Tâm ăp rgum tăch ndơ dơi ƀư ta Buôn Ma Thuột, ăp ndrơng ndơ OCOP n’hanh ndơ ta ntŭk ăp nar âk nuĭh đŏng. Yuh Huỳnh Thị Thủy, du hê dŏng ndơ ta Dak Lak, nkoch: Nău yuh uănh ngăn lor lah uĕh kah n’hanh tu tơm nkra njêng. Yuh săch lor ăp ndơ dăch dêh, kloh na nê̆ mpeh tu tơm n’hanh lơn lah yor nuĭh Việt Nam nkra njêng, yor nê lah trong an kơl lor ndơ Việt.

Gâp ŭch ăp ndơ nar lơ dơi n’hao uĕh kah, mpla nsơ lam hvi gay nuĭh ƀon lan dơh gĭt lơn. Rlău ma uĕh kah, rup gui dŭt khlay đŏng, yor nuĭh dŏng way ŭch bôk năp ta dŭng ntô uĕh măt. Lah ndrel du ndơ yơn âk ntil, âk rup gui ri mbra tâm di nău ŭch âk ntil bah âk rơh kơn nuĭh năch.

Nău rgâl bên dŏng aơ lĕ jêng jêng yơn lah nuih n’hâm gay ăp ntŭk nkra njêng rgâl mhe. Tâm ntil nău kho ao, wa Nguyễn Thị Đượm-nuĭh tơm ntŭk nkra njêng cheh tanh văn hóa Tây Nguyên ta phường Buôn Ma Thuột, n’gor Dak Lak lĕ gĭt trong tĭng n’hanh dŭt n’hâm rgâl gay mât jâng nuĭh rwăt. Wa Đượm nkoch:

Đah nău uănh aƀaơ, năch tât Buôn Ma Thuột lĕ rngôch nuĭh ŭch nsoh kho ao way ơm n’hanh geh năch ri bu ŭch nsoh ndơ mhe. Yơn ma âk khân pơng ŭch nsoh ndơ way ơm âk lơn. Nău dăng bah gâp lah dơi tâm di nău ŭch bah nuĭh rwăt.

Ta nău kan ndơ sông sa, âk ntŭk jêt joi trong hăn mhe đŏng. Yuh Dương Thị Trúc Linh, ta phường Tuy Hòa, n’gor Dak Lak-nuĭh tơm ndơ sa Út Vũng Tàu ndơ OCOP 3 sao, nkoch: nău mĭn dŏng lĕ geh âk nău rgâl. Nuĭh rwăt mô knŭng uănh tât nău dơh, rnoh khlay, ma nar lơ uănh khlay nău kloh rah wah tâm trong nkra njêng, nău đăp mpăn kơt uĕh măt uănh bah ndơ.

Ăp ndơ dơi ƀư bah ndơ geh ơm ta ntŭk, geh kơp dơn hữu cơ jêng dŭt ŭch. Trong leo dŏng aƀaơ lah sa kloh uĕh, ngăn lah đah ndơ an kon se jêt. Aơ lah trong hao jêng âk ma mpôl hên dôl rgum.

Ăp doanh nghiệp têh dôl rgâl na nê̆ mpeh gưl bu năch rwăt. Tĭng yuh Châu Yến Duyên, Công ty TNHH Yến Sào Thành Dung, xă Krông Pắc, n’gor Dak Lak: Bah năp đaơ, công ty knŭng nkra njêng ăp ntil yến kah khlay gay tăch n’gluh. Yơn aƀaơ, công ty nar lơ uănh tât ntŭk tăch tâm dak, nkre rgâl âk ntil ndơ gay wăch rgum âk năch lơn.

Công ty lĕ mĭn njêng n’hanh an luh ăp ndơ tâm di đah năch ndơ di lơn, kơt ăp ndơ yến ƀoăt âk ntil mpeh rup gui n’hanh ƀô kah gay năch săch. Rlău ma nĕ, mpôl hên hôm hun hao ndơ yến pâr thăng hoa, geh rnoh khlay tâm di n’hanh dơh dŏng yor dơi dŏng sa dâl.

Ăp nău nkoch bah nuĭh dŏng n’hanh doanh nghiệp an saơ, nău hăn ndrel đah 2 ding nar lơ nâp nâl. Nuĭh dŏng kơl ndơ Việt yor nău dăch dơh, kloh rah wah n’hanh đăp mpăn; tâm rnôk nĕ, doanh nghiệp nsrôih rgâl mhe gay mât nău nsing nơm n’hanh pơk hvi ntŭk tăch. Nău ntop kơl aơ mô knŭng kơl âk ndơ ta ntŭk bah n’gor Dak Lak geh măt ta ăp ntŭk siêu thị têh, râng ndrơng tăch ndơ điện tử, ma hôm rgop ndâk njêng moh êng ndơ Việt nar lơ nâp dăng./.