Ntoh lư kơt nău bah wa H’Blim ta ƀon Mơ Nú, xă Chư Á. Tâm rnăk ach o đah nău rêh jêr jŏt, năm 2023 rnăk wâl wa dơi n’gâng kan ƀon lan ntop kơl du mlâm ndrôk me. Đah nău mât rong uĕh, tât aƀaơ ndrôk lĕ deh du mlâm kon, mbra nsĭt tay săk rnglăy nău geh đăp mpăn an rnăk wâl tâm rgŏ năp.

Nău rêh rnăk wâl bah năp đaơ dŭt jêr jŏt, yor mô geh lŏ mir jêng mô dơi hun hao wăng sa. Dăch aơ knơm geh nău kơl bah n’gâng kan ƀon lan ta ntŭk ntop kơl an rnăk wâl ndrôk me, jêh đêt khay mât rong ri ndrôk lĕ têh, mpŏng mbra ngăch deh, gay wăng sa rnăk wâl mbrơi mbrơi dơi rgâl lơn.

Mpeh nău ntop kơl, nkual ƀon têh Pleiku lĕ an thẻ Bảo hiểm y tế an 100% rnăk ach o n’hanh êp ach o. Oh kon ăp rnăk aơ dơi n’hŭch prăk hăn nti. Wa Trần Thị Út, Groi Kruanh UBND phường Chi Lăng, nkual ƀon têh Pleiku an gĭt, cán bộ phường lĕ ntĭm kônh wa rgâl ntil tơm tăm tâm di, ƀư ăp jrô tiăr nti n’hanh nta an manh prăk.

N’gâng kan ƀon lan lĕ n’hanh dôl rgum ăp nău ƀư ntop kơl hun hao wăng sa, n’hao uĕh ntĭm nti mât uănh săk soan n’hanh rgâl ntung trong an 3 ƀon nuĭh rnoi mpôl đêt. Ƀon lan lĕ kuăl jă ăp nuĭh lŏng bôk tôr ntop kơl 7 mlâm jay, kônh wa n’hao uĕh nău rêh. Ntop kơl tơm tăm n’hanh mpa rong tâm di đah ăp nău geh ơm bah 3 ƀon gay n’hao nău geh n’hanh đăp mpăn nău rêh bah nuĭh ƀon lan.

Nkual ƀon têh Pleiku lĕ ntop kơl ăp nuĭh dơi kơl manh bơi 11 rmen prăk đah prăk kon kơl an. Prăk nkrem yor nuĭh ach o lĕ ntop kơl ndâk ƀư n’hanh nkra 95 mlâm jay khlay rlău 4,7 rmen prăk. Ăp ntrong ƀư joi nău rêh dơi ƀư đah prăk rlău 770 rkeh prăk.... Wa Nguyễn Triều Quang, Groi Giám đốc Ngân hàng chính sách xã hội ta Gia Lai mĭn lah mbra rgum tay ăp tơm prăk, lơn lah bôk nău kan mkra joi nău kan an nuĭh ƀon lan.

Ntŭk kan nsrôih tâm ôp tâm nchră đah Thành ủy, UBND, HĐND ndơ̆ prăk jao an tơm prăk ƀon lan gay an manh ăp nuĭh dơi geh ta ntŭk. Kơp tât aƀaơ dĭng lĕ nkah rnon ăp bôk nău kan kơl an geh 402 rmen prăk, tâm nĕ tơm prăk gưl n’gor n’hanh nkual ƀon têh lah 51 rmen prăk, geh âk ƀư tĭng nău kan an manh kơl an.

Pleiku lĕ ndâk njêng du bôk nău kan êng gay ntrôl dăng trong kan n’hŭch ach o nâp nâl, n’hao uĕh nău rêh bah nuĭh ƀon lan, lơn lah ta ăp ƀon nuĭh rnoi mpôl đêt tâm lvang 2021-2025. Nău rgŏ jă lĕ trong chính trị lăp ndrel, nchrăp lor ndâk njêng trong nchrăp n’hŭch ach o jŏ jong n’hanh dŏng săk rnglăy tơm prăk bah ăp bôk nău kan rƀŏng tĭng lam dak mbra n’gâng tơm an lôch uĕh tâm trong kan n’hŭch ach o nâp nâl bah nkual ƀon têh. Wa Trịnh Duy Thuận, Bí thư Thành ủy Pleiku, an gĭt:

Bah bôk năm kan tât aƀaơ nkual ƀon têh lĕ rgum ntĭm rđău, ƀĭt joet mbơh ƀư trong kan n’hŭch ach o nâp nâl hăn ndrel đah bôk nău kan rƀŏng tĭng lam dak lĕ dơi geh du đêt săk rnglăy uĕh. Rnoh n’hŭch ach o tâm ƀon lan nkual rnoi mpôl đêt n’hanh rnoh rnăk ach o lah nsum n’hŭch dŭt ngăch. Aơ lah nsrôih dŭt têh bah ăp gưl ăp nău kan ndrel đah ƀư tĭng ăp bôk nău kan rƀŏng tĭng lam dak.

Đah ăp nău nsrôih mô rlu, nkual ƀon têh Pleiku dôl hăn êp lơn tât nău rƀŏng n’hŭch ach o nâp nâl. Ăp nău kơl n’hanh bôk nău kan ntop kơl lĕ mât uĕh săk rnglăy, rgop rgâl nău rêh bah nuĭh ƀon lan, lơn lah nuĭh rnoi mpôl đêt.