Tâm jay nhih jêt bah ƀon Kép, nteh bah rpăi tanh ndrel ăp mpang ty blău tanh. Yuh Rơ Châm Suynh-du hê bah Rmôt kan ndrel cheh tanh ƀon Kép an gĭt, nuĭh Jarai way sŏk dak ônh, chăng, nglang ƀư tơm gay jêng păng nah tanh, yor rĭ rup gui tâm kho ao bah nuĭh Jarai dŭt âk năch pâl nđaih ŭch.

Nău kan cheh tanh mê̆ ntĭm an, bah nău kan gâp dơi ƀư geh dŭng, kho, ao, rlău ma nĕ aƀaơ nău kan cheh tanh hôm rhŏ an năch, năch uănh tay, kơt nê dơi mât nău kan way ơm n’hanh geh tay prăk gay rgâl nău rêh.

Đah kônh wa ƀon Kép, păng nah tanh mô knŭng lah ndơ, ma hôm nău nkoch mpeh văn hóa, mpeh nău ơm bah du rnoi nuĭh. Yuh Rơ Châm Háo, an gĭt:

Ƀư cheh tanh gay mô chuêl nău way ơm bah kăl e, tanh treo, dŭng, bok. rnôk năch pâl nđaih tât ƀư dŭng jêt, dŭng têh, bok n’hanh ăp ntil.

 Ăp păng nah tanh i ty dơi năch ŭch ngăn, yơn gay ndơ tât êp lơn đah ntŭk tăch, yuh H’Uyên Niê, 38 năm deh, nuĭh ntơm leo Rmôt kan ndrel cheh tanh ƀon Kép lĕ mĭn trong ƀư mhe: rgâl ăp păng nah tanh way ơm jêng ndơ tâm an jêt, khlay tâm di, ĕh đah năch pâl nđaih. Yuh H’Uyên an gĭt, gay nău kan mô knŭng rêh ma hôm hun hao nâp nâl, an rgâl trong gĭt tât ntŭk tăch:

Rnôk ăp nghệ nhân tanh geh ndơ ri khlay âk lơn, nău ŭch dŏng bah năch mô ŭch tât yor rĭ mpôl hên rgâl trong ƀư lah hun hao ăp ndơ jêng ndơ tâm an. Ntĭt nsa du păng nah dơi ka choh jêng dŭng, ƀap mô lah ăp ndơ njuăl tâm an, bah nĕ di nău ŭch bah năch tât ƀư ngăn nău kan cheh tanh ri mbra dơi rwăt ăp ndơ tâm di đah dŭng prăk bah năch.

Bah năm 2019, Rmôt tâm rgop cheh tanh hăn ndrel đah pâl nđaih ntŭk gŭ rêh ta ƀon Kép luh đah 15 nuĭh. Jêh rlău 5 năm, rnoh nuĭh lĕ hao âk, ăp nghệ nhân bah ƀon lĕ geh tay prăk bah ăp ndơ tăch an năch pâl nđaih. Rmôt kan ndrel hôm geh trong ƀư tâm pleh nghệ nhân râng ntĭm năch gay ăp nuĭh dơi ƀư, dơi geh. Yuh H’Uyên an gĭt:

Tâm ntrong ƀư pâl nđaih nsum mpôl, mpôl hên tâm pleh ăp nghệ nhân, mpôl hên nta an lĕ rngôch ăp nghệ nhân tâm ƀon gĭt tanh, kơl lor ăp nghệ nhân lah bu ur ach o, yor rnôk khân păng tât râng ntrong ƀư pâl nđaih nsum mpôl ri khân pơng mbra dơi geh prăk bah nơm geh, bah nĕ ăp nghệ nhân mbra geh nuih n’hâm n’hanh nău ŭch gay mât rbăy nău uĕh văn hóa bah nơm.

Âk năm aơ, du năm ƀon pâl nđaih ntŭk gŭ rêh Ia Ly wơt bah 4.000 tât 5.000 nuĭh năch tât uănh nsong, ƀư ngăn. Rnoh aơ bôl mô âk yơn nău mbơh dơi rhơn, an saơ trong hăn di tâm nău mât ndrăy nău uĕh văn hóa hăn ndrel đah hun hao pâl nđaih nâp nâl. Yor nău nĕ an nghệ nhân Rơ Châm Monh, bôl năm lĕ âk yơn hôm e geh nuih n’hâm ŭch đah cheh tanh.

Mpŏng rơh druh ndăm mât cheh tanh bah u che, bôl gĭt lah jêr yơn an nsrôih yor rnôk tanh nkre mât ndrăy nău uĕh văn hóa nkre geh tay prăk rnôk năch rwăt bok ao.

Wa Nguyễn Tiến Dũng, Kruanh UBND xă Ia Ly an gĭt, ntrong ƀư pâl nđaih nsum mpôl hăn ndrel đah nău kan cheh tanh ta ƀon Kép dôl jêng ntŭk uănh nsong bah ƀon lan.

Yuh H’Uyên geh nău ŭch ƀư pâl nđaih ntŭk gŭ rêh, nta geh nău kan ndơ sa an kônh wa. Rnôk năch dak bah dih geh nău ŭch ri yuh nĕ mbra tâm pă trong hăn, mô lah tăch ăp ndơ cheh tanh gay nta an nău kan an kônh wa ưăr nĕ. Tâm nău kan yuh H’Uyên dŭt gơih, lah cán bộ ban chuyên trách, lah kơt bah kơi aơ hôm e biến chế săch dŏng ri mbra biên chế săch dŏng gay đăp mpăn công chức bah jrô văn hóa xã hội gay nkre tâm ôp tâm nchră nău hun hao văn hóa pâl nđaih nsum mpôl n’hanh ăp nău mpeh văn hóa pâl nđaih an xă.

Bah ăp trong hăn bôk năp, yuh H’Uyên dôl nsrôih tâm rgop đah ăp công ty pâl nđaih, nkre joi trong pơk hvi ntŭk ntô gŭ âm nsum gay kônh wa geh ntŭk ntĭm nău kan, wơt năch, mpla nsơ ndơ. Yor đah yuh, du păng nah tanh lah du “nău mbơh văn hóa”, an dơi rêng hvi đah lĕ play nuih n’hanh bôk rngok bah nuĭh ƀư nău kan way ơm, Du njăr rse brai, du rup cheh ndrang mô knŭng nkoch mpeh lĕ rlău, ma hôm pơk luh trong hăn mhe, ntĭm trong bah pâl nđaih nsum mpôl hăn ndrel đah mât ndrăy văn hóa ta ntŭk./.