Mô hôm rvê, klach đă kon sau ndơ̆ wơt rnôk tât rơh sŏk prăk khay rlu ranh, mô lah mkra nău kơl bảo hiểm, wa Nguyễn Văn Minh ta xă Ea Ning, nkuăl Cư Kuin, n’gor Dak Lak aƀaơ dơi nơm uănh nđôi êng nu nău tài khoản ngân hàng n’hanh nău kơl an cán bộ rlu ranh ta tài khoản điện tử lĕ dăn đah ngân hàng n’hanh bảo hiểm xã hội n’gor Wa Nguyễn Văn Minh an gĭt, bah rnôk dơi ăp nuĭh tâm rmôt công nghệ mrô ntŭk gŭ rêh bah xă ntop kơl nglăp n’hanh ntĭm dŏng ăp ndơ kơt dong aơ wa saơ dŭt dơh.

Mô hôm hăn tay mô lah ăp nar he mô ru way dăn sam ƀŭt đă jao nuĭh êng kâp sŏk prăk. Bah nar geh nău ntrŭnh nĕ, tât nar khân pơng njuăl prăk. Mpôl hên dŏng kơt aơ bên hôm mô hăn rhoăt prăk măt tay ma sŏk mã QR dŭt dơh.

Mô knŭng hăn tĭng trong, gô̆ tĭng jay ăp rmôt công nghệ mrô ntŭk gŭ rêh ta xă Ea Ning, nkuăl Cư Kuin, n’gor Dak lak hôm tâm pă nuĭh kâp ta ntŭk du mpông ta UBND xă gay ntop kơl, ntĭm nuĭh ƀon lan. Đah nău dŭt n’hâm, lĕ đah nău kan ntop kơl bah ăp rmôt công nghệ mrô ntŭk gŭ rêh, nar lơ âk nuĭh ƀon lan Dak Lak lĕ gĭt tât, dŏng blău ăp ứng dụng mrô rhŏ an ăp nău ŭch khlay kơt: dak si, ntĭm nti, nău kơl rêh jêng tă bah ăp n’gâng tơm mrô, râng ntŭk tăch rgâl điện tử. Wa Nguyễn Văn Mạnh nuĭh rmôt rgâl mrô ntŭk gŭ rêh, xă Ea Ning, nkuăl Cư Kuin an gĭt:

Ăp nuĭh n’gâng tơm bah ăp rmôt rgâl mrô ntŭk gŭ rêh, mât uĕh ƀư tơm hăn lor, ŭch êng bah rmôt lĕ ndrel ty ntĭm nuĭh ƀon lan ăp ntŭk gŭ rêh, ta ntŭk ƀon lan gŭ. Tă bah nĕ mât uĕh nar lơ săk rnglăy rgâl mrô ta ăp ntŭk.

Tĭng wa Nguyễn Tuấn Hà, Groi Kruanh rnâng kan UBND n’gor Dak Lak, tât aƀaơ lam n’gor lĕ ndâk njêng geh bơi 2.000 rmôt công nghệ mrô ntŭk gŭ rêh ta ăp thôn, ƀon, tổ dân phố đah 11.700 nuĭh. Aơ dơi uănh lah “ăp n’ging ty nthoi jong” bah mpôl ntĭm rđău rgâl mrô ăp gưl ƀư n’gâng tơm ndơ̆ công nghệ mrô, nău blău mrô tât đah nuĭh ƀon lan.

Rmôt ntŭk gŭ rêh aơ geh dŭt âk tâm nĕ geh rmôt n’gâng tơm lah n’gâng kan ƀon lan, ăp ntŭk kan doanh nghiệp râng tâm rnôk rgâl mrô. Dak Lak nsrôih ƀư tĭng gưl, ƀư ƀa ƀơ, ƀư dŭt n’hâm ntơm tât nuĭh ƀon lan.

Gay n’hao lơn tay săk rnglăy bah ăp rmôt công nghệ mrô, năm tât, n’gor Dak Lak ntrôl dăng tay ăp nău ƀư tiăr nti, ntĭm, n’hao dơi blău mpeh rgâl mrô an ăp nuĭh tâm rmôt. Ndrel đah nĕ, tâm rgop đah ăp ntŭk kan geh tât, ngăn lah ăp ntŭk kan viễn thông ndâk ƀư kơt dŏng ta măy di động gay dơh an nuĭh ƀon lan, doanh nghiệp joi, dŏng. Tă bah nĕ, rgop n’hao uĕh rnoh nuĭh ƀon lan dŏng công nghệ mrô, ơm jêh sam ƀŭt sam tra ngih dak rnoh nuĭh.