Nô Rcom Vu, ƀon Ia Rniu, xă Ia Broái, nkuăl Ia Pa dôl mô ru mât chăm mir mbo hvi 1 ha, Rcom Vu an gĭt, aơ lah yan tăm mbo tal 3 tâm năm, kơl rnăk wâl geh prăk 80 rkeh jêh rnôk nkŭp prăk dŏng.

Đah kỹ thuật tuch tăm mhe, kônh wa tăm mbo geh âk nău dơh, bah kỹ thuật ƀư neh, tât dĭng dak ntruh gay nchrăp dak tŏ, nău kan aƀaơ dơh lơn nkôp đah bah năp đaơ. Du gâl lôch uĕh bah ntrong kan tăm aơ du gâl knơm yuh K’Pă H’Yư, cán bộ rmôt bu ur xă ntĭm dŭt n’hâm rnăk wâl n’hanh kônh wa tâm ƀon bah âk nar bôk năp.

Wa Rcom Tiêu-Kruanh thôn Ia Rniu rhơn an gĭt: Knơm kơt dŏng di trong kỹ thuật, du ha mbo sinh khối dơi 35 tấn tât 40 tấn. Bah nău rgâl trong tăm mhe, thôn Ea Rniu lĕ hŭch ngăch rnoh rnăk ach o, aƀaơ knŭng hôm 73 rnăk.

 Bah năp đaơ tăm mbo 1 năm du yan dơm, yơn bah rnôk kơt dŏng ntrong ƀư sinh khối ri 1 năm kônh wa tăm bah 3-4 yan, mpeh rmôt bu ur lĕ rƀŭn oh yuh nkoch trêng nău kơt dŏng ntrong kan tăm mbo sinh khối, trong ƀư dơi mbơh rblang tĭng âk trong êng êng, bah kỹ thuật tŏ ntruh, nău cheh phân, puh dak si dơi ăp rmôt nuĭh gĭt tât, bah rnôk kơt dŏng ntrong ƀư aơ săk geh dơi hao na nê̆.

Nău kơl kônh wa rnoi nuĭh Jarai rgâl tơm tăm, kơt dŏng khoa học an tuch tăm geh soan âk bah yuh Kpă H’Yư, Kruanh Rmôt Liên hiệp bu ur xă Ia Broái. Yuh lĕ dŭt n’hâm tâm ôp tâm nchră đah gưl ủy, n’gâng kan ƀon lan mbơh ƀư âk ntrong kan hun hao wăng sa săk rnglăy tâm nkual rnoi mpôl đêt. Yuh Kpă H’Yư, nkoch:

Săk gâp way ntrŭt nsôr đŏng oh yuh, ăp nuĭh an ntơm rgâl nău mĭn trong ƀư; an kơt dŏng khoa học kỹ thuật, kơt bah năp đaơ tăm an kâp dak mih, yơn aƀaơ he tŏ dak ntruh, dŏng phân poh, dak si tu ndrŭng gay nsĭt tay săk rnglăy nkra njêng lŏ mir, aƀaơ âk oh yuh lĕ rgâl nău mĭn trong ƀư n’hanh gĭt kơt dŏng khoa học kỹ thuật tâm nkra njêng lŏ mir.

Tĭng wa Vương Chí Thông, Groi Bí thư Đảng ủy xă Ia Broái, đah nău nsrôih mô rlu bah ăp cán bộ dŭt n’hâm kơt yuh H’Yư, trong kan n’hŭch acho ta xă dơi geh âk săk rnglăy tâm di.

Ntrong leo đồng chí Kruanh Rmôt Liên hiệp bu ur xă dŭt uĕh, gơih nđơr tâm nău nkoch trêng rgŏ jă kônh wa tâm trong kan n’hŭch ach o, kônh wa djăt, tĭng, rgop kơl an trong kan n’hŭch ach o bah xă dơh lơn. Đồng chí lĕ dơi Trung ương Hội Liên hiệp bu ur rnê nkhôm tâm nău rgŏ jă nkoch trêng kônh wa, tâm ƀon, thôn kiău ma. Đồng chí geh nău blău, tâm trong kan rgŏ jă nkoch trêng đồng chí ƀư dŭt uĕh.

Đah âk nău uĕh tâm trong kan rmôt kan n’hanh ntrong leo bu ur, năm 2023, yuh Kpă H’Yư lĕ lap dơi Trung ương Hội Liên hiệp bu ur Việt Nam an bằng khen. Yơn lah, đah yuh, ndơ nkhôm têh ngăn lah nău nsing nơm, ŭch rŏng bah kônh wa n’hanh ăp nău rgâl uĕh tâm nău rêh bah nuĭh ƀon lan ta ntŭk./.