Ăp nar, nteh rpăi tanh lĕk kĕk tâm trôm jay nhih. Aơ lah ntŭk rgum rƀŭn nsum mpôl, lah ntŭk nkra njêng bah ăp oh yuh tâm Câu lạc bộ cheh tanh ƀon Kép 2, xă Ia ly (Gia Lai), nkre lah ntŭk mpla nsơ cheh tanh. Tât aơ tay, năch dơi uănh ăp cheh ndrang uĕh ta ao, nah mbân, dŭng cheng..., rlonh tanh ta rpăi si n’hanh săch rwăt ndơ nkah ndray uĕh Tây Nguyên. Yuh H’Uyên Niê-chủ nhiệm câu lạc bộ an gĭt, ƀon Kép 2 aƀaơ lah ntŭk uănh nsong tâm tour pâl nđaih nsum mpôl bah n’gor Gia Lai, n’hanh ndơ bah oh yuh lĕ geh ntŭk tăch đăp mpăn, jêng nkre răm yor mât ndrăy nău kan, nkre geh prăk nklăp 5 rkeh prăk/khay:

Rmôt kan bu ur mpôl hên rgâl trong ƀư, hun hao ăp ndơ cheh tanh jêng ndơ nkah ndray tâm an. Ntĭt nsa, păng nah tanh kơt aơ dơi ƀư jêng dŭng, ƀap, ao, blô bôi... tŏng ăp nău ŭch bah năch rnôk khân pơng ƀư ngăn. Nghệ nhân dơi dơn na nê̆ ndơ geh bah nơm, bah nĕ geh tay nuih, ŭch lơn gay mât ndrăy nău uĕh văn hóa.

Lah ta ƀon Kép 2, ăp păng nah cheh tanh dơi rgâl âk ntil jêng dŭng cheng, ao, blô bôi.. ri ta xă An Lão, n’gor Gia Lai, tơm quế ta ntŭk dôl dơi nkret jêng jêng âk ndơ. Duh nar dŭt yan mih nchrat ang, yuh Võ Minh Mơ dôl gơih uănh nđôi tĭng dông quế ih ta jâng gung, na nê̆ nchih tâm ndrôm samƀŭt, nchrăp samƀŭt nchăm ndơ. Nău kan aơ lĕ jêng bên đah yuh lôch bơi 2 năm bah năp, kơp bah rnôk ntrŭnh rdâk njêng nău kan bah tơm quế ta ntŭk.

Kơt dŏng ndơ geh ơm ta nkual An Lão, yuh Mơ mĭn ƀư mhe luh geh âk ndơ âk ntil kơt: Nụ quế, quế thanh, jrêng ƀô kah; cheh mli jêng ndơ sa... Ndơ lĕ geh kơp dơn OCOP 3 sao n’hanh dơi tăch na nao ta ăp ntŭk tăch điện tử. Yuh Mơ nsing nơm, lôch uĕh bôk năp aơ mbra kơl quế An Lão geh dơi hao ngai, nkre dơi joi nău rêh đăp mpăn an nuĭh tăm quế ta ntŭk:

An Lão lah ngoăy tâm âk xă ach o. Druh ndăm ta ntŭk ƀư ndơ bah nkual ndơ geh ơm, hun hao êng ma mô kâm nsing tâm ndơ ntop kơl êng. Rnôk ndơ̆ ndơ way ƀư hao, ndơ mbra hăn ngai lơn, joi nău rêh đăp mpăn lơn n’hanh wăng sa hun hao lơn. Aơ lah jâng tơm an kônh wa pơk hvi n’hanh mât nâp nkual quế. Nău ton rwăt ntŭk tăch lah nuih n’hâm an kônh wa mât nâp tay n’hanh tĭng hui.

Ta ƀon mon uk Vân Sơn, phường An Nhơn, n’gor Gia Lai, kiến trúc sư Đỗ Thanh Vân dôl joi trong rêh tay ƀon  nău kan way ơm đah nău hun hao ăp ndơ uk kơt dŏng ndâk njêng. Dơi ntĭm nti nău kan jru, geh 20 năm blău ơm ê nkra ndơ dŏng n’hanh djôt nău rŏng têh đah uk, yuh Vân lĕ mĭn ƀư mhe âk ntil gạch, păng ntă krêp uĕh đah uk Vân Sơn.

Yuh nsrôih djôt ndơ hăn nkoch ta ăp nău ƀư nău kan way ơm, mbrơi wăch rgum nău uănh tât bah năch tâm dak n’hanh dak bah dih. Tât aƀaơ, âk ntil gạch geh nău uĕh êng lĕ ntơm dơn geh ndơ nchăm, nta an nău kan an âk nghệ nhân ƀon uk Vân Sơn:

Gâp ntơm bah năm 2023. 2 năm bah năp, gâp hăn mpla nsơ ăp ntŭk, ntoh măt an n’gor hăn râng ăp festival uk. Ndơ aơ dơi âk nuĭh tơm ntuh kơl resort uănh tât, boăt nthoi gâp đah ăp kiến trúc sư dak bah dih gay ndơ̆ an ê nkra.

Wa Nguyễn Hữu Hà, Groi Giám đốc N’gâng kan Khoa học n’hanh Công nghệ n’gor Gia Lai an gĭt, n’gor kơl lor ntop kơl ăp nău nchrăp ƀư rdâk njêng nău kan mĭn ƀư mhe hăn ndrel đah ndơ way ơm, nkre nta an nău kan an nuĭh ƀon lan, nkre mât ndrăy nău khlay văn hóa ta ntŭk. Ăp năm, n’gâng kan mbơh ƀư âk nău kan gay ndâk njêng n’hanh hun hao tơm si gle ntŭk ntô aơ, bah tiăr nti, ndâk njêng rmôt mbơh ntĭm ta ntŭk, tât boăt nthoi đah ăp nuĭh ntuh kơl. Nău rƀŏng bah n’gor lah jêng nklăp 25 doanh nghiệp rgâl mhe mĭn ƀư mhe, tâm nĕ geh đêt ngăn 20% rnoh prăk lôch uĕh. Aƀaơ, n’gâng kan dôl jêh bôk nău rgop an tâm nchră ntop kơl tơm si gle ntŭk ntô rdâk njêng nău kan rgâl mhe mĭn ƀư mhe lvang 2026-2030, geh jêng trong nâp nâl gay ăp nău nchrăp ƀư luh ntŭk tăch têh.

Tâm rnoh ăp nău kan, mpôl hên n’gluh an nău ndâk njêng ntop kơl trong tơm si gle ntŭk ntô rdâk njêng nău kan bah n’gor Gia Lai geh nău rgâl mhe. N’gâng kan Chính trị mhe an ƀư Nghị quyết 68 mpeh ntop kơl doanh nghiệp ƀư êng. Aơ lah n’gâng tơm nău kơl gay mpôl hên ndâk njêng trong nchrăp tâm di, dơi an ntrôl trong tơm si gle ntŭk ntô rdâk njêng nău kan mĭn ƀư mhe bah n’gor tâm năm tât, kơl ăp băl rdâk njêng nău kan dơi tĭng tâm nĕ, ndâk njêng ndơ, ntrong ƀư tăch rgâl têh dăng, tâm rlong ta ntŭk tăch.

Rdâk njêng nău kan đah nău kan way ơm, đah trong ƀư mhe, kơl ndơ tâm di ntŭk tăch ma hôm mât nău khlay-nĕ lah trong âk nuĭh druh ndăm Gia Lai dôl nsrôih tĭng, nkre ƀư ndrŏng an săk nơm, nkre pơk luh trong hun hao nâp nâl an ăp ƀư ƀon nău kan  ƀon tơm.