Lơ 16/10, ta Hà Nội, N’gâng kan tuch tăm mât rong n’hanh Ntŭk ntô gŭ âm ƀư Rƀŭn nchră uănh lah săk rnglăy hun hao ndơ OCOP n’hanh pâl nđaih thôn ƀon lvang 2021-2025, nchrŏng lvang 2026-2030. Rƀŭn nchră mĭn lah, Bôk nău “Du xă du ntil ndơ” (OCOP) n’hanh du bôk nău pâl nđaih thôn ƀon lĕ jêng nuih n’hâm khlay kơl “kuăl dâk hao” ndơ geh văn hóa, ntŭk ntô bri dak, kon nuĭh ta ăp nkual ƀon tơm.

Tĭng nĕ, bôk nău lĕ rgâl âk tâm nkra njêng lŏ mir, bah trong ƀư jêt chrai an tâm rgop trong khlay; jêng nkual mât tăm đăp mpăn, ntrôl rdâk njêng nău kan, hun hao nău kan thôn ƀon, pơk luh dơi trong nău rêh an ƀon lan rnoi mpôl đêt n’hanh bu ur thôn ƀon. Aƀaơ lam dak geh 17.300 ndơ OCOP, rlău 600 ntrong kan pâl nđaih lŏ mir ndrel bơi 400 ntŭk pâl nđaih thôn ƀon dơi kơp dơn. Ta rƀŭn nchră, ăp đại biểu năl lah: Ta năp nău đă mhe mpeh hun hao wăng sa kloh uĕh, rgâl mrô, n’hŭch n’hôl ƀô n’hanh tâm di rgâl trôk nar, an geh ăp trong hăn rgâl mhe, gĭt tât mhe lơn tâm hun hao OCOP n’hanh pâl nđaih thôn ƀon. Bôk nău kan OCOP n’hanh pâl nđaih thôn ƀon lang 2026-2030 dơi mpŏng jêng njoat rgâl mhe dăp tay wăng sa thôn ƀon, rgop n’hao nău geh, rgâl nău rêh nuĭh ƀon lan, nkre mât nău uĕh văn hóa n’hanh ntŭk ntô bri dak ƀon tơm Việt Nam.