Mâu hâi apoăng hơnăm nếo kố, Kơpong ôm hyô túa lĕm tro pơlê pơla Akŏ Tam, pơlê kong kơdrâm Ƀuôn Ma Thuột, kong pơlê Dak Lak hiăng hlo to mâu tơmeăm khoăng ki tơ-eăng lĕm, kơdrâm ro khu tơmối achê hơngế troh a tíu kố. Nâ H’Drim Ayun, ngế ki cheăng tung kơpong ôm hyô kố tối ăm ‘nâi:

“A hngêi trá xŏn kố ai tơdroăng ki hmâ tơrŭm hơdruê xoăng, ôu drôu xiâm po sap ing hâi má 1 troh hâi má 5 Têt. A tâi tâng mâu kơpong kố pơrá ai mâu tơdroăng ki mơđah ăm tơmối mot ôm hyô. Tung roh po mâu tơdroăng xah ôm hêi kố, pin vâ tơbleăng tối ‘na túa lĕm tro dêi hdroâng kuăn ngo cho hdroâng Rơđế troh a tơrêm ngế ƀă mâu tơdroăng kố vâi tơmối hâk vâ ngăn, vâ hlo ‘nâng, xuân ôh ta xê la lâi xuân ai roh ki vâ châ hlo, châ ngăn khôi túa lĕm tro dêi mơngế Rơđế a kong pơlê, pơlê kong kân kố, mê á hơniâp ro ó khât koh tơdah mâu vâi tơmối troh a roh Têt kố”.

Cho môi tung mâu ngế tơmối ki rah vâ lăm troh ôm hyô a kong pơlê Dak Lak, cho tíu ki apoăng troh ôm hyô tung mâu hâi apoăng hơnăm nếo, ngoh Nguyễn Thiên Đăng, lo ing Đồng Nai hơniâp ro sôk suâ ai tối tiah kố: Mâu hâi pơla hdrối kố nah, ôh ta xê to châ ngăn, châ hlo ki lĕm ro dêi kong kế, nhâ loăng ki drêh ngiât, mê ngoh ối ai roh ki tơ’lêi vâ châ ngăn, châ hlo mâu tơdroăng ki po hơniâp ro tiô khôi túa, vêa vong kố. Maluâ drêng roh apoăng châ mot ngăn tung khu ki tôu chêng tôu koăng, châ veăng kơhnhon xuăng tiô khôi hmâ, vêa vong, châ ôu drôu xiâm achê kơnoh on.

“Ing mê âi troh nôkố, á xuân hiăng prôk tâ tá, châ tơmâng khu ki tôu chêng koăng, châ ôu drôu xiâm, châ kâ mâm pôh akố hơniâp ro ó khât ƀă á hâk vâ khât ƀă túa kơhnhon xuăng akố”.

Ƀă nâ Huỳnh Thị Thủy, maluâ rêh ƀă pêi cheăng a kong pơlê Dak Lak tung hên hơnăm, la hơnăm kố, rơpŏng nâ xuân ối vâ lăm troh a ƀuôn Akŏ Dhông-cho pơlê ki ôí tung kơphô̆ vâ lăm xah ôm hêi. Nâ ai tối, kố cho túa cheăng ki lĕm ro má môi vâ vâi hdrêng châ ngăn, châ hlo ƀă hâk mơnê dêi khôi túa, vêa vong hdroâng kuăn ngo tơná.

Laga, tơdroăng ki châ ngăn, châ hlo khu vâi krâ tôu chêng tôu koăng, veăng châ po mơdĭng lơ châ kâ mâu mâm, kơchâi ki kơhiâm dêi hdroâng kuăn ngo ing mê, thăm rế pro vâi thăm rế hâk git tâ nếo ‘na khôi túa, vêa vong dêi hdroâng kuăn ngo.

“Têt hơnăm kố, á xuân djâ dêi on veăng, rơpŏng hngêi lăm troh ngăn a kpơong ôm hyô kố tung pơla mâu hâi Têt ro rih. Tiú ki kố ai hên tơdroăng cheăng rế vâ pơtroh khôi túa, vêa vong, rế vâ mơhno ăm khôi túa chal nếo. Ai chêng koăng, châ hlê plĕng nhên ‘na khôi túa ôu drôu xiâm. Á pói rơhêng vâ tâi tâng rơpŏng hngêi á rơtế ối akố rơtế vâ châ hlê plĕng nhên ‘na khôi túa, vêa vong dêi kuăn ngo. Pin rêh ối akố mê pin kal athế hlê plĕng nhên ƀă mâu vâi kuăn pin xuân châ hlê plĕng, ‘nâi nhên mê Têt cho roh ki tơtro má môi ăm tơdroăng xah ôm hêi a tíu kố”.

Rơnó Hơngui a Dak Lak ôh ta xê to tíu ki ai hyôh kong prâi rơngiâp lĕm, hơniâp ro, mê ối cho roh ki vâ ăm rêm ngế châ tơrŭm dêi pó, châ hlê plĕng, châ ‘nâi, châ pơtối rak vế khôi túa, vêa vong dêi hdroâng kuăn ngo a tíu kố. Kuăn pơlê ƀă tơmối pơrá hâk nâ sôk suâ châ hlo, châ ngăn môi rơnó hơngui ki hơniâp ro, tíu ki ai túa lĕm tro ƀă kong kế, nhâ loăng ki tơtro dêi pó, ing mê, chôu ‘măn mâu tơdroăng ki chôu vế, tơbâ ăm, ôh tá la lâi kâi piu.