Đah ăp trong hăn xă Đơn Dương, n’gor Lâm Đồng, , uĕh nđik ăp mir biăp, uĕh nđĭr ăp mĭr nkao dôl yan koh n’hanh ăp bâr gơm răm bah nuĭh ƀon lan. Đah rlău 8.400ha tơm tăm ăp ntil, tâm nĕ geh rlău 3.000ha biăp, nkao công nghệ mhe ndrel mpôl ndrôk dak toh bơi 19.000 mlâm... lĕ nsĭt tay nău rêh hơm răm an nuĭh ƀon lan nkual neh aơ. Wa Nguyễn Tiến Khánh, thôn 1, xă Đơn Dương, an gĭt, nău xă dơi jêng ăp trong khlay nkra njêng-tăch rgum đah ăp ndơ khlay, kơt dak toh rih, biăp bum play lĕ ntrôl lŏ mir nâp nâl n’hanh n’hao nău geh an nuĭh ƀon lan.

Xă Đơn Dương ndơn dĭng lĕ nsum bah nkuăl Đơn Dương bah năp đaơ, lơn lah Đơn Dương lah nkuăl bôk năp bah ăp n’gor Tây Nguyên tâm di mpeh thôn ƀon mhe, muh măt bah thôn ƀon hao rlău kăl e. Nău rêh bah nuĭh ƀon lan dơi hao, jay prêh dăp, ndeh ô tô kơt ntŭk bah gâp mô hôm rnăk ach o ma rlău 7% lah rnăk sâm geh.

Bah lơ 1/7 mhe rlău n’gor Lâm Đồng ntơm lăp lvang hun hao mhe đah nău geh, nău dơh ntoh lư n’hanh ntŭk ntô pơk hvi bah bri jŭr dak lêng. N’gor geh rnoh neh rlău 24.000km2 têh ngăn lam dak n’hanh têh jâng wăng sa dâk tal 8. Nău nglăp nsum 3 n’gor ntop tay an Lâm Đồng âk nău kan wăng sa leo bôk năp lam dak, kơt công nghiệp bô xít-alumin-nhôm đah geh bô xít rlău 5,4 rmen tấn; ndơ pâl nđaih âk đah moh êng pâl nđaih lam dak Đà Lạt, Công viên địa chất Đắk Nông geh trong pưh yôk ŭnh têh ngăn Đông Nam Á, n’glău Tà Đùng kơt “Vịnh Hạ Long ta Tây Nguyên”, pâl nđaih dak lêng đah Phan Thiết-Mũi Né, đặc khu Phú Quý; nkra njêng lŏ mir geh nkao, biăp, brai ndrŭng, ka dak nđik... lĕ bôk năp lam dak. Wa Nguyễn Hoài Bão, tă ƀư Bí thư N’gor ủy, Kruanh Mpôl đại biểu Quốc hội khóa 10 n’gor Lâm Đồng, nsing nơm.

Aƀaơ Lâm Đồng geh n’har bri, geh dak lêng, rnoh neh aƀaơ lah dâk bôk năp lam dak jêng nău geh dŭt têh. Lâm Đồng mhe geh nău wât mhe, trong uănh mhe n’hanh khlay lah lĕ rngôch ndrel nuih n’hâm. Nuĭh ƀon lan djăt ta Đảng đah nău mĭn bah nuĭh Việt Nam gay ƀư uĕh nău kan n’hanh mpŏng Việt Nam hăn ndrel đah ăp dak kơt Wa Hồ lĕ ntĭm.

N’gor Lâm Đồng dôl soih ntŭl kol đah âk ndơ nău nchrăp ƀư khlay mpeh ntung trong, sŏk joi khoáng sản, ŭnh nar, ndâk ƀư tay ntŭk gŭ... đah prăk âk rbăn rmen gay sŏk an ntuh kơl nsum jêng nuih n’hâm an jâng wăng sa ngăch hun hao.

Wa Y Thanh Hà Niê Kđăm, Ủy viên Trung ương Đảng, Bí thư N’gor ủy, Lâm Đồng, nkoch kloh:

Ntrôl hao jêng wăng sa tŏng ăp nău rƀŏng hao jêng năm 2025 bah n’gor Lâm Đồng geh rlău 8%. Đă nu nău ngăn aƀaơ nkre đăp mpăn uĕh nâp nău kan bah gưl nơm, nkre ntop kơl ngăch an gưl bah dâng. Nkre đăp mpăn tâm ntŭk nơm rdâk ƀư nkre đăp mpăn trong ƀư pơk dŏng mât uănh tĭng ntrong ƀư mhe, nkre ntrôl nta an joi ƀư nău geh âk bah n’gor yơn nkre mât ăp nău geh gay an lvang hun hao bah kơi.

Đảng bộ, n’gâng kan ƀon lan n’hanh nuĭh ƀon lan n’gor Lâm Đồng dôl mât uĕh tâm rnglăp, mĭn ƀư mhe, nsrôih ndâk njêng ƀon tơm nar lơ ndrŏng uĕh, tâm di đah nău nsing nơm n’hanh mpŏng kâp bah Đảng, Wa Hồ./.