Pôa Sa (hdroâng Rơđế, 73 hơnăm) rơtế ƀă khu ngê̆ nhân a Ƀuôn Driah, cheăm Čư̆ Né, tơring Krông Ƀuk, kong pơlê Dak Lak veăng ai mâ a rôh po mơdĭng ƀă mâu ƀai ki tŏn chêng koăng knah, hlŭm rơvŏng đing năm ƀă hơdruê ei rei. Pôa Sa tối tơdroăng ki ro xua hiăng châ mơhno tâi ki ƀriê tung hiâm mơno hâk tơngăm tơbâ 50 hơnăm Ƀlêi trâng Ƀuôn Ma Thuột ƀă Po mơđah tơbleăng kơphế Ƀuôn Ma Thuột rôh má 9.

“Veăng a po tơbleăng kơphế Ƀuôn Ma Thuột kố phiu ro khât ƀă rêm rôh ai po xah hêi ro môi tiah kố Khu ngin hmâ veăng tŏn chêng koăng. Xuân môi tiah mâu vâi pú hơnăm ối nếo droh rơtăm vâi hâk vâ kơhnâ khât veăng rơtế ƀă khu ngê̆ nhân ki tŏn chêng kơlá, chêng hlái rơtế ƀă tơdroăng ki hơniâp ro dêi rôh po tơbleăng. Ngin hơnăm hiăng hên ƀă hnê chôu ‘măn ăm mâu vâi muăn kuăn cháu pơtối rak vế túa lĕm tro khôi hmâ. Troh akố hlo ro khât, ai hên tơdroăng pơhlêh tâ tâng vâ pơchông ƀă hdrối, mê tung pơlê cheăm xuân tiah mê há. Tơdroăng rêh ối mơnhông tơtêk tâ nếo, tơmeăm pêi lo ing chiâk deăng môi tiah kơphế, tiu, kơxu pơrá kơnâ, kuăn pơlê roê rơxế lĕm, roê tơmeăm nếo xúa tung hngêi, bô bố pơrá hơniâp ro”.

Leh mơđah tơbleăng kơphế Ƀuôn Ma Thuột rôh má 9, po sap ing hâi lơ 9 troh lơ 13/3, ƀă 17 tơdroăng châ tơkŭm po xiâm. Mơdĭng rế cho tơdroăng ki vâ ô eăng kơvâ kơphế, rế djâ troh mâu tơdroăng ki châ ngăn ki lĕm tro ‘na ki xú hŏm lĕm ƀă túa lĕm tro kơphế, tơdrêng amê hlối po rôh ki tơ’lêi hlâu vâ tơdjêp, mơnhông, tối rơdêi “Ƀuôn Ma Thuột cho tíu troh dêi kơphế lâp plâi tơnêi”.