Troh nôkố hiăng ai lối 500 to kuăn kơphế a pơlê kong kơdrâm chêh inâi gum ăm ôu kơphế tê kơtê iâ hlái tung môi hâi lơ 10/3 ƀă dâng 200 rơpâu kơ’lo kơphế ăm ôu tê kơtê. Rơtế amê, tung mâu hâi ki po leh mơdĭng (sap ing lơ 9 troh lơ 13/3), kô ai lối chât tíu a pơlê kong kơdrâm Ƀuôn Ma Thuột tơbleăng tơdroăng ôu kơphế tê kơtê môi tiah a rôh po kơchơ tơbleăng tê tơmeăm pêi lo ing chiâk deăng, tơmeăm OCOP pơlê kong kơdrâm Ƀuôn Ma Thuột, troăng Tôn Đức Thắng, bêng Tân Lợi; Troăng Sách Cà phê Ƀuôn Ma Thuột kơxô̆ 2, troăng Phan Chu Trinh, bêng Thành Công; troăng Phan Đình Giót ƀă Plông kân 10/3.

Tơdroăng ki tơkŭm po ăm ôu kơphế tê kơtê ôh ti xê pro tơmối hâk vâ ôu mâu tơ’lo kơphế ki kơhiâm lĕm mê ối veăng gum mơdêk ki kơnía inâi kơphế Ƀuôn Ma Thuột a kong têa ê.