Tĭng ƀư bôk nău kan “Me wơt bôk” tă bah Trung ương Hội Liên hiệp bu ur Việt Nam rgŏ jă, ăp gưl hội bu ur ta Lâm Đồng hŏ geh ăp nău kan na nê̆, ngăn ngăn, jêng “ntŭk nsing” bah kon se kon đơi. Bah nê, kơl ăp kon se năl dơi nău rŏng răm mƀak, geh tay nuih n’hâm nđơr nsan hao.

        Bah năp nar khai giảng năm nti mhe, oh Bơ Nah Ria Hồng Ân, 9 năm deh, ta tổ dân phố M’Lọn, thị trấn Thạnh Mỹ, nkuâl Đơn Dương, n’gor Lâm Đồng dơi ăp me wơt bôk tât khâl, phăt siƀŭt, dak toh n’hanh âk ndơ dŏng nti mhe. Me roh tă bah nuh srê Covid-19, oh gŭ rêh n’hanh bơ̆ n’hanh u mpeh me. U hŏ âk năm deh, bơ̆ mô geh nău kan đăp mpăn, ân hăn kan thuê an bu ăp nar. Wa La Bouye Năm Thiều, u mpeh me bah Hồng Ân nkoch, nău rgŏ jă bah ăp me wơt bôk hŏ kơl  mon năl dơi nău nuih n’hâm tâm rŏng.

       “Nơm geh ăp yơ mon geh tay siƀŭt nti, hŏ nău oi đŏng. Gâp nsrôih rgŏ jă mon hăn nti, nkah mon hăn nti jăp gơih, djăt nău nai ntĭm nti, rvê nău nti ren”.

        Wa Phạm Thị Thảo Nguyên, Kruanh Hội Liên hiệp bu ur thị trấn Thạnh Mỹ, nkuâl Đơn Dương an gĭt, đơn vị dơn  wơt bôk Hồng Ân an tât rnôk mon tŏng 18 năm deh. Tâm 2 năm aơ, Hội hŏ ôp joi ăp nuĭh lŏng nuih n’hâm  way hăn kơl ndơ pă an siƀŭt mpêt nkrem rnoh khlay 5 rkeh prăk, ăp khay mât chăm an mon du gâl drăp ndơ n’hanh ƀư an nuih n’hâm geh nău tâm rŏng.

“Ntop kơl mon ăp khay, ăp khay 400-500 rbăn prăk. Geh khay hội ntop kơl ma prăk măt, geh khay ntop kơl ma nklâm ndơ, dak toh an mon. rlău ma nê, ăp rơh lễ, Tết, nar kon se lam ntŭr neh, trung thu mô lah tâm bôk năm nti hội tât ôp khâl, pă nklâm ndơ. Mbra nsrôih rvê an mon ăp tŏng ndơ tâm ban kơt ăp băl ndrel năm deh gay kơl mon tât nhih nti”.

        Đah oh Trần Nhân Hòa, ta thôn Quỳnh Châu Đông, xã Lạc Lâm, nkuâl Đơn Dương, n’gor Lâm Đồng, kon đơi bơ̆, du hê me mbăk anh mât 2 hê oh yuh Hòa hăn nti. Dơi geh nău ntop kơl bah hội bu ur nkuâl Đơn Dương, oh geh tay ndơ ma nsrôih kơt nti. Trần Nhân Hòa nkoch:

       “Gâp dăn lah uĕh ăp kônh yơ uănh khlay ntop kơl gâp. Gâp mpŏng ŭch jêng  youtuber, n’hanh gâp mbra nsrôih kơt nti an dŭt uĕh gay dơi tât nău mpŏng ŭch nê. jêh aơ tay jêng nuĭh gâp mbra mon jay an u n’hanh kơl ăp băl jêr jŏt êng ƀa ƀă”.

        Ta nkuâl Đơn Dương aƀaơ geh 13 kon se kon đơi dơi ăp gưl hội bu ur dơn wơt bôk. Gay tĭng ƀư jăp nău mât chăm an ăp kon se, mpôl hŏ njêng prăk nkrem “Me wơt bôk” ma trong rgum ăp tơm ndơ lam rêh jêng kon nuĭh, an ƀư ăp bôk nău kan “Rnoh mbrô tâm rŏng”, “Rgum ndŏk nhựa”, tâm rlong “Nău mprơ tâm rŏng”... wa Trịnh Thị Hằng, Groi Kruanh Hội Liên hiệp bu ur nkuâl Đơn Dương an gĭt, ma ăp nău kan, Mpôl hŏ rgŏ jă geh hang rkeh prăk gay pă an siƀŭt mpêt nkrem, pă an nklâm ndơ, chop khâl, ntop kơl ăp khay an ăp mon său.

       “Mpôl mât tay nău kan bah Prăk nkrem bôk nău kan "Me wơt bôk", njêng ăp jay ư̆r ta ăp xã, thị trấn, rgum ndŏk nhựa tăch sŏk prăk ƀư prăk nkrem. Rlău ma nkhêp geh nkah ndray njêng Hội n’hanh nar bu ur lam ntŭr neh ƀư tâm rlong nău mprơ tâm rŏng mô lah ăp bôk nău kan ntop kơl ndơ dŏng rêh gay ntop kơl bu ur geh nău rêh jêr jŏt n’hanh ăp mon său kon đơi ta nkuâl”.

       N’gor Lâm Đồng aƀaơ geh bơi 1.400 kon se kon đơi, tâm nê geh âk kon se kon đơi tă bah nuh srê Covid-19. Ntơm bah kêng dŭt năm 2021, tĭng ƀư bôk nău kan “Me wơt bôk” tă bah Trung ương Hội Liên hiệp bu ur Việt Nam rgŏ jă, ăp gưl hội tâm n’gor hŏ nsrôih rgŏ jă, buăt nthoi kơl an ăp kon se. Ƀư ntop kơl phe, ndeh wah jâng, máy tính, bảo hiểm y tế, siƀŭt, ndơ dŏng nti, gŭ rêh tĭng khay, tĭng quý, mô lah tĭng năm; tĭng gâl ntơm bah 3 tât 5 năm, mô lah ntop kơl tât rnôk ăp kon se tŏng 18 năm deh. Tĭng wa Cil Bri, Groi Kruanh Hội Liên hiệp bu ur n’gor Lâm Đồng, tât aƀaơ, ăp gưl Hội bu ur ta ntŭk hŏ dơn wơt bôk an 167 kon đơi; rgŏ jă bơi 1,5 rmen prăk mât chăm an ăp kon se.

“Ăp gưl hội an ƀư tay bôk nău kan, ntrôl dăng nkoch trêng rgŏ jă buăt nthoi ăp tơm ndơ; lor nchrăp kan nsum đah ăp gưl, n’gâng kan ta ntŭk, ăp n’gâng kan tâm nău ntop kơl, mât chăm kon se kon đơi, kon se geh nău rêh jêr jŏt. Rnê ăp nuĭh ntoh lư, trong ƀư uĕh bah gưl hội, hội viên bu ur, ăp nuĭh lŏng nuih n’hâm…dôl dơn “wơt bôk” ăp kon se, ăp nău nkoch trêng nău nđơr an ăp kon se bah ăp nuĭh “Me wơt bôk” ta ntŭk gay rêng lam tay an bôk nău kan”.

         Đah trong rƀŏng “Ta ah ntŭk geh kon se kon đơi, ta nê geh me wơt bôk”, bôk nău kan “Me wơt bôk” dôl rêng lam dăng ta Lâm Đồng. Bah nê, rgop nsum ti ntop kơl, pêt mât n’hanh mât chăm ăp kon se geh nău rêh dŭt jêr jŏt mha êng, rgŏ jă ăp kon se geh tay nău nđơr tâm kơt nti, nsan hao, jêng nuĭh ƀon lan uĕh./.