Nar ntri (8/10), ta n’gor Dak Lak, Bộ Nông nghiệp n’hanh Môi trường kan nsum đah UBND n’gor Dak Lak ƀư Tâm nchră “Sơ kết tuch tăm mât rong, mât njrăng si tăm năm 2025 n’hanh an ƀư trong nchrăp tuch tăm mât rong năm 2026 nkual Duyên hải Nam Trung Bộ – Tây Nguyên”. Năm 2025, bol geh tât khuch bah trôk nar n’hanh ăp nău rgâl tâm nuĭh kan lôch tĭng ƀư n’gâng kan bar gưl, nău kan tuch tăm mât rong lam nkual nha hôm mât dơi jâng nsan hao đăp mpăn đŏng.

9 khay bah năm 2025, nsĭt geh tăch n’gluh cà phê geh bơi 7 rmen USD, bum biăp play do rlău 6 rmen USD, găr điều rlău 3 rmen USD. Ntơm bah ngăn geh cán bộ tuch tăm gưl xã, âk n’gor dăn đă Bộ Nông nghiệp n’hanh Môi trường ntop kơl ntĭm nti tay, kơi năp nti nău way blău kan; ơm wat jêh ntĭm nti ƀư ăp siƀŭt tâm pă gưl lôch n’glăp nsum. Wa Hoàng Trung, Thứ trưởng Bộ Nông nghiệp n’hanh Môi trường nchih nkah ăp nău rgop ta tâm nchră, an lah nkra bah ăp nkô̆ nău hŏ nkoch lah nău ŭch geh jăch ndăn gay đăp mpăn ăp suan dăng tuch tăm ta Tây Nguyên- Nam Trung Bộ dơi ntik n’hao.