Đah rlău 10 rmen prăk bah tơm prăk bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt, xă nkual 3 Ea Hiu, nkuăl Krông Pắk, n’gor Dak Lak lĕ tuh bê tông 9 trong hăn thôn ƀon đah dĭng lĕ jong 5,4km. Nău nkra, pơk hvi ăp trong hăn mô knŭng rhŏ uĕh lơn tâm nău hăn nsong, rdêng ndoh ndơ lŏ mir ma hôm rgop boăt nthoi trong đah ăp thôn, ƀon. Wa H’Ninh Êban, nuĭh ƀon lan ta xă Ea Hiu an gĭt:

Ta năp đaơ trong hăn jêr jŏt, geh trong aơ he dŭt rhơn, oh kon hăn nti, hăn nsong dơh lơn n’hanh lăp yan rek ba aơ ƀon lan rdêng ba mô lah rdêng ndơ lŏ mir uĕh lơn.
 

Nău ƀư trong hăn bah Quốc lộ 27 tât n’glău Buôn Biếp, xă Yang Tao, nkuăl Lắk, n’gor Dak Lak dơi ntuh kơl bah tơm prăk bah Bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt. Ndơ ƀư geh jong bơi 3 km lăp tâm dak leng Bìm Bịp, ngoăy tâm âk ntŭk ntoh lư bah nkuăl Lắk. Trong hăn dơi jêh năm 2023. Wa Y Mra Liêng, nuĭh ƀon lan tâm xă an gĭt, bah rnôk trong jêh ăp ndeh rklư dơi lăp tât dak leng, dơh hăn nsong jêng rnoh năch tât dak leng hao âk nkôp đah bah năp, rgop an hun hao wăng sa bah ƀon lan.

Dơi geh trong he hăn nsong dơh. Ƀon lan bah he rgâl uĕh kơt aơ, gâp dŭt rhơn.

Bah năm 2022 tât aƀaơ, đah tơm prăk bah Bôk nău kan rƀŏng tĭng lam dak hun hao wăng sa-rêh jêng nkual ƀon lan rnoi mpôl đêt, nkuăl Lắk, n’gor Dak Lak lĕ ndâk ƀư n’hanh nkra 37 nău ƀư ntung trong rhŏ an nkra njêng, nău rêh tâm nkual rnoi mpôl đêt, đah dĭng lĕ prăk rlău 75 rmen. Ăp ndơ ƀư lĕ ntơm jêh ê nkra ntung trong, nta nơih an joi ăp ndơ geh bah nkuăl tâm hun hao lŏ mir n’hanh pâl nđaih. Wa Nguyễn Anh Tú, Groi Kruanh UBND nkuăl Lắk, n’gor Dak Lak mĭn lah:

Trong hăn dơh rgop ndoh ndơ dơi hăn. Tal 2 lah n’hŭch oi prăk rdêng. Kơt nĕ săk rnglăy bah ntuh kơl ntung trong di nsĭt tay prăk. Mpeh ntŭk ntô kloh uĕh, aih rblăng lơn.

Bôk nău kan rƀŏng tĭng lam dak hun hao wăng sa-rêh jêng nkual rnoi mpôl đêt n’hanh nkual yôk lĕ rgop n’hao uĕh nău rêh nkual rnoi mpôl đêt n’hanh nkual yôk n’gor Dak Lak. Năm 2023, rnăk ach o rnoi mpôl đêt n’hŭch bah 26,7% jŭr hôm 19,7%, hŭch 7% nkôp đah năm 2021. Lơn lah, ăp ndơ ƀư ntung trong dơi ntuh kơl ta nkual rnoi mpôl đêt, nkual dŭt jêr jŏt ta n’gor dôl nta an nuĭh ƀon lan hun hao wăng sa, rêh jêng, rgop ƀư tĭng nău rƀŏng n’hŭch ach o tâm nkual rnoi mpôl đêt bah 3% tât 4%/năm.

Bôk khay 8 mhe rlău, ta nkual ƀon têh Buôn Ma Thuột, n’gor Dak Lak, Ban ntĭm rđău Trung ương ăp bôk nău rƀŏng tĭng lam dak ƀư rƀŭn nchră trực tuyến đah ăp n’gor Tây Nguyên mpeh nu nău mbơh ƀư ăp bôk nău kan rƀŏng tĭng lam dak, mĭn lah: Tơm prăk trung ương năm 2024 ntop kơl ƀư tĭng 3 bôk nău kan rƀŏng tĭng lam dak (Bôk nău kan hun hao wa-rêh jêng nkual rnoi mpôl đêt n’hanh nkual yôk; Bôk nău kan n’hŭch ach o nâp nâl n’hanh Bôk nău kan ndâk njêng thôn ƀon mhe) nkual Tây Nguyên lah rlău 5.500 rmen prăk. Tât aƀaơ, nkual Tây Nguyên nklăp 373 xă geh an kơp dơn tâm di thôn ƀon mhe. Groi Thủ tướng Trần Lưu Quang lah rjăp, gay mbơh ƀư săk rnglăy ăp bôk nău kan rƀŏng tĭng lam dak, ăp n’gor an uănh nĕ lah du nău kan uĕh, kơl an nuĭh ƀon lan ăp nkual jêr jŏt geh nău rêh uĕh lơn jêng an ƀư dŭt n’hâm, nsrôih dŭt n’hâm lơn tay tâm năm tât. Groi Thủ tướng đă ăp ntŭk an nti ndrel, moh ntŭk mô hŏ dơi ƀư ri an nti ăp ntŭk ƀư uĕh gay ndrel ƀư dơi nău kan lĕ jao.

Đă ăp đồng chí ƀư, ƀư dâl ăp nău dơi ƀư. Prăk aơ đah 5 n’gor Tây Nguyên mô geh âk tâm ban prăk ntuh kơl nsum, yơn pơng dŭt khlay yor pơng lăp tĭng ƀon lan. Ăp đồng chí 1 rbăn nău jêr, djôt dơn lĕ, yơn mpeh đah ăp đồng chí ri moh nuĭh nău kan aơ? Ntĭt rlău khay 9 ăp đồng chí mô dơi ƀư knŭng geh trong kiểm điểm n’hanh lah năm kan bah kơi pă prăk an ăp ntŭk bôl tĭng uănh lah uĕh mbơh ƀư 3 bôk nău aơ bah năm kan aơ mpôl hên mbra jao âk ndoh ndơ lơn an ăp nuĭh gĭt ƀư n’hanh ƀư blău.