Ta năp nĕ, ta thôn 5, (xã Lộc Quảng ơm), aƀaơ lah xã Bảo Lâm 1, n’gor Lâm Đồng ntoh geh âk mpôl sŭr bâh du rnăk lĕ khĭt đah ăp nău saơ bôk năp lah duh săk, mô ŭch sa, rgănh lêt. Ntuk kan têh ta ntŭk ngăch ndăn uănh năl, nău geh năl mpôl sŭr aơ lĕ ntưp đah kaman ji ndul djroh sŭr châu Phi lĕ ngeh ƀư tâp jăng tĭng nău ntrŭnh, njrăng rdâng đah nuh srê. Lâm Đồng aƀaơ geh lĕ dĭng lĕ rnoh sŭr ntưp srê rlău 1 rkeh 300 rbăn mblâm. Gay ma mât đăp mpăn nău kan njrăng rdâng nuh srê ju ndul djroh sŭr châu Phi, UBND n’gor Lâm Đồng đă ăp ntŭk kan, ăp n’gâng kan geh tât n’hanh UBND ăp xã phường, đặc khu ta n’gor leo kan, mbơh tơih răng dăng, tâm ban, geh săk rnglăy ăp nău kan njrăng, rdâng nuh srê, rgum lĕ ăp rnoh kan gay ma njrăng an bah ăp ntŭk nuh srê, mô an ntưp rêng. Săm ƀŭt nrŭnh bâh UBND n’gor lah na nê̆, Kruanh UBND ăp xã, phường, đặc khu dơn kan ta năp pháp luật lah geh nău tih mô mât njrăng, mô dơn kan tâm nău leo kan, ntĭm đă an geh nuh srê ji ndul djroh châu phi ntưp rêng âk, khuch khat âk ta ntŭk.