Nkah tay ăp nau rvê bah rđau kan n’gor uỷ Kon Tum rnôk khay 6 năm 2020, wa Nguyễn Đức Tuy, Groi Bí thư n’gor uỷ Kon Tum mbơh, ndrel ma nau ntrŭnh tâm di, nŭih ƀư lah nau khlay ân njêng nau dơi tâm nau n’huch ach o. Đah nau dơi ƀư lah Kruanh rmôt kan bah n’gor uỷ Kon Tum (ntơ lah rmôt 262), wa Nguyễn Đức Tuy, mbơh, nau rđau kan, đă geh ƀư tâm dăch, n’gor jao nau kan n’hêl ân rđau kan bah ăp ntŭk ndrel gưl nkual, xã, kơl an ƀon lan Mường Hong, Ngọc Linh ơm rklaih ach o:

            ‘Rmôt hăn kan mrô 262 vay tâm dăch ma tâm dânh, mro geh rmôt hăn kan tâm dâng xã, ntoh nau dơi bah lam ntrong kan chính trị tâm nau kan kơl an ƀon lan hun hao văng sa. Nkre lah, ntrong kan bah cán bộ, đảng viên tâm gưl xã, gưl thôn kŏ geh nau dơi blau mĭn, khâl păng hŏ ndrel dôl lăp nau kan ngăn gay ndrel ma ƀon lan mhâm ƀư 2 xã aơ ơm rklaih ach o”.

            Ntrŭnh rđau ndal nau kan bah N’gor uỷ KonTum, ăp n’gâng kan, ntŭk kan, ăp gưl uỷ đảng, n’gâng kan hŏ ntrŭnh ndal lăp kan gay geh nau rgop kơl an ngăn ndrel săk tam đah 2 xã ach o ngăn bah n’gor. Wa Huỳnh Mười, Groi Giám đốc N’gâng kan nchrăp kan ndrel ntuh kơl n’gor Kon Tum mbơh, ndrel ma tơm prăk bah 3 bôk nau kan neh dak (bơi tât 100 rmen lvang năm 2021-2025) tâm nau pă ntop tơm prăk mro geh âk nau kan têh ngăn gay ma pơk trong ân 2 xã hao jêng. Trong n’gor nthoi ma nkuăl Đăk Glei ndrel Mường Hong, Ngọc Linh drel Tu Mơ Rông jong rlau 100 km hŏ geh nau jêh, kơl an trong hăn ueh nơih lơn.

            Wa Huỳnh Mười mbơh, n’gor dôl dâk, jă ntuh kơl 2 nau kan tăm, nkra dak si, rnoh prăk geh rlau 2000 rmen tâm 2 xã, aơ lah nau nsôih gay 2 xã lŏ hun hao ngăch, nâp nâl:

            ‘Kơl an 2 xã Mường Hong, Ngọc Kinh ri nau mĭn bah hên lah ân jao tong ndar ân ƀon lan. Tâm nau pă tơm prăk ndrel tu tơm ri kơl an ân 2 xã jêr ngăn tĭng ăp nkô̆ dơi. Êng nê, nơm ân geh rgum ăp ntŭk kan, nŭih ntuh kơl tât 2 xã, gay tă bah nê pă kan pah, nau rêh ân ƀon lan”.

            Lah ntŭk ntŭk kan geh jao ƀư tơm tâm nau bonh đă, nkoch trêng kơl an ƀon lan 2 xã ach o ngăn bah n’gor rgâl nau mĭn, nau kan, wa Trịnh Ngọc Tâm, Groi Kruanh Rnâng kan bonh đă n’gor Kon Tum mbơh, Rnâng kan hŏ mbơh nchră gay n’gor leo rmôt cán bộ, đảng viên geh nau dăng tâm ăp ntŭk kan, rmôt kan ƀư nau kan tât xã, ƀon:

            ‘Cán bộ, đảng viên geh n’hao ƀư nau kan lah ăp cán bộ mon, geh nau blau, geh nau dơi, khân păng hăn nkoch trêng, bonh đă gay dŏng nau kan mhe, leo ăp nau mhe tât xã, kơl an ƀon lan, tâm dăch ƀon lan, ntĭm mbơh ân ƀon lan ntrơn rgâl, rgum ăp nau kan văng sa geh săk tam”.

            Gưl n’gor geh 23 ntŭk lăp kan, đă cán bộ, đảng viên râng ƀư nau hăn kan bah N’gor uỷ Kon Tum tât kơl an ƀon lan Mường Hong, Ngọc Linh. Tâm ban ma nê, nkuăl Đăk Glei kŏ ndâk rmôt hăn kan kơl an 2 xã. Wa Lê Viết Nam, Kruanh UBND nkuăl Đăk Glei mbơh, 22 thôn, ƀon bah 2 xã kŏ geh rmôt kan hăn. Cán bộ, đảng viên ndrel sa, ndrel gŭ ndrel ƀon lan gay ntĭm kan ân ƀon lan ân geh săk tam. Cán bộ n’gor, nkuăl ndrel xã rgm rmôt cán bộ, đảng viên tâm thôn ƀon nsôih râng, leo trong tâm ăp nau ntrơn rgâl tơm tăm.

            Tât rnôk aơ, nau dơi ngăn lah kơl an ƀon lan rgâl nau mĭn, nau kan, dŏng nau mhe tâm tuch tăm. Đah mir sâm Ngọc Linh, mir cà phê, ăp tơm sâm rse, rnôk aơ ƀon lan mô knŭng rklaih ach o ma hôm mĭn ƀư sâm geh. Tĭng wa Lê Viết Nam, ntŭk ueh, neh jêng, ăp nau geh tŏng dơi ân 2 xã ach o Mường Hong ndrel Ngọc Linh hao jêng:

            ‘Đah nau rgum ngăn bah lam ntrong kan chính trị, kônh wa mô êng rklaih ach o ma dơi ƀư sâm geh, ndrŏng tâm ƀon tơm nơm đah nau kan tuch tăm. Nau ntrŭnh tâm di, cán bộ nsôih lăp kan, tâm kơl bah lam ntrong kan chính trị, ngăn lah tơm ntuh kơl, ăp rmôt kan ri ngăn lah nau rêh ƀon lan mra rgâl”.

            Leo nau ntrŭnh Đại hội Đảng, leo nau rđau bah Ban Bí thư tâm nau ngăn, n’gor Kon Tum hŏ geh nau dơi tâm nau rklaih ach o, ji ngot bah 2 xã ach o ngăn bah n’gor lah Mường Hong ndrel Ngọc Linh. Nau ntrŭnh tâm di, cán bôk, đảng viên lăp kan ngăn, nau rêh ƀon lan dôl hơm tăm. Rgâl nau mĭn, nau kan, janh manh prăk, ntuh kơl ntrơn rgâl tơm tăm lah nau tơm gay nŭih Xê đăng tâm nkuăl neh aơ rklaih ach o. Đah nau kan tuch tăm săk jêng nsing tâm nau geh dơi mpeh neh, mih, nar, tơm cà phê, tơm dak si, ngăn lah Sâm Ngọc Linh hŏ ndrel dôl ƀư nau nâp kơl an ƀon lan rklaih ach o ndrel ndrŏng.

            Ntơm nau dơi ndrel nau kan ngăn tâm nau jủ ach o tâm 2 xã Mường Hong, Ngọc Linh, n’gor uỷ Kon Tum dôl ma lŏpơk hvi nau kan đah nau kơl an 57 thôn tâm 8 xã jêr ngăn bah n’gor. 58 ntŭk an, rmôt kan geh pă nau ƀư kơl an ăp thôn jut ach o, hun hao văng sa rêh jêng./.