Bah năp nău tât krit nji nuh srê ta ndơ mât, lơn lah nuh srê ji ndŭl djroh sŭr châu Phi n’hanh geh ma nău lăp bah kaman lhut mbung plôk nchop, n’gor Dak Lak dôl an ƀư ăp kôp âk trong nkra gay mât njrăng sŭr ndrôk, đăp mpăn mât rong n’hanh hŭch bah roh huach an nuĭh ƀon lan. Ntơm bah bôk năm tât aƀaơ, nuh srê ji ndŭl djroh sŭr châu Phi tât krit nji tay ta âk ntŭk. Tât kêng dŭt khay 4, nuh srê hŏ ntoh luh ta 26 xã, phường, ân nkhĭt su rlău 2.100 mblâm sŭr.

Bah meng nê, n’gâng kan mât rong n’gor Dak Lak hôm ât rdâng đah geh ma nău tât bah ntil kaman lhut mbung plôk nchop serotype SAT1. Lam dak lah nsum, n’gor Dak Lak lah êng ân n’hao dăng an ƀư ăp trong groi nđôi nuh srê, mât kân lhăt nău nchuăn rdeng ndơ mât rlău n’har bri; nkre ƀư sŏk mham uănh năl, ơm saơ ăp ndơ mĭn geh ntưp ji. Tĭng Sở Nông nghiệp n’hanh Môi trường n’gor Dak Lak, n’gâng kan dôl lor nchrăp tĭng groi nđôi grêt dăch nău tât nuh srê, ntĭm nti nuĭh ƀon lan an ƀư ăp trong njrăng n’gang năn ngăch.