Ta ăp dôr yôk, ăp mir play bung uĕh jêng rsuêl play, tĭng rơh sial bôk yan rlău, an saơ săk play năm aơ mât geh đăp mpăn. Nchroh mbơh rnoh năch pâl nđaih rơh 2/9 tât Khánh Hòa hao âk dôl pơk luh dơi tăch mô knŭng play bung ntô pŭt ma hôm âk ndơ lŏ mir êng bah nkual yôk ta ntŭk, nta an gay jêng ăp trong tâm rgop tâm khay tât. Wa Đoàn Văn Hưởng, Giám đốc Hợp tác xã nkra njêng lŏ mir Khánh Thành (xă Khánh Vĩnh, n’gor Khánh Hòa) nkoch:

Năm aơ, bah bôk yan tât aƀaơ, trôk nar uănh nsum dŭt uĕh. Mih rĭng jêng nău mât chăm tơm tăm dŭt dơh. Tết năm aơ, aƀaơ dôl tâm lvang mât chăm, uănh nsum tơm dŭt uĕh. Lễ hội mpla nsơ ndơ ƀon lan, lơn lah play bung, geh di rnôk. Nchrăp nar 2/9, hợp tác xã hôm e tŏng ndơ gay pă an ntŭk tăch.

Play bung ntô pŭt Khánh Vĩnh aƀaơ mô knŭng tăch ta chợ bôk năp ma hôm dơi ăp doanh nghiệp dŏng ƀư ndơ nkra njêng dak si play bung, ntô play bung nđik. Ăp doanh nghiệp uănh lah, aơ nău dơh gay ntơm ndơ̆ ntil play aơ jêng ndơ OCOP geh êng bah nkual yôk. Wa Nguyễn Thị Ngân, Giám đốc Công ty tăch n’gluh play n’hanh ndơ lŏ mir Ngân Nguyễn an gĭt:

Rnôk ăp ndơ geh tâm di OCOP, jêng lah tĭng trong ndơ kloh uĕh, hữu cơ, ri ăp doanh nghiệp n’hanh ntŭk tăch rgâl ntơm joi tât ndơ kloh uĕh n’hanh geh khlay tu tơm gay dơi tâm rgop jŏ jong. Ntĭt nsa kơt ăp ndơ vệ tinh bah play bung kơt dak si play bung, ntô play bung nđik, mô lah dŏng an gâm chè dôl dơi uănh tât.

Tâm rnôk n’gor Khánh Hòa pơk hvi ntŭk ntô hun hao rnôk rgum nsum đah n’gor Ninh Thuận, ăp ndơ ntĭt mpơl nkual yôk geh tay dơi boăt nthoi ntŭk tăch, ngăn lah hăn ndrel đah nău ƀư lê, hội, pâl nđaih âk. Dŭt âk năch rnôk tât đah Nam Trung bộ lĕ uănh tât ăp ndơ play kah, uănh aơ lah du gưl tâm trong hăn ƀư ngăn văn hóa ta ntŭk. Tiến sĩ Đặng Quý Nhân, Văn phòng điều phối Ƀon lan mhe Trung ương, N’gâng kan tuch tăm mât rong n’hanh Ntŭk ntô gŭ âm an lah:

Ăp ntŭk an mât nău geh đah ăp ndơ ntĭt mpơl bah nơm. Ŭch hun hao đăp mpăn ri an geh nău kơl ndâk njêng nkual tăm nâp nâl, geh tu tơm nkra njêng na nê̆ n’hanh geh trong ntĭm ntŭk tăch. Rnôk nĕ, ăp doanh nghiệp n’hanh hợp tác xã mbra nchrăp lor geh ndơ jŏ jong, hao khlay n’hanh hao nău geh an kônh wa ƀon lan. Nău tâm rgop ăp ndơ OCOP gay pă an năch pâl nđaih tât ta ntŭk dŭt ŭch dơi uănh khlay.

Năm bah năp, knơm Bôk nău kan rƀŏng tĭng lam dak ntuh kơl hun hao wăng sa-rêh jêng nkual rnoi mpôl đêt n’hanh nkual yôk, n’gor Khánh Hòa lĕ jêng du đêt hợp tác xã ntuh kơl jay nkret njêng, ntŭk mât prăp, ntĭm dăn nchih săk nkual tăm, ntơm jêh trong nkra njêng. Du đêt ntrong ƀư ngăn ndơ̆ năch pâl nđaih tât mir ƀư ngăn n’hanh rwăt ndơ lŏ mir ta ntŭk lĕ nsĭt tay săk rnglăy uĕh. Wa Nguyễn Ngọc Sơn, Groi Giám đốc N’gâng kan Rnoi nuĭh n’hanh nchroh rƀŭn n’gor Khánh Hòa an gĭt:

Aƀaơ, ta nkual yôk n’gor Khánh Hòa, kônh wa lĕ ntơm rgâl bah ntrong ƀư tuch tăm way ơm an kơt dŏng khoa học-công nghệ gay hao săk geh tơm tăm, mpa rong. Yơn lah, he an nsrôih ƀư tiăr nti, ntĭm an nuĭh ƀon lan wât kloh m’hâm lah ntơm rdưêng njêng nău kan, ntơm tăch rgâl, mĭn ƀư mhe. Rnôk gĭt kloh dơi ăp nău lah nĕ ri khân pơng mư dơi jêng nău mĭn n’hanh hun hao ăp ntrong ƀư bah kơi aơ.

Kơt nĕ, lah dơi rgâl bah nău mĭn nkra njêng jêt chrai an nău mĭn ƀư ndoh ndơ hăn ndrel đah ntŭk tăch, ndơ lŏ mir OCOP nkual yôk Khánh Hòa lĕ rngôch dơi jêng n’hâm soan hun hao nâp nâl tâm lvang pơk hvi ntŭk ntô hun hao n’hanh rdâk njêng pâl nđaih aƀaơ.