Môi hâi pêi cheăng dêi nâ Phan Thị Lý, chuyên viên Ƀơrô cheăng kâ cheăm Quảng Phú, kong pơlê Dak Lak hmâ ton sap ing kơxo má troh kơxê măng. Hnoăng cheăng dêi môi ngế chuyên viên pơkuâ 'na rak ngăn liăn ngân, mơ'no liăn cheăng tơnêi têa, riân ngăn, tối tơbleăng 'na cheăng kâ - rêh ối pơlê pơla, mơjiâng mâu tơdroăng 'na tơdroăng thăm mơnhông… nâ Lý kô mơ-eăm pêi klêi tung chôu pêi cheăng. La ƀă tơdroăng ki ôh tá ai tŭm kăn ƀô̆, nâ athế tŏng gum kơvâ pêi chiâk deăng, séa ngăn rơpŏng kơtiê ƀă pêi pro mâu tơdroăng cheăng 'na tơnêi tơníu a pơlê cheăm. Xua ti mê, hên hdroh troh klêi kơ'nâi 19h nâ nếo châ vêh a hngêi.

“Peăng ƀơrô cheăng á kơbố xuân tơbrêi, cheăng hên, môi ngế á nôkố pêi 5-6 tơdroăng cheăng, dế pêi cheăng ki kố mê athế lăm pêi cheăng ki tá nếo, hmôu pơ pơtối tiah mê. Xuân ôh tá ai hâi măng lơ hâi tơdrốu, hâi tĭng, tối tơdjuôm drêng lâi hiăng tâi tơdroăng cheăng mê nếo châ pơtê, tâng tơbrêi luâ râ mê pơtê. Môi tiah hâi hnah á pêi troh lối 12 chôu kong măng”.

Tơdroăng ki tơbrêi tơbrêh mê, tơdroăng cheăng hên luâ râ ôh tá xê to ƀă môi kơvâ cheăng kâ lơ kơvâ cheăng ‘na tơnêi tơníu, mê ối tâi tâng mâu kơvâ cheăng chêh pro hlá mơéa – rêh ối pơlê pơla. Jâ Hà Tường Vi, Ngế cheăng pơkuâ Ƀơrô cheăng Vi ƀan hnê ngăn cheăm Ea Súp, kong pơlê Dak Lak ăm ‘nâi râ cheăm rế pêi pro hên tơdroăng cheăng dêi râ tơring, rế tơdah xo, pơkâ tơleăng hô sơ dêi kuăn pơlê, tơdrêng amê hlối pơkuâ mâu kơvâ cheăng môi tiah hbrâ mơdât kâ kơhveăm liăn ngân, tơdroăng ki ôh tá lĕm tro; tơbleăng klêi kơ'nâi séa ngăn, tơdroăng cheăng tơpui kâ ki ê… Tung mê ai mâu tơdroăng ki nếo, kăn ƀô̆ râ cheăm tá hâi hlê plĕng tung tơbleăng, pêi pro.

“Môi hâi tơdah xo sap ing 70 troh 100 to hlá mơ-éa, mâu hlá mơ-éa hiăng pro klêi xuân hên ƀă mâu rôh hôp tung măng tĭng pêi cheăng a mâu pơlê, cheăm, hngêi tơleăng pêi cheăng sap ing 3 troh 5 rôh hôp môi hâi, tung pơla mâu hlá mơ-éa chêh pro ki ai tơdjâk troh hồ sơ, túa chêh pro xuân môi tiah râ tơring hdrối nah”.

Tơdroăng ki ôh tá ai tŭm kăn ƀô̆ ki rơkê dế cho tơdroăng ki tơdjuôm dêi hên mâu cheăm, bêng a kong pơlê Dak Lak. Khu kăn Đảng kong pơlê Dak Lak tối tiah kố, kố cho tơdroăng ki kal thế ngăn nhên ƀă ai troăng hơlâ tơxâng nếo kâi gum ăm túa pơkâ khu kăn pơkuâ kong pơlê 2 râ châ tơ-ƀrê môi tiah tơdroăng ki pói vâ. Troăng hơlâ ki hdrối cho xing xoăng, pơtroh mơngế pêi cheăng ing râ kong pơlê, tơdrêng amê hlối séa ngăn 'mâi rơnêu khu kăn ƀô̆ râ cheăm ăm tơniăn ivá cheăng.