Tâm rnôk Việt Nam rƀŏng tât tăch n’gluh jŏ jong, ăp quy định mpeh uănh năl bu chuh sa ndơ tuch tăm, đăp mpăn kah uĕh ndơ (SPS) n’hanh lơn lah Nghị định 280 bah Tổng cục Hải quan Trung Quốc dôl njêng luh mpet jâk đah doanh nghiệp. Yơn lah, aơ lah suan ntrôl gay n’gâng kan tuch tăm rgâl tĭng trong rƀŏng way blău ƀư mbro, kloh rvah n’hanh jŏ jong lơn. 

Lah ngoăy tâm ăp doanh nghiệp nkret njêng, tăch n’gluh mắc ca dâk bôk năp ta Dak Lak, Công ty Damaca Nguyên Phương ntrŏng ăp rnoh di mpeh đăp mpăn kah uĕh ndơ tăch n’hanh uănh năl bu chuh sa ndơ tuch tăm (SPS) tâm Hiệp định tâm boh wăng sa lam lĕ rngôch nkual (RCEP) mô lah ăp nău ŭch geh kỹ thuật mhe dôl jêng ndơ nkol rêh nha gay ndơ geh ƀư mât kơn dơi ntŭk tăch n’gluh. Bah năp nău ŭch geh nar lơn ma khăch khoch bah ntŭk tăch rgâl, doanh nghiệp ân lor nchrăp rƀah gĭt nău lư, rgâl rêng mât chăm gay tŏng an nău ŭch geh rvăt n’glăp. Tĭng wa Nguyễn Thị Thu Phương, Giám đốc công ty, jêr jŏt aƀaơ mô dơn lah “gĭt quy định” ma lah an ƀư di n’hanh ăp tŏng tâm ngăn ngăn, yor kơt nê̆ doanh nghiệp ŭch rŏng dơi ăp n’gâng kan dơi kan ntop kơl, ntĭm nti ngăn na nê̆.

“Mpôl hên ŭch rŏng dơi ntĭm nti na nê̆ lơn rnôk ăp quy định, nghị định rgâl. Doanh nghiệp ân tĭng ƀư moh njuat kan, moh nhih pah kan ntop kơl na nê̆ n’hanh moh geh trong ntop kơl mpeh siƀŭt, siƀŭt njuăl mô lah prăk dŏng kan. Rnôk geh nău ndrel hăn n’hanh ntĭm nti kloh rvah, doanh nghiệp mbra nsing nơm lơn tâm nău ntuh kơl, wat jêh rêng ƀư n’hanh n’gluh ndơ tăch lam ntŭr neh”

Đah ăp doanh nghiệp ƀư njêng n’hanh mât prăp ndơ tuch tăm tăch n’gluh, lơn lah tăch n’gluh tât Trung Quốc, rlău ma nău ŭch geh mpeh SPS hôm tĭng jăp Nghị định 280 mpeh đăp mpăn kah uĕh ndơ sa bah Tổng cục Hải quan Trung Quốc, mbra geh nău tam ntơm bah nar 1/6/2026. Ntŭk rgâl dŭt têh lah doanh nghiệp ân đăng ký êng ta ntŭk lăp ƀư CIFER lôch rnôk dơi nhih pah kan dơi kan bah lơ nkoch mbơh, rgâl bah ma hôm lơn âk siƀŭt dơi nhih pah kan mât bôk kan ntop kơl kơt ntơm nơh. Nău dja doanh nghiệp ân lor rdâk njêng siƀŭt tâm di, di nău lư n’hanh dơn kan na nê̆ mpeh nău di nău lư đăng ký. Yor nău rgâl mpeh trong mât kan dja dôl ndơ̆ luh ăp trong nkra ngăn ngăn mpeh nău nđơn tay n’hanh nău kan nsum đah ăp ding. Wa Huỳnh Phú, ntơh măt du doanh nghiệp tăch rgâl ndơ tuch tăm nkoch ăp wĭ wĕ mpeh kỹ thuật n’hanh siƀŭt nđơn ndơ̆ tay.

“Aƀaơ doanh nghiệp mpôl hên dôl ƀư siƀŭt dăn mã mbrô nklâm tâl n’hanh hŏ nôp tĭng rêng ƀư aƀaơ. Ndrĭ bah kơi nar 1/6/2026, rnôk Nghị định 280 geh nău tam ngăn ri doanh nghiệp gĭt ƀư tay lĕ rngôch siƀŭt lah hôm dơi nđơn tay đŏng? Nkre, lah ntoh nău wăk kol tâm rnôk tĭng ƀư đah ăp n’gâng kan way kan, doanh nghiệp n’hanh n’gâng kan ta ntŭk mbra tâm ôp đah moh nhih pah kan gay dơi ntĭm nti dŭt ngăch?”

Ăp nău rvê dja bah doanh nghiệp an saơ nău ŭch geh jăch ndăn mpeh du rêng ntĭm nti nha hôm tĭng trong “nhŭp ti nchŏng kan" rnôk mông nar tĭng ƀư hŏ bơi lĕ tât dăch. Rblang ăp nău wĭ wĕ dja, nkre lah rjăp nsrôih ndrel hăn bah n’gâng kan tuch tăm, wa Ngô Xuân Nam, Groi Giám đốc Văn phòng SPS Việt Nam (Bộ Nông nghiệp n’hanh Môi trường) an gĭt, đơn vị ndrel ăp ding geh tât hŏ n’hanh dôl ndăn mbơh gĭt lam hvi nău lư, ntop doanh nghiệp ntơm bah uĕh di rup gui jay xưởng tât nău blău mât dŏng hồ sơ. Yơn lah tĭng wa Nam, kô̆ yơn dŭt khlay aƀaơ lah mô gŭ ta nău âk jêr bah siƀŭt ma gŭ ta nău lor nchrăp n’hanh nău di bah doanh nghiệp rnôk tĭng ƀư nău dơi đăng ký êng:

“Doanh nghiệp ân gŭ mĭn na nê̆ ăp quy định n’hanh ntĭm nti geh tât. Gâp mĭn lah rnôk hŏ wât di, wât ăp tŏng ăp nău ŭch geh ri nău đăng ký mbra mô ir jêr jŏt. Yơn lah, hồ sơ ân di rnoh ăp kôp, ntơm bah nău tih chính tả, nău lư nchih mbơh tât rup gui jay xưởng, ntŭk tuch tăm. Djăt ma geh tih du đêt tâm hồ sơ mbra geh bu mplơ̆ tay dĭl. Rnôk doanh nghiệp rƀah gĭt quy định, nchrăp na nê̆ n’hanh tĭng ƀư di ntơm bah bôk năp ri gâp mĭn lah doanh nghiệp Việt Nam mbra tŏng uĕh ăp nău ŭch geh mhe”.

Bộ Nông nghiệp n’hanh Môi trường ntrŏng, đah ăp ndơ tơm khlay kơt sầu riêng, play rêh, ndơ sa nkret njêng mô lah ndơ tuch tăm, nău tŏng di uĕh ăp rnoh di SPS mbra kơl geh ma nău bu plơ̆ tay mô lah manh rlu tăch n’gluh. Aơ lah ndơ tơm khlay gay mât nău nsing nơm an ndơ tuch tăm Việt Nam tâm rnôk tâm rlong lam ntŭr neh nar lơn ma rgŭt n’gĭng.

Rlơ̆ tay, ăp mpêr n’gar kỹ thuật dôl njêng suan mpet gay n’gâng kan ndơ tuch tăm plơ̆ tâm n’guăk tay tĭng trong rƀŏng kloh rvah, đăp mpăn n’hanh jŏ jong lơn. Rnôk doanh nghiệp lor nchrăp n’hao rnoh săk kah, hôm nhih pah kan mât uănh ndrel hăn tay âk, ntop kơl năn ngăch, ndơ tuch tăm Việt Nam mbra geh tay trong pơk hvi ntŭk tăch rgâl n’hanh n’hao ntŭk gŭ têh khlay ta ntŭk tăch rgâl lam ntŭr neh.

Ta tâm nchră “Pơk uănh mbơh lư ăp quy định mpeh đăp mpăn ndơ ngêt sa n’hanh uănh năl bu chuh sa ndơ tuch tăm (SPS) tâm Hiệp định RCEP n’hanh Nghị định mbrô 280 bah Trung Quốc” tă bah Bộ Nông nghiệp n’hanh Môi trường ƀư ta Dak Lak, wa Võ Văn Hưng, Thứ trưởng Bộ Nông nghiệp n’hanh Môi trường, lah rjăp, nău droh rklaih jêr jŏt an doanh nghiệp ân dơi ƀư lĕ n’hâm suan bah năp nar 1/6/2026 gay đăp mpăn mô tăch pruăt nău kan tăch n’gluh ndơ tuch tăm, si gle, tui ka.

“Mpôl hên way ton ndrel n’gâng kan ta ntŭk, ăp n’gâng kan ta n’gor n’hanh nsum mpôl doanh nghiệp gay nchrăp dŭt uĕh, dŭt lor nchrăp n’hanh ngăch ngăr tâm ăp rêng ƀư quy định mhe. Nău ŭch lah n’hao nău dơi tăch n’gluh, ntrŭt ntrôl tăch ndơ tuch tăm an nuĭh ƀon lan, bah nê kơl ndơ tuch tăm Việt Nam ta ntŭk tăch rgâl Trung Quốc tâm ban kơt ăp ntŭk tăch rgâl êng ƀa ƀă săk ntơr tay, tŏng ăp nău mpŏng geh mhe tâm let năp tay”.

Tâm rnôk tăch n’gluh lah suan ntrôl khlay tay an hun hao wăng sa, nău mât ‘nsing nơm” tâm săk kah ndơ geh ƀư, tĭng jăp gŭ mĭn ăp rnoh di SPS n’hanh bên di ngăch đah ăp quy định mhe mbra lah mâng keh pơk mpông gay ndơ tuch tăm Việt Nam hun hao jŏ jong, pơk hvi ntŭk tăch rgâl n’hanh rgop geh nău tam lơn an jâng wăng sa neh dak./.