Ta xă Gào, n’gor Gia Lai nar aơ, mô knŭng lah ăp dôr yôk cà phê lir lar, ăp mir sầu riêng, mắc ca uĕh nđĭr bah kônh wa ƀon lan tâm xă tăm êng, ma hôm geh âk ntrong ƀư lŏ mir công nghệ mhe. Ntoh lư lah ntrong tăm chanh rse tâm jay bil bah Hợp tác xã Lŏ mir kơt dŏng công nghệ mhe 360. Hợp tác xã lĕ janh ntuh kơl rlău 1 ha jay bil nkum lĕ, kơt dŏng công nghệ dak bah dih, ndơ̆ chanh rse lăp mât chăm tĭng trong hữu cơ. Ta aơ, ndơ geh âk rĭng 12 play/kg, rnoh ndơ rlău 10 tấn play du ha. Lĕ rngôch rnoh ndơ chanh rse aƀaơ lĕ dơi du doanh nghiệp ta TP.HCM ton rwăt gay tăch n’gluh an ăp ntŭk rwăt jêr nuih kơt Hà Lan, Thụy Sĩ... đah rnoh tăch rlău 50 rbăn prăk/kg, âk lơn nkôp đah ntŭk rwăt tâm dak. Yuh Lê Thị Bảo Trâm, Giám đốc Hợp tác xã, nkoch:

Bah năp đaơ mpôl hên mô geh moh ndơ mpeh lŏ mir công nghệ mhe ôh. Bah kơi aơ, yor ŭch ƀư ndơ uĕh kah âk jêng mpôl hên mĭn joi, ndơ̆ ta aơ, mĭn njêng, mbơh ƀư mbrơi mbrơi. Ndơ tĭng trong hữu cơ, mô geh dak si tu ndrŭng tơm tăm, đăp mpăn an nuĭh dŏng n’hanh n’ăp nuĭh nkra njêng mô geh khuch. Yor rĭ, rnôk hợp tác xã dơi ƀư mir kơt aơ ri geh nău dơh lơn rnôk tâm rlong.

Bah năm 2018 tât aƀaơ, xă Gào lĕ rgŏ jă soan dăng lĕ ƀon lan ndrel âk tơm prăk gay hun hao ntung trong n’hanh wăng sa-rêh jêng. Tât aơ tay, 100% trong hăn tâm thôn, tâm xă lĕ dơi rgâl chai, bê tông; 70% trong me tâm lŏ mir dơi rgâl nâp dăng. Rnoh nuĭh pah kan ƀa ƀơ geh nău kan geh rlău 91%. Geh prăk rĭng bôk nuĭh năm 2024 geh 70 rkeh prăk. Rnoh rnăk ach o hŭch âk, knŭng hôm nklăp 2,8%. Wa Nguyễn Văn Ánh, Bí thư Chi bộ nkre ƀư Kruanh thôn 5, xă Gào an gĭt, aƀaơ nuĭh ƀon lan lĕ geh âk n’gâng tơm kỹ thuật nâp nâl gay nsing nơm hun hao wăng sa:

Băng: Tâm trong tăm tay cà phê, kônh wa ƀư ntil mhe da dê. Kônh wa geh trong mât chăm, nsĭt tay săk rnglăy âk. Rĭng du ha geh 4 tấn cà phê rlăi/ha. Mô lah 20 tấn rih/ha. Tâm ban nĕ lah rnoh neh sầu riêng, mắc ca n’hanh tơm tăm êng.

Năm 2025, rnôk ƀư tĭng nău ntrŭnh nglăp nsum đah ăp xă Ia Kênh, Ia Pếch, xă Gào mhe geh rnoh neh 183km2, rnoh nuĭh bơi 16.000 nuĭh, đah neh tuch tăm lŏ mir pơk hvi hao bơi 7.800ha. Aơ lah n’gâng tơm khlay gay dăp rgum nkual nkra njêng rgum, hun hao lŏ mir công nghệ mhe. Ta xă aƀaơ geh 2 nău nchrăp ƀư dôl dơi kuăl jă ntuh kơl. Nĕ lah: Nău nchrăp ƀư tăm, nkret njêng n’hanh tăch n’gluh biăp, bum, play công nghệ mhe ta thôn 6 (55ha) n’hanh nău nchrăp ƀư ntŭk nkra njêng grăp ntil, biăp kloh uĕh ta ƀon B (30ha). Ăp nău nchrăp ƀư mpŏng jêng grăp rlăi wăch rgum doanh nghiệp, kơl ƀon lan gĭt tât kỹ thuật mhe, râng trong tâm pă manh ndơ lŏ mir kloh uĕh, rhŏ an tâm dak n’hanh tăch n’gluh.

Tâm Đại hội Đại biểu Đảng bộ xă Gào mhe rlău, xă lĕ n’gluh an nău rƀŏng geh ngăch hao jêng lvang 2026-2030 bah 8,2% let lơ; nuĭh ƀon lan râng bảo hiểm y tế geh 95%; lĕ rngôch ƀon lan dŏng dak kloh uĕh... Wa Nguyễn Hữu Sung, Bí thư Đảng ủy, Kruanh HĐND xă Gào, an gĭt:

Băng: Tâm năm tât, Đảng bộ xă Gào mbra rgum mbơh ƀư tĭng nău dơi Nghị quyết Đại hội rơh bôk năp, năm kan 2025-2030 n’gluh an. Tâm nĕ, nău rhŏ tăch rgâl, lŏ mir công nghệ mhe, nkre mbơh ƀư bôk nău kan n’hŭch ach o nâp nâl đah dŭt n’hâm âk.

Bah ntŭk nsing nơm cách mạng nâp nâl tât du nkual ƀon tơm dôl hao soan rêh mhe, xă Gào lĕ mĭn lah nuih n’hâm hao têh dăng. Ăp mir tơm tăm rklê play, ndrel ntrong ƀư lŏ mir công nghệ mhe, an saơ na nê̆ an nău rgâl tĭng nar. Nău way ơm janh dăng n’hanh mpŏng ŭch hun hao mbra kơl n’gâng kan ƀon lan n’hanh nuĭh ƀon lan xă Gào ndâk njêng tay nău rêh ndrŏng uĕh, nâp nâl an ƀon tơm.