Rnăk yuh Hà Thị Eng, tâm thôn 5, xã Cư Kbang, nkuăl Ea Súp, n’gor Dak Lak geh 6 nŭih, yơn knŭng yuh dơm hăn kan. Neh tăm mô geh, prăk hăn kan ăp nar mô tŏng gay ma rong 3 kon jê̆, me po păng ji kuet ndrel sai păng vay ji kuet. Năm 2023, rnơm geh nau kơl an rlau 35 rkeh prăk tă bah Bôk nau kan bah neh dak n’huch ach o nâp nâl, yuh rvăt 4 mlâm ndrôk me sĭt rong. Tât rnôk aơ, ndrôk ngih yuh hŏ geh 6 mlâm. Yuh Hà Thị Eng rnơm lah nau ueh mra ơm tât:

            ‘Ngih mô geh du ntil ndơ, neh ntu ri 5-6 sào ba kŏ geh 50-60 ƀao dơm. Rnăk hên geh kơl an ndrôk, n’gâng kan tâm nkuăl kơl an ndrel geh ntĭm mbơh gay mât rong ndrôk. Rơh tât gâp nsôih gay rnăk vâl rklaih ach o”.

            Đah yuh Hà Thị Yên, tâm thôn 5 xã Cư Kbang, ŭnh sa ngih tâm năm 2013 ƀư rnăk yuh jêng ach o. dŭt năm 2014, rnăk yuh geh bu kơl an ngih ndrel nsôih hao, rnôk aơ rnăk yuh Hà Thị Yêu hŏ dơi rklaih ach o:

            ‘Rnôk geh ndrôk, gâp mang tay prăk gay ma ntuh kơl pah kan jan sa kơt ntơm bơh jêh ri tât rnôk ndrôk deh kon mra sŏk tăch gay ma trok lơi dôih rnon. Rnôk aơ rnăk hên mbơm oi, hŏ rklaih ach o, mô blau nau ngơi rlau, dăn lah ueh Đảng ndrel n’gâng kan”.

            Cư Kbang lah xã nkuăl III jêr ngăn bah nkuăl Ea Súp, âk ngăn lah nŭih rnoi mpôl đĕ, rnăk ach o geh bơi tât 58%. Wa Cao Thanh Hoài, Groi Bí thư Đảng uỷ xã Cư Kbang, mbơh, gay nau n’huch ach o nâp nâl, xã hŏ ƀư ăp nau kan hun hao văng sa rêh jêng. Ngăn lah tă bah rnôk ƀư 3 bôk nau kan bah neh dak hŏ geh âk nau rgâl, rgop nau khlay tâm nau rêh bah ƀon lan:

            ‘Nau ntuh kơl tât ngih vâl gung trong, nau kơl an hun hao tuch tăm, mât rong ân kônh wa, ngăn lah bôk nau kan kơl an ndrôk ân kônh wa ƀon lan geh nau kơl an ndrel tâm ban nuih n’hâm bah kônh wa prêh ngăn. Bah du năm uănh ri nau săk tam kŏ kơt lah geh ntrŭnh ueh. Rnoh rnăk ach o ăp năm huch ntơm 6-7%”.

            Tâm lam nkual n’har bri Ea Súp, ăp năm rlau aơ, gưl uỷ, n’gâng kan hŏ ƀư âk nau ntrŭnh kan, bah Đảng ndrel Ngih dak, njêng nau rgâl ueh ngăn tâm nau hun hao văng sa, rêh jêng. Ntoh ngăn lah ntĭm nti nau kan ƀon lan, leo nau hăn kan tâm dak Hàn Quốcl kơl an nŭih ƀon lan geh manh rlau 121 rmen gay ma ƀư nau kan tăch rgâl...Pă thẻ BHYT ân 53.240 nŭih; n’huch prăk hăn nti, prăk ntĭm nti ân 13.650 nŭih...Wa Nguyễn Thanh Tuấn, Groi Kruanh UBND nkuăl Ea Sup, N’gor Dak Lak, nkoch:

            ‘Bah băp nơh rnoh rnăk ach o tâm nkuăl Ea Súp prêh ngăn, rlau 60%. Bah 3 năm ntrŭnh ƀư ăp nau kan n’huch ach o nâp nâl, tât rnôk aơ nkuăl huch jur hôm 42% rnoh rnăk. Gay nau kan huch ach o du trong nâp nâl. UBND nkuăl hŏ ƀư 3 nau kan bah neh dak, ntrŭnh ƀư âk nau kan kơl an ngih gŭ, neh gŭ, neh tuch tăm ân ăp rnăk kônh wa rnoi mpôl đê̆”.

            Kŏ tĭng wa Nguyễn Thanh Tuấn, nkuăl Ea Súp dôl rgum nau nkoch trêng, n’hao nau gĭt, ndâk nau nsôih rklaih ach o bah ƀon lan, nkre ndâk ndrel pơk hvi ăp nau kan rgum ăp tu tơm ndâk njêng ngih vâl gung trong kơl an hun hao, rêh jêng, rgop nau n’huch ach o nâp nâl./.