Ôi ơm jêh phŭt, mpông jay gưl 4 mhe dơi ur sai yuh Nguyễn Thị Xuân ta thôn Hòa Mỹ, xă Xuân Cảnh ntưm tay đah 35 rkeh prăk ntêm lôch du năm lĕ mpăr chor. Mô năn rngot, yuh nô lŏ koaih rwach, ndăl tay tĭng mpơng mpir hôm e n’glơi gay geh ntŭk nde mih, ndeh duh. Nău răm rhơn tât rnôk yuh tăng nău mbơh mbra dơi ntop kơl 10 rkeh prăk bah xă gay ntưm tay chor jay.

Aƀaơ bah năp măt ngăn an rwăt ngói sĭt ntưm bar jay bah lơ lor. 2 mpông jay bah lơ geh ntŭk gŭ lor, hôm ƀa ƀă mbrơi brơi mĭn tay, geh prăk ri ƀư tay, mô geh ri ƀư bah kơi.

Mô knŭng jay ƀon lan, ntung trong khlay geh khuch khat hô. 81 n’gâng điện chôt pă, bơi 400.000 nuĭh roh điện. Nău kan điện mbơh ƀư dâl bơi 900 nuĭh, rlău 50 ndeh, tâm pă nuĭh măng nar. 3 nar bah kơi, điện plơ̆ tay lĕ rngôch nkual mpeh bah lơ nhâp nar. Wa Trần Văn Thuận-Giám đốc Công ty Điện lực Dak Lak an gĭt:

Ngăch mpôl hên n’gluh an tâm 3 nar an pơk điện tay 100% nuĭh nkual mpeh bah lơ nhâp nar.

Ta ăp ngih samƀŭt, rlău 70 jrô nti, 26 ntŭk ngih samƀŭt geh plôk chor, chah bil. Wa Nguyễn Hồng Huệ, Hiệu trưởng Ngih sambŭt Mầm non Xuân Quang 1, ngoăy tâm âk ntŭk ngih samƀŭt geh khuch khat hô bah xă Phú Mỡ an gĭt, mô kâp ntĭm rđău, nai, me bơ̆ ndrel rmôt tahen-công an ta ntŭk lĕ ngăch lăp mkra khuch khat.

Rgŏ jă ăp nuĭh bah rmôt Tahen, công an tât ntop kơl an ngih samƀŭt, đah ăp trong gay jêh an kloh uĕh ntŭk ntô gŭ am gay ăp mon hăn nti tay đăp mpăn.

Măng phŭt hô ƀư khuch khat âk, ri tât kêng măng, rmôt bôk năp ta ăp ntŭk bah Dak Lak lĕ geh măt dâl ta ăp thôn ƀon geh khuch khat hô. Rmôt Cảnh sát njrăng n’gang puh nsĕt ŭnh sa n’hanh wơt kơl rmanh mbơh ƀư eduk mpan, rse wơt kơl, duk mpan, ndeh rklư rdêng nuĭh ƀon lan n’hanh ntop kơl rdâk ƀư ngih wâl. Thượng tá Phạm Ngọc Vinh, Groi kruanh jrô Cảnh sát njrăng n’gang puh nset ŭnh sa n’hanh wơt kơl Công an n’gor Dak Lak nkoch:

Jêh rnôk phŭt hăn rlău, rmôt jrô canhr sat njrăng n’gang puh nsĕt ŭnh sa n’hanh wơt kơl n’gor tâm rgop đah ăp rmôt geh tât mbơh ƀư rhiăng cán bộ ndrel ndeh rklư gĭt tât ăp ntŭk ntop kơl kônh wa ƀon lan. Ta năp rgum mbơh ƀư soih kol trong hăn, ăp ngih samƀŭt, ntop kơl ăp nuĭh ndrô ranh, ăp nuĭh dơi kơl, ăp jay lĕ rlâm, plôk ngói gay ntop kơl kônh wa mkra jêh phŭt.

Tĭng rnoh kơp bôk năp, khuch khat lam n’gor rlău 2 rbăn rmen prăk. N’gor rlak rlău 80 rmen prăk ntop kơl an ăp rnăk geh nuĭh khĭt, rlâm jay, jay plôk chor; nkre rgŏ jă rmôt công an, tahen tât tĭng thôn ƀon kơp tay chor tôl, rdâl ƀư n’hưp choang, đăp mpăn dak kloh, dak si, njrăng n’gang srê. Kruanh UBND n’gor Dak Lak Tạ Anh Tuấn lah rjăp:

Aơ lah nău rlong bôk năp đah n’gâng kan ƀon lan 2 gưl tâm trong njrăng kan trôk nar. Mpôl hên saơ n’gâng kan ƀon lan 2 gưl tâm rnôk ƀư hô aơ lĕ ngăch lơn, na nê̆ lơn n’hanh ngăn ngên săk rnglăy lơn. Aƀaơ dôl rgum mkra khuch khat ntung trong, điện, dak si gay mô an ntoh nuh srê, nkre ntop kơl rnăk geh rlâm jay, plôk chor gay ơm đăp mpăn nău rêh.

Tâm rnôk uănh nđôi ta ntŭk, Groi Thủ tướng Chính phủ Mai Văn Chính djôt dơn nău nchrăp, ndăn bah Dak Lak, lơn lah nău trơn nuĭh ƀon lan nkual mô nâp, rmôt công an, tahen, điện lực jŭr ta ntŭk jêh phŭt.

Ndơn măt Chính phủ, Thủ tướng Chính phủ gâp rnê n’gor Dak Lak, nchrăp lor, nsrôih njrăng n’gang phŭt mrô 13. Gâp saơ rmôt điện lực, công an, tahen jŭr kơl gay mkra ăp tơm si chôt jêh nĕ ngih wâl an ƀon lan n’hanh ăp ngih samƀŭt, ăp đồng chí ƀư uĕh. Đă ăp đồng chí kơp uănh tay, kơp tŏng ăp na nê̆ khuch khat gay geh tâm ôp tâm nchră dăn đă ntop kơl prăk gay mkra.

Phŭt mrô 13 geh dŭt ngăch, soan phah dăng, ntŭl rlong lĕ dơi saơ bah dŭt ơm đah trong chính trị n’hanh nuĭh ƀon lan Dak Lak. Rlău ntŭl rlong nĕ, n’hâm soan bah n’gâng kan ƀon lan 2 gưl lĕ dơi mĭn lah, nĕ nău nchroh mbơh di nu nău; pơk dŏng nchrăp lor, ta năp măt, ngăch dơh, êp ƀon lan. Aơ lah nău an saơ gay n’gor mât uĕh, rlet rlău tay ăp ntŭl rlong êng ta trong hăn ndâk ƀư du trong n’gâng kan ƀon lan na nao, săk rnglăy.