlong rŏng dak bah xã kơp dơn lah thôn geh âk nău rgop tâm trong leo ƀư hun hao wăng sa nkual ƀon lan rnoi mpôl đê̆ lvang năm 2020 – 2025. Êng săk yơ nơm dơi nkhôm rnê ta Đại hội, lah đảng viên ntĭt leo lor tĭng ƀư jăp pah kan nkoch trêng rgŏ jă ƀon lan hun hao wăng sa đŏng’’.

Ma nuih n’hâm dơn kan, nău ntĭt leo lor bah nuĭh đảng viên, wa Y H’Xuân hŏ jêng ntŭk nsing đah nuĭh Xơ Đăng ta Kon H’ring, rgop ntrŭt ntrôl hun hao wăng sa rêh jêng kon nuĭh, rgâl muh măt ƀon lan mhe, kơl nuĭh ƀon lan mbrơi geh nău rêh hơm răm .