Dak Lak dôl lăp tâm khay klêh sầu riêng. Êng đah nău khuh n’gôr, mô dơn nê geh rnôk khôl dôl kơt ăp năm bah năp nơh, năm aơ ntŭk tăch ƀư rĭng grep lơn. Nău tâm pit tăch rvăt ta mir hŭch ngăn, rnoh khlay đăp mpăn lơn, nuĭh joi rvăt n’hanh doanh nghiệp njrăng uănh  di na nê̆ tĭng nău tâm ton rvăt. Nău rgâl dja an mpơl saơ kloh nău tât bah nău ŭch geh tăch – rvăt, nău đă khăch khoch bah ntŭk rvăt n’hanh trong soih uĕh dơi dŏng. 

Ta buôn Jung, xã Krông Pắc, n’gor Dak Lak wa Y Thơm an gĭt mir sầu riêng bah rnăk păng dơn klêh geh nklăp 35 tấn, đêt rlău ăp năm bah năp nơh:

“Tă bah trôk nar mô dơh uĕh jêng du đêt mir play mô jŭr geh, săk play dŭt djơh rđĭl đah ăp năm bah năp nơh jêng tăch n’gluh năm aơ geh đêt jêng rnoh khlay mâp âk jêr jŏt. Gâp nchrăp tăch klŭp lah dơi ri 40.000 - 50.000 prăk/kg.”

Mô dơn mir wa Y Thơm, âk rnăk ta Krông Pắc, Krông Năng mô lah Cư Kuin tâm ban kơt nê đŏng. Lah kơt năm e nơh bu tâm pit nchăm rvăt, rnoh khlay rgâl tĭng nar, ri aƀaơ ntŭk tăch rngơt rngăt mpơl kloh. Rnoh săk kah play hŭch ƀư doanh nghiệp ân njrăng uănh di na nê̆. wa Lê Anh Trung, Kruanh Hiệp hội Sầu riêng Dak Lak, rblang năl: ntŭk tăch Trung Quốc – trong tăch luh tơm – hŏ êt lhăt trong rvăt n’glăp đŏng. Lah ntơm nơh bu hăn rgum joi ndơ rvăt tĭng trong glăt ri aƀaơ, quy định mpeh mã mbrô nkual tăm, ntŭk nklâm tâl n’hanh ƀoi tơm luh nău kan rgum joi rvăt ân lăp tâm trôm nduar. Ndrel đah nê, Ngih dak n’gluh an dŏng quy định nuĭh joi rvăt ân đăng ký tăch rgâl n’hanh ndơ̆ prăk sŏk soăy rnôk tăch rvăt sầu riêng. Wa Lê Anh Trung lah rjăp:

“Nuĭh ŭch hăn joi rvăt sầu riêng ân đăng ký tăch rgâl geh ndơ nkol. Lah mô, rnôk nhih pah kan sŏk soăy mô lah công an ban saơ mbra geh rmal dŭt jru. Ntơm bah nar 1/7, nău kan tăch rvăt ân ndơ̆ prăk sŏk soăy 5%, rnoh rmal an ăp nuĭh tih mô đêt ơm. Yor geh trong soih aih kloh rvah, ntŭk tăch năm aơ đăp mpăn lơn, mô hôm geh nău tâm rtuh lŭng kơt ntơm nơh.

Đah nău rgâl mpeh siƀŭt an tâm di, ntŭk tăch n’hanh lĕ ma nău mha êng khay klêh mhe, nô nău bu ntlơi prăk nchăm lor, tâm pit rvăt khôl dôl khay klêh sầu riêng năm aơ hŏ hŭch. Ƀon lan rgâl nău mĭn, gĭt kâp rnôk tăch. Wa Nguyễn Công Điềm, xã Ea Knuêc, n’gor Dak Lak uănh năl:

“Ăp năm bah năp nơh rnoh khlay jŭr hao rgoh n’gơ, năm aơ nơm geh nhih pah kan mât uănh n’hanh doanh nghiệp Ngih dak lăp kan, ntŭk tăch rgâl đăp mpăn âk lơn.”

Wa Lê Đăng Minh, xã Quảng Phú, n’gor Dak Lak nkoch:

“Năm aơ gâp hăn joi rvăt tâl 5, rnoh âk nchroh geh 20 tấn. Tât rnôk dja hŏ geh dơi kơt nău mpŏng đŏng, săk sầu riêng mbâl, rnoh khlay 70.000 prăk/kg”.

Aƀaơ lam n’gor Dak Lak geh nklăp 40.000 hec-ta sầu riêng, rlău 26.000 hec ta an geh klêh play, rnoh âk năm 2025 nchroh geh 392.000 tấn, ntoch jong ntơm bah khay 8 tât khay 10. Gay đăp mpăn di rnoh tăch n’gluh, UBND n’gor hŏ n’gluh an dŏng nău ntrŭnh mpeh mât chăm n’hanh tăch sầu riêng năm 2025, đă ăp ntŭk mât lhăt mã nkual tăm, ntŭk nklâm tâl, groi nđôi đăp mpăn kloh uĕh ndơ sa, njrăng bah mpet rnoh khlay. Wa Nguyễn Minh Huấn, Giám đốc Sở Nông nghiệp n’hanh Môi trường n’gor Dak Lak, lah rjăp:

“Sở kan nsum đah UBND ăp xã, phường n’hao nău gĭt mât êng săk kah, ntĭm nti mât chăm bên di đah rgâl duh nđik trôk nar; n’hao dăng ôp uănh srăch uĕh ndơ sa, mã mbrô nkual tăm, ntŭk nklâm tâl sầu riêng tăch n’gluh.”

Năm klêh play 2025 mbra ƀư nuĭh ƀon lan tăm sầu riêng Dak Lak mô hŏ di nuih n’hâm yor nsĭt geh wăng sa hŭch. Yơn mpeh jŏ jong, rnôk săk kah ndơ, nău way tĭng jăp bah ntŭk tăch rgâl jêng đăp mpăn, mbra kơl ndơ tăch dja hun hao nâp dăng, der bah “hao khlay pŭk dŭng” n’hanh rƀŏng tât rnoh khlay ta ntŭk tăch rgâl lam ntŭr neh.