Rôh mơ’nui hơnăm pơla hdrối kố nah, kuăn pơlê hdroâng kuăn ngo Pa Cô a kơpong kong a ‘ngêi A Lưới tơkŭm troh a Pơlê Mơhno túa lĕm tro dêi mâu hdroâng kuăn ngo tơring A Lưới, a tíu xiâm cheăm Hồng Thượng, hơniâp ro vêh mơhno tơdroăng po mơdĭng Aza Koonh. Kố cho hâi Têt khôi hmâ, rơkâu xối ăm tơdroăng phâi hơtôu, kro mơdrŏng kân má môi dêi mơngế Pa Cô ƀă kuăn pơlê hdroâng kuăn ngo ki rêh ối a ngo Trường Sơn. Hdrối vâ po mơdĭng, mâu krâ pơlê tung hdroâng hdrê kô troh a rêm rơpŏng hngêi vâ rơkâu xối ivá ăm mâu ngế tung rơpŏng hngêi. Klêi kơ’nâi tơkŭm po klêi mâu tơdroăng ki pêi pro tung hngêi, mâu rơpŏng ƀă hdroâng hdrê tung pơlê djâ kế tơmeăm rơkâu xối troh a Hngêi Trá vâ xối pleăng tơdjuôm dêi pơlê.

Tơdroăng rơkâu xối tung mơdĭng Aza Koonh dêi mơngế Pa Cô ai mâu tơdroăng pêi pro môi tiah a kơ’nâi kố: Mơdĭng xut xêa, mơdĭng hbrâ rơnáu tơmeăm, mơdĭng krếo mơhúa báu, mơdĭng rơkâu xối mâu hdrê pêt, mơdĭng rơkâu xối mâu ngế ki hiăng hlâ, mơdĭng kâ báu nếo, mơdĭng pơcháu kế ki ‘măn chôu mâu kế kâ ƀă hên ki ê. Pôa Lê Tuấn Mỏ, krâ pơlê a thôn Ky Ré, cheăm Hồng Thượng, tơring A Lưới ăm ‘nâi:

“Tiô hmâ troh mơ’nui hơnăm, ngin tơno tơnêng, môi tuăn ƀă tâi tâng mâu tơdroăng ki po mơdĭng kế tơmeăm hbrâ rơnáu vâ xối pleăng ăm rôh po mơdĭng Aza Koonh. Tơkéa vâ tối cho tơkŭm tung rơpŏng hngêi xuân hôm, rơpŏng hngêi vâi hbrâ í lơ chu, klêi mê têk troh a tíu ki ai kơdrâm mơngế a Kuât kố vâ rơkâu pâ dêi pơlê ƀă krếo tâi tâng mâu rơpŏng, kuăn cháu tơkŭm vâ mơhno tơdroăng ki po mơdĭng kố”.

Ƀă kuăn pơlê kơpong a ‘ngêi A Lưới, mơdĭng Aza cho Têt khôi hmâ, djâ vế túa lĕm tro khôi hmâ dêi hdroâng kuăn ngo châ tơkŭm po rêm hơnăm, rôh mơ’nui hơnăm, hmâ a khế 12 âm lĭt, klêi kơ’nâi vâi krâ nhŏng o poê xo dêi mâu kế tơmeăm klêi. Tung pơla mê, rêm pơlê kô châ rah xo môi hâi ki lĕm má môi vâ tơkŭm po mơdĭng Aza. Mâu rơpŏng hngêi ƀă hdroâng hdrê tung pơlê pleăng hên tơmeăm rơkâu xối môi tiah kuăn kiâ ki kuăn pơlê vâi păn xêh. Pôa Hồ Văn Hạnh, krâ pơlê, kuăn pơlê Pa Cô ăm ‘nâi, mơdĭng Za cho tơdroăng ki rơkâu xối pâ tơdroăng phâi hơtôu, hơniâp ro, hơnăm nếo pêi cheăng kâ pon mơhúa tâ:

“Tung pơla pêi chiâk pêi deăng tơbrêi tơbrêh, mê troh mơ’nui hơnăm tơkŭm po mâu tơdroăng mơdĭng Aza tơdjuôm dêi tá hdroâng hdrê tung pơlê. Ing rơpŏng hngêi troh tâi tâng kuăn pơlê vâ rơkâu xối pâ mâu xeăng, mơnê mâu xeăng tung hơnăm hdrối ƀă rơkâu xối pâ mâu xeăng tŏng gum troh hơnăm kơ’nâi ah kong mê tro tôu ‘ló, báu, alâi dêi vâi krâ nhŏng o chiâng lĕm, châ hên mâu báu prá alâi”.

Mơdĭng Aza ôh ti xê to mơdĭng rơkâu xối pâ châ pêi lo hên tơmeăm mê ối ai hên tơdroăng kal ki ê môi tiah rơkâu xối pâ mâu xeăng ăm kuăn pơlê tung pơlê châ rêh ối tơniăn ro, pôi tá tro châi tamo. Mơdĭng Aza Koonh cho tíu tơkŭm chía hên mâu khôi túa lĕm tro ngê̆ thuât chal krâ môi tiah hơdruê xuăng, kơchuâ chêh ƀă hên ki ê djâ tơvế tơdroăng khôi hmâ, túa lĕm tro dêi hdroâng kuăn ngo Pa Cô. Jâ Lê Thị Thêm, Ngế ki pơkuâ Ƀơrô Túa lĕm tro tơring A Lưới, kong pơlê Thừa Thiên Huế ăm ‘nâi: mơdĭng kố châ rak vế môi tiah nah ki kơnía, ‘na túa tơkŭm pêi pro tung pơlê pơla.

“Tung pơla rak vế mâu tơdroăng po mơdĭng, mâu ngế ki châ veăng tơdrêng tung rôh po mơdĭng kố cho mâu ngế ki hlê plĕng ‘na khôi hmâ tŏng gum kuăn pơlê. Mâu ngế ki sap ing ton nah hiăng pêi pro mâu tơdroăng po mơdĭng vâ pêi pro, vêh mơhno mâu tơdroăng po mơdĭng kố a cheăm pơlê dêi tơring”.

Hâi Têt Aza ối châ khê̆n cho mơdĭng mơnê xiâm báu. Xua xiâm báu cho tơmeăm ki teăng mâ ăm tâi tâng mâu hdrê pêt ki ê hiăng ăm vâi krâ nhŏng o phâi hơtôu. Pôa Nguyễn Văn Hải, Phŏ Kăn hnê ngăn Vi ƀan tơring A Lưới ăm ‘nâi:

“Nôkố ai péa tơdroăng pêi pro, môi cho tơdroăng Aza ƀă péa cho tơdroăng Aza Koonh. Aza Koonh mê rêm hơnăm pơrá tơkŭm po la mâu túa ki rơkâu xối gá iâ tâ. A Za Koonh mê tơkŭm po tiah hmâ, 5 hơnăm lơ 10 hơnăm môi xôh, drêng vâi krâ nhŏng o châ xo hên tơmeăm pêi lo, tơdroăng rêh ối dêi pơlê châ phâi hơtôu, hơniâp ro, ivá mo sêi mê cho rôh kuăn pơlê mâu hdroâng kuăn ngo xuân môi tiah mâu pơlê, khu tơrŭm mơnê nôu báu xuân môi tiah mâu xeăng hiăng gum ăm hdroâng hdrê ai tơdroăng rêh kâ ối phâi hơtôu”.

Mơdĭng Aza dêi hdroâng kuăn ngo A Lưới ai túa ki rơkâu xối ƀă po mơdĭng. Tâi tâng pơrá djâ vế mâu tơdroăng ki pơxúa ‘na túa lĕm tro tơdroăng loi dêi pơlê pơla a tíu kong ngo Trường Sơn.