Tiô ngế kochuâ um, ngế ki châm điêm ‘na um, cho pôa Lê Thiết Cương tối, pah cho kuăn kiâ ki mơhno tối tơdroăng ki tơviah ki 11 to kuăn kiâ ki ê ôh ta ai. Um méa Pah ga vâ chê ƀă tơdroăng loi tĭng, tiô khôp Phop, khôi túa ki loi nhuô̆m pah cho tơdroăng tĭng chal vâi krâ nah dêi mơngế Xuăn ai 2 tơdroăng ki xiâm, vâi ngăn pah cho xiâm kối, hdroâng hdrê ƀă cho Xeăng Têa. Ôh ta xê to tơdroăng loi tĭng, mê ngế ki chuâ um ối tối tiah kố, hdroâng hdrê pah ối cho tơdroăng vâ mơhno tối ki ê há:

“Ất Tỵ hơnăm 2025, hơnăm Pah cho vâ mơhno tối, cho kuăn kiâ ki tĭng vâ mơhno tối tiah kố, khế 1 cho khế klá, khế 2 cho khế Miếo, khế 3 cho khế Prếo ƀă khế 4 cho khế Pah. Tơkéa vâ tối, tung 8 to kuăn kiâ mê cho: càn, khảm, cấn, chấn, tốn, li, khôn, đoài, mê tơdroăng ki loi tĭng má 1 cho tơkéa vâ tối plêng, cho khế má 4, khế Pah. Plêng akố, pó ‘nâi klê tiô kơ Xeăng ki mơjiâng plêng-tơnêi, mơjiâng pro, xuân cho vâ mơhno tối ‘na um méa, môi tơdroăng ki pói rơhêng vâ, môi rơkong rơkâu ƀă tâi tâng mâu ngế ngê̆ sih ki kơchuâ um mê cho hơnăm pah hiăng troh, athế hriâm plĕng tuăn ngôa ki lĕm tro dêi plêng tơnêi, tuăn mơno ki tơdrăng khât dêi Xeăng ki mơjiâng plêng tơnêi vâ ai mâu um ai ki nếo, lĕm ro, ai tơdroăng pơhlêh ki nếo”.

Mơhno tối mâu um ai ki gok gâ ‘na pah, mâu ngế kơchuâ um hiăng xúa mâu tơmeăm ki hên túa môi tiah um ki kơchuâ ƀă puâ kơlơr, chiê hlá mơ-éa, pong, rơgi a loăng, acrylic, kơchuâ bă têa sơng rơmâ, têa sơng ki pơklêp, mâu um meăn pro ƀă tơnêi hneăn, um pro ƀă meăm ƀă hên hĕng mâu túa um ki ê. Tâng ngế kochuâ um Lê Thiết Cương pro um ki meăn tơnêi ai 2 to um pah râng xo chư chêh dêi Kinh Bát Nhã mê ngế kơchuâ um Nguyễn Hồng Quang xuân mơhno tối um pah ki rơdêi pro ƀă tơnêi hneăng Hương Canh.

Ƀă túa ngăn ki rơkê khât, mâu ngế kơchuâ um ôh ta xê kơchuâ tối ki lĕm krip dêi hdrê pah mê ối pơtroh mâu tơdroăng ki trâu rơdâ ‘na tơdroăng rêh ối. Ngế kơchuâ um Hoàng Phương Liên tối ăm ‘nâi:

“Mâu ngế kơchuâ um ki mơđah tung hngêi ki tơbleăng um ngin kố, ai ngế ki kơchuâ um ƀă têa sơng rơmâ, ai ngế kơchuâ um tiô túa ki pơklep, la tâi tâng mâu tơmeăm um ki mê cho vâ mơhno tối pah cho kuăn kiâ ki têm, ƀă tơxâng mơjo pâ. Um ki á á hmâ chiê hlá mơ-éa pơklêp, cho túa um ki krê xêh. Á vâ pơtroh ăm rêm ngế um méa dêi pah ki châ kơchuâ phá, um rơpŏng hngêi pah á ga ai tá pah nôu pâ ƀă 3 pah kuăn. Á vâ mơhno pah cho um méa ki têm, ƀă achê tâ ƀă kuăn mơngế, pro kuăn mơngế ôh ta xâu kơ khu pah”.

Ƀă mâu túa ki chêh kơchuâ ki nếo, tơviah mê ‘na um pah, tung tơdroăng ki mơđah tơbleăng a hngêi mơđah “Tết Tỵ 2025”, hdrê pah kố chiâng tơdroăng ki lĕm têm, ƀă achê tâ ƀă kuăn pơlê. Ngế châ lĕm, hơduăng, chêh kơchuâ pro ếo pơtâk Ngọc Hân tối tiah kố:

“Hdrối nah, rêm ngế hmâ tâ xâu pah, xua mê, mâu ngế kơchuâ um tối tơdjuôm xuân chía kho ha tơdroăng ki tí tăng kơchuâ um pah. Laga, ƀă hngêi ki mơđah tơbleăng um a Rơnó Têt Tỵ hơnăm 2025 kố, pin kô hlo hên mâu um méa, mâu tơdroăng ki tơmiât pơrá phá dêi pó dêi mâu hdrê pah ƀă ulâi ulâ mê, pin kô hlo um méa dêi pah ga ‘ló hâk mơnâ, mâu um ki mê ai hên mơngiơk, cho mơhno rơnó Hơngui ƀă hơnăm nếo. Tơná Ngọc Hân xuân cho ngế ki hriâm chêh kơchuâ um, cho mơngế ki chêh pro um mâu hmân ếo, pơtâk, xuân ai tơdroăng ki hơniâp ro drêng xúa um dêi ngế kơchuâ um Lê Thiết Cương vâ bro mâu ếo xŏn ki lế lĕm”.

Ngế ki pơkuâ ngăn tơdroăng đŏng phim cho pôa Vương Đức ai tối tiah kố:

“Athế tí tăng ‘nâi mơnhên mê cho um méa, ‘na hâi khế hơnăm dế rế hiá rế prôk, hên tíu a mâu hngêi chuô pơrá hlo vâi ai tơdroăng xối tĭng kơ khu hdrê pah, pin athế prôk troh a mâu tơdroăng ki pon mơhúa mê. Á tơmiât mâu ngế kơchuâ um hơnăm kố vâ mơhno tối hiâm mơno tơná tung pơla khế hơnăm dế pơtối prôk, um méa “Plâ rơxông erêh” kơchuâ 2 to pah dế tơlŭm dêi pó chiâng môi to um ki kơđêp, 1 to um tơvó, pakĭng mê cho mâu hlá loăng ƀă ki rơhêng vâ tối cho péa pâ mâ ki ó rơdêi, cho vâ tối ‘na tơdroăng ki ôh tá la lâi kâi hía tơdroăng rêh, tơdroăng ki pơtối đi đo dêi tơdroăng rêh”.

Ôh ta xê to mâu um méa kơchuâ bro ‘na hdrê pah, mê hngêi mơđah tơbleăng kố ối pơtroh môi to kơbong ki ai mơngiơk hên túa, mâu um ki pro hên méa pơrá phá dêi pó. Ing pơlê cheăm ki tơniăn dêi ngế kơchuâ um Nguyễn Thanh Quang, mâu um ki ôh ta xê tơdro, reăng ki ai mơngiơk lĕm. Um dêi ngế kơchuâ Bình Nhi; mơngế ki ngăn, châ mot ngăn kơpong ki ai reăng mai, reăng mâ̆n kong ngo a’ngêi dêi ngế kơchuâ um Vương Linh, tơdroăng ki hơniâp ro lo lăm xah hêi a rơnó Hơngui dêi ngế kơchuâ um Việt Anh prế Hoàng Phương Liên ƀă hên mâu um ki ê ing mê, mơjiâng chiâng mơngiơk, kơlơr ki pêng păm tung mâu tơdroăng ki hơniâp ro mâu hâi apoăng hơnăm 2025.