N’gor Quảng Ngãi, me neh geh âk nău way ơm cách mạng tă lah ntŭk têl nkah nău dơi n’gloh lam tâm 2 rơh tâm lơh. Rlău n’gul rach năm aơ hŏ rlău, ntơm bah ntŭk gŭ nde cách mạng ta Ba Tơ tât ntŭk tâm lơh krit nji Vạn Tường, nkual neh dăng janh nê aƀaơ hŏ mpơl chrat nău rêh mhe.

Gŭ ta mpeh bah dâng nhâp nar n’gor Quảng Ngãi, nkuâl Ba Tơ ơm (aƀaơ lah ăp xã: Ba Tơ, Ba Vinh, Ba Động, Đặng Thùy Trâm, Ba Tô, Ba Lế, Ba Dinh, Xã Ba Ngạc) tă bah ntŭk tơm luh bah rơh dâk lơh Ba Tơ năm 1945 – nar khlay nê ntơm pơk an trong  leo cách mạng lam dak. Nkual neh krit jêr, mô ăp tŏng âk ntil aƀaơ dôl nsoh ta săk he săk ntô mhe. Ta xã Ba Tơ, ăp njăr trong bê tông nkuăch nkue lăp tâm thôn ƀon, nhih nti têh hvi, nhih dak si way chrang ŭnh đèn rhŏ dŏng an nuĭh ƀon lan.

Nuĭh Hrê ta xã Ba Tơ hŏ gĭt mât dŏng nău geh bah bri – mir – ndrung n’gar, tăm keo, tơm dak si, mât ndrôk, sŭr, be ta ntŭk. Ăp trong leo tăm tơm dak si ta nâm n’hâm bri, nkre đah nkret njêng, bôk năp nsĭt tay tơm geh wăng sa đăp mpăn. Bôk nău  kan rdâk njêng ƀon lan mhe kơl rnoh rnăk ach o ta Ba Tơ hŭch ngăch. Nău rêh nuih n’hâm âk mpưm lơn rnôk ăp lễ hội way ơm dơi rdâk tay, mât nâp.

Wa Phạm Thanh Nghìn, gŭ ta thôn Bắc Hoàn Đồn, xã Ba Tơ, n’gor Quảng Ngãi an gĭt, ăp năm lôch rklaih luh, nău rdâk njêng nkuâl Ba Tơ nklang yôk bri mâp dŭt âk jêr jŏt. Nuĭh ƀon  lan nsan hao tuch tăm, ntơm bah nău gĭt ƀư sa êng an nơm, ƀon lan mbrơi mbrơi tât đah nău rgâl mhe kỹ thuật:

“Lĕ rngôch nuĭh ƀon lan ta Ba Tơ ƀư nău kan tuch tăm mât rong. Aƀaơ, nsing ta nău rgâl mhe trong mât chăm tơm tăm, Ngih dak ntuh kơl kỹ thuật mpeh tuch tăm jêng hŏ đăp mpăn. Tâm let năp tay, mpôl hên dŭt mpŏng tâm rơh druh ndăm mbra mbăk anh n’gâng kan cách mạng dja n’hanh ndơ̆ nău rêh nuĭh ƀon lan nar lơn ma hun hao uĕh lơn”.

 Tât aƀaơ, wăng sa xã Ba Tơ rĭng hao rlău 9%/năm; Rĭng geh tĭng bôk nuĭh geh rlău 44 rkeh prăk/năm. Lĕ rngôch ƀon lan, n’glah trong ƀon dơi tuh bê tông; internet, điện nkrum lam da dê. Rnoh âk rnăk ach o hŭch ngăch, nchrăp tât kêng dŭt năm 2025 dơn hôm nklăp 4%. Ăp rnoh nê lah ndơ an saơ ngăn an nău sĭt jêng tay bah nkual neh tă dŭt krit nji tâm lơh tâm su.

Wa Đinh Trọng Thành, Kruanh UBND xã Ba Tơ, n’gor Quảng Ngãi an gĭt, n’gâng kan ta ntŭk dôl nsrôih ntuh kơl ndơ dŏng, tŏng  di đah nău ŭch geh ndơ gŭ rêh ƀon lan:

“Ntơm nơh, nuĭh ƀon  lan ta Ba Tơ lơn âk rgum tâm hun hao tuch tăm mât rong. Yơn lah, lôch rnôk n’glăp nsum n’gor Quảng Ngãi n’hanh Kon Tum, njok tĭng njăr trong Quốc lộ 24 n’hanh nchrăp mbra pơk trong cao tốc Quảng Ngãi - Kon Tum hăn rlău, xã mbra ntrŏng trong rƀŏng hun hao pâl nđaih, tâm nê geh pâl nđaih măng. Mpôl hên mbra mĭn tât hun hao tuch tăm jŏ jong, mô nchuăt tĭng tăm tơm keo âk đŏng ôh”.

 Lah Ba Tơ lah ndơ ntĭt tâm ntŭk gŭ nde lơh Nhật ri nkual neh Vạn Tường (ăp xã Bình Thuận, Bình Đông, Bình Trị, Bình Hải, Bình Hòa n’hanh Bình Phước, nkuâl Bình Sơn ơm) hôm nkre đah rơh ntơm pơk trong lơh “Tâm lơh êng tĭng ntŭk) bah Mỹ năm 1965 đŏng. Nkual neh dja tă geh bom ndrak rlơk xơr aƀaơ hŏ jêng ntŭk rgum kan công nghiệp – rhŏ dŏng khuh n’gôr ta miền Trung.

Ta nkual neh choih n’glang Vạn Tường, Nkual wăng sa Dung Quất jêng nkual Nhih máy trih dak pring lor bôk năp bah lam dak n’hanh âk trong nchrăp kan công nghiệp têh. Hang rmưn nuĭh kan geh nău kan  đăp mpăn, nsĭt geh mbơm oi. Âk nuĭh druh ndăm mô kâp hăn joi nău rêh bri bu tu rbư ngai ngât. Bah meng công nghiệp, xã Vạn Tường hôm lhung jong tât dak lêng. Ƀon lan lơh joi ka rvăt năp duk mpan têh, hăn ngai nklang dak lêng, ăp trong hăn jŭr dak lêng uĕh hang rhiăng rkeh prăk. Ƀon seng jal ach o ntơm nơh aƀaơ hŏ n’gôr gră nău nteh máy duk mpan, âk mblâm jay têh hvi srêt srêt nsum. Ăp ntŭk têl ơm kăl e kơt ntŭk têl ơm Sơn Mỹ, trong rŭ nâm neh Đàm Quang Trung, kơh dak lêng Vạn Tường jêng ntŭk tât pâl nđaih, nkre ntĭm nti nău way ơm, nkre nta joi geh trong rêh ntil mhe. Ta nkual neh tă têl nkah lơh dơi Vạn Tường krit nji, nar aơ hŏ chrat ang đah Nkual wăng sa Dung Quất. ăp nhih máy, xí nghiệp kan ndăng măng nar, njêng suan rêh công nghiệp dŭt khuh n’gôr miền Trung.

Wa U Huấn, Groi Bí thư Rnâng kan Tỉnh ủy Quảng Ngãi an gĭt:

“Ntik n’hao nău way ơm cách mạng n’hanh nuih n’hâm lơh dơi Vạn Tường, he mbra mât nâp mpôl tâm rnglăp, nsing nơm tâm nău rđău kan bah Đảng, nsĭt geh âk nău dơi tay ta ăp trong kan, tĭng ƀư geh nău dơi ăp bôk nău kan wăng sa- rêh jêng kon nuĭh bah n’gor; ndăn ntêr dŏng lĕ ăp săk geh n’hanh dơh uĕh gay hun hao wăng sa ngăch ndăn lơn đŏng tĭng trong rƀŏng hun hao âk công nghiệp n’hanh rdâk njêng, lơn lah wăch rgum tay ntuh kơl ta Nkual wăng sa Dung Quất; ntrôl ngăch trong leo ƀư "Rdâk njêng thôn ƀon mhe", wat jêh tay buăt nthoi ntung trong ndơ dŏng; tĭng ƀư geh nău tam n’hŭch ach o n’hanh nta joi nău kan, mô rlu n’hao nău rêh drăp ndơ n’hanh nuih n’hâm an ƀon lan”.

 Đah nău way ơm cách mạng n’hanh ăp nău dơi geh nar aơ, n’gor Quảng Ngãi dôl nsan hao rdâk njêng ƀon tơm nar lơn ma ndrŏng uĕh./.