Lôch rlău 2 năm an tĭng ƀư nău n’glêh an 749 năm 2020 bah Thủ tướng Chính phủ mpeh rgâl mbrô gưl neh dak, n’gor Kon Tum geh du đêt nău dơi ngăn, lơn lah tâm trong kan tuch tăm – thôn ƀon. N’gor dôl nsrôih droh rklaih ăp mpêr n’gar nking kol gay rgâl mbrô ngăch lơn, rƀŏng tât rdâk njêng tuch tăm pet lât, ƀon lan têh uĕh mhe.

Lôch rlău 2 năm an ƀư nău n’glêh an mbrô 749 bah Thủ tướng Chính phủ, tât aƀaơ 60% siƀŭt gưl xã bah n’gor Kon Tum hŏ dơi nkra ma trong mạng, tât rnoh ndơ̆ luh năm 2025. Rlău ma nê, rlău 16.800 héc-ta tơm tăm, 142 mât rong têh hvi dơi  dŏng rgâl mhe khoa học n’hanh công nghệ; rlău 116.600 rnăk tuch tăm lăp tâm ntŭk ndranh tăch rgâl điện tử.… yơn lah, tĭng wa Đặng Trần Huân, Groi Giám đốc Sở Nông nghiệp n’hanh Phát triển Nông thôn n’gor Kon Tum, n’gor nha dôl hôm tâm rdâng đah âk  ntul rlong đŏng rnôk tĭng ƀư rgâl mbrô tâm rdâk njêng ƀon lan mhe:

“Nău gĭt êng mpeh rgâl mbrô tâm rdâk njêng ƀon lan mhe lah mô tâm ban. Nău blău n’hanh nău gĭt êng bah công chức tĭng ƀư nău dơn kan rgâl mbrô hôm mpăng đêt. Drăp ndơ n’hanh jâng tơm công nghệ thông tin ta du đêt xã mô hŏ tŏng đah nău ŭch  geh n’hanh nău dơn kan rgâl mbrô”.

Đah 68% rnoh nuĭh gŭ rêh ta ƀon lan n’hanh 73% nuĭh kan tâm trong si gle bri dak, n’gor Kon Tum ntrŏng rgâl mbrô lah trong nkra khlay gay hun hao tuch tăm, thôn ƀon tĭng trong rƀŏng têh mhe kơl nuĭh ƀon lan kan lŏ mir tuch tăm roh huach đêt prăk dŏng kan yơn nsĭt geh wăng sa dŭt âk.  

Tĭng wa Đặng Thanh Long, Kruanh Liên hiệp ăp Hội Khoa học n’hanh Kỹ thuật n’gor Kon Tum, tă bah wăng sa – rêh jêng kon nuĭh hôm jêr jŏt, nău rgâl mbrô ta trong kan tuch  tăm mât rong n’hanh nkual thôn ƀon bah n’gor lor bôk năp ân rlău dơi ăp mpêr n’gar nking kol, nê lah rnoh dŏng ndeh rklư đêt, đêt công nghệ, ăp nău kan mât chăm, tuch tăm hôm dơi tĭng ƀư nsing ta nău tă  ơm gĭt kan bah ƀon lan… Nkoch tât trong ntrŭt ntrôl rgâl mbrô tâm nău kan tuch tăm rƀŏng tât hun hao ƀon lan geh ăp tŏng ndơ dŏng, wa Đặng Thanh Long, an gĭt:

“Lor bôk  năp nê lah mpeh pah kan nkoch trêng nău lư gay saơ kloh dơi ntŭk gŭ  kan, nău khlay kan, nău uănh khlay n’hanh mpet jâk bah rgâl mbrô tâm hun hao wăng sa tuch tăm mât rong aơ lah du trong rƀŏng khlay. N’hao săk blău tơm nuĭh kan kơp lĕ ma mpôl tơm ƀư njêng, lah ăp rnăk ƀon lan kan lŏ mir, rmôt tâm boh, hợp tác xã, doanh nghiệp n’hanh săk mpôl cán bộ nơm ăp nuĭh râng tâm rnôk tĭng ƀư rgâl mbrô tâm nău kan tuch tăm. Rdâk njêng ntŭk ntô, jâng nsing nău nkoch trêng nău lư mbrô n’hanh  mât prăp nău lư mbrô. Nău ndrel hăn n’hanh lăp kan bah lam trong kan chính trị, bah ăp gưl uỷ Đảng, n’gâng kan, bah ăp doanh nghiệp tâm nău kan tuch tăm”.

Tât aƀaơ n’gor Kon Tum hŏ geh 48/86 xã di rnoh rdâk njêng ƀon lan mhe, tâm nê geh 7 xã ƀon lan mhe n’hao prêh n’hanh 2 xã ƀon lan mhe ntĭt leo lor. Ndrel đah nê n’gor hŏ geh 21 thôn di rnoh nkual ƀon  lan gŭ ntĭt leo ƀon lan mhe, 65/498 thôn, ƀon rnoi mpôl đê̆ di rnoh rdâk njêng ƀon lan mhe. Aơ  lah ngoăy tâm ăp jâng nsing khlay gay n’gor tĭng ƀư ăp trong nkra mhe, blău mhe n’hanh tâm di gay ntrŭt ntrôl rgâl mbrô tâm tuch  tăm  mât rong n’hanh hun hao thôn ƀon ăp tŏng nău lư./.