Nar nđaơ (7/9), mpôl doanh nghiệp Trung Quốc lĕ geh rơh pah kan, uănh nkual tăm, ntŭk tâl dŭng n’hanh mĭn joi kan ndrel đah nău kan ndơ sầu riêng ta n’gor Đắk Lắk. Ta nar mâp, ăp ding lĕ tâm rgâl mpeh trong rƀŏng kan ndrel gay pơk hvi tăch n’gluh di trong, tâm rgop ntŭk tăch bah meng ntŭk tăch Trung Quốc.

Hiệp hội Sầu riêng Đắk Lắk n’gluh an du đêt nău dăn đă kan ndrel, tâm nĕ geh: ntrôl ký ton jŏ jong, đăp mpăn rgâl yor tâm rgâl đêt năm tĭng yan; ntrŭt nsôr doanh nghiệp Trung Quốc ntuh kơl an ntŭk nđik, logistics n’hanh nkret njêng jru ta ntŭk; pơk hvi kan ndrel ntĭm nti nuĭh kan, jao an kỹ thuật n’hanh nău blău ơm mât uănh uĕh nâp. Đắk Lắk aƀaơ geh bơi 40.000 ha sầu riêng, rnoh geh năm 2025 geh bơi 400. 000 tấn. N’gor lĕ dơi mpeh Trung Quốc uănh an 269 mã mrô nkual tăm bơi 7.400 ha; 40 ntŭk tâl dŭng play rih n’hanh 11 ntŭk sầu riêng nđik rhŏ an tăch n’gluh.