Nkual ƀon lan rnoi đê̆ nkuăl gôl yôk Khánh Vĩnh (ơm) ntơm geh nău rêh ach o, ƀon lan rêh knơm ta ndơ tuch tăm way ơm, kan jê̆ nchrai, kan êng dŏng êng. Năuleo ƀư pah kan tĭng nkual way tăm kan nsum kơt lah mô hŏ geh njêng. Âk rnăk hôm nha ƀư tuch tăm tĭng nău way bên, mbu dơi mbu ƀư dơm.

Tâm rnôk nĕ, nău kan tâm rgop đah Công ty TNHH tăch ndơ an dak bah dih bum play n’hanh ndơ tuch tăm Ngân Nguyễn đah 23 rnăk ƀon lan rnoi đê̆ ta xã Khánh Vĩnh tăm rlău 20ha play bŭng ntô nđir lĕ nsĭt tay âk nău geh săk rnglăy dŭt ueh ngăn. Công ty pă ntil, phân poh, dak si mât tơm tăm, nti kĩ thuật mât tăm, nkre lah rvăt lĕ ndơ geh ƀư. Ăp rnăk ƀon lan geh nti nău kan mât chăm, poh phân an tâm di rnoh, nchih nar kan nar mât chăm. Aơ lah nău ntơm nơh ƀon lan kan lŏ mir mô nă geh mât uănh. Nău doanh nghiệp tât râng dâl bâh ntơm kơl an ƀon lan pah kan jan sa geh nău nchrăp kan na nê̆, der bah nău mô jêng mô play năm geh năm roh, mô lah rmeh âk ir . Wa Nguyễn Thị Ngân, Giám đốc Công ty TNHH tăch an dak bah dih bum play Ngân Nguyễn an gĭt: "Ƀư tĭng bôk nău kan ntĭm nti nău kan mpeh mât tăm,lĕ rngôch ăp ntil phân poh n’hanh dak si nkhĭt puh tu ndrŭng lĕ geh ăp kĩ sư n’hanh oh nô tâm ntŭk tuch tăm mbơh tơih an ƀon lan mpeh tu tơm. Nkre lah mbơh rblang an ƀon lan gĭt lah he dŏng kloh ueh rĭ păng dŭt ueh ngăn, bum play kah đŏng. Pă an ăp ntil ndơ kloh ueh gay ma ƀon lan an geh n’hao ƀư, ƀon lan geh gĭt n’hanh bên đah nău rgâl mhe rnoh pah kan ntil ndơ kloh ueh”.

Lôch bơi tât 2 năm mbơh tơih tâm rgop ƀư, đah nău kơl an bâh Bôk nău kan nkô̆ mpŏng ngih dak, nău kan aơ lĕ an nău geh dŭt ueh. Tơm play bŭng têh jêng ueh, lăp ta rơh tăch rgâl đăp mpăn. Âk rnăk ƀon lan nuĭh Raglai, Rđe ntơm nơh kanŭng tăm bum, mbo, aƀaơ lĕ jêng tăm tơm geh rnoh wăng sa khlăy lơn, rnoh geh hao rlău 2 , pe tơ̆ đah ntơm nơh. Mô dơn kanŭng tâm rgop đah doanh nghiệp, ta xã Trung Khánh Vĩnh (ntơm nơh lah xã Khánh Trung, nkuăl Khánh Vĩnh ơm), nău kan tâm kơl kan tuch tăm ueh kloh Khánh Trung lĕ geh pah kan geh săk rnglăy. Nău tâm kơl kan aơ geh rlău 20 nuĭh kan ndrel đah nău leo pah kan tuch tăm n'hanh pă ăp ntil ndơ ngêt sông, nchoăn rdeng, ndơ dŏng tuch tăm, ntŭk gŭ rlu an năch pâl nđaih.

Nău tâm rgop đah ăp nuĭh kan ndrel mô dơn kơl n’huch prăk kan ma hôm nha kơl nău tăch rvăt ndơ tuch tăm tĭng rmôt, n’hao nău geh ntil ndơ. Nău dŭt nkah lah ntŭk kan tâm kơl kan aơ ndrel đah nău pah kan tuch tăm đah hun hao nău kơl kan. Ntŭk kan tuch tăm Hoa Quả Sơn bâh wa Lê Thị Kim Thanh lah du nău ntĭt. Bâh ntơm kanŭng geh tăm tơm sa play, wa Thanh geh nănh rgâl ƀư tuch tăm tĭng trong kloh ueh tâm rgop đah pâl nđaih ta ntŭk rêh jêng. Năch tât khâl ntŭk tuch tăm geh pĕ lêh ta mir, geh gâm sa, rlu rlău ndrel đah rnăk vâl nuĭh ƀon lan ta ntŭk. Wa Lê Thị Kim Thanh ngơi, ăp nău kan lĕ yor nuĭh kan ndrel ta Hợp tác xã dơn mât nău kan. “Tâm HTX geh nău tâm rgop dŭt na nê̆, kơl kan an năch tât đah Trung Khánh Vĩnh aơ mbra geh kơl an lĕ rngôch bâh nău rvăt năp, dŏng ndơ. Bâh nău kan HTX aơ geh tâm rgop lĕ rngôch ăp nuĭh geh tâm nău ŭch dŏng n'’anh nău dơh nơih kơl an năch pâl nđaih, mô dơi blău da dê, ăp nuĭh dơn mât leo du nău kan gay ma tâm rgop kan”.

Bâh ăp nău kan jê̆ yơn săk rnglăy an saơ lah dŭt têh, tâm rgop lah nău kan mpông lăp  gay ma kơl an ƀon lan rnoi đê̆ rgâl trong pah kan jan sa. Rnôk ƀon lan ndrel leo pah kan jan sa, ndrel geh ƀư tăch rgâl ndơ rĭ rnoh khlăy ndơ tuch tăm geh n'’ao âk, n'’ao nău tâm kơl geh bun dăp lơn. Ndơn an yor ƀư êng, ƀon lan ntơm ƀư bên đah trong pah kan, mât đăp mpăn nău ueh di n’hanh nău ŭch ta ntŭk tăch rgâl.

Tât râng tâm rgop kan ndrel an geh nuĭh ƀon lan ƀư tĭng mpeh kỹ thuật, geh nău dơn kan đah ntil ndơ nơm geh ƀư. Bâh nĕ njêng trong pah kan jan sa, tăch rgâl mpôn, n’hao nău dơi nău knơm ndơ tuch tăm ta gôl yôk ta ntŭk tăch rgâl. Khlăy ngăn lơn, ăp nău kan aơ dôl ntop ƀư na nê̆ lơn nnăukan nkô̆ mpŏng ngih dak hun hao nkual ƀon lan rnoi đê̆; tâm nĕ, hun hao nău rêh jêng, pă nău kan n'hanh n'hao nău dơi geh lah năukan tơm khlăy ngăn.

Wa Nguyễn Ngọc Sơn, Groi Giám đốc Sở Dân tộc n’hanh Tôn giáo n’gor Khánh Hoà, uănh năl, tât aƀaơ, ƀon lan mô hôm geh dơn du ding ma geh đă an đor lor, geh nău dơn kan, bâh nĕ njêng nău bên pah kan jan sa na nê̆, nâp nâl. “Ngih dak mô kơl lĕ rngôch ma ƀon lan an geh tâm rgop, đor lor du gưl gay ma ƀư tĭng nău kan. Gâp mĭn lah du trong kan dŭt ueh ngăn gay ma rgâl nău gĭt mĭn, rnôk ma nuĭh ƀon lan geh prăk bâh nơm tâm nĕ, khân păng mbra geh nău dơn kan lơn đah drăp ndơ geh kơl an. Aơ lah trong kan dŭt ngăch gay ma ƀon lan gĭt vât, ƀư tơm n'hanh dăch bên đah nnăupah kan jan sa"”

Gôl yôk n’gor Khánh Hoà dôl geh ăp nău rgâl mhe ueh. Rnôk ma doanh nghiệp, hợp tác xã n’hanh nuĭh ƀon lan ndrel nsum ti tâm rgop kan rĭ nău kan tuch tăm mô hôm lah nău kan ƀư êng. Ndrel pah kan jan sa tâm rgop lĕ jêng trong kan nsum, kơl an ƀon lan rnoi đê̆ hun hao ƀư tơm nău rêh jêng, tă njoat geh hun hao nâp nâl.

Thái Bình