Roh lăm pôu pêi cheăng kong têa Sinuâ dêi pôa Trần Thanh Mẫn, Kăn xiâm hnê ngăn Kuô̆k hô̆i cho môi tơdroăng ki kal tung tơpui kâ vâ pơtối pêi pro nhên troăng hơlâ tơpui kâ dêi Hneăng hôp 14, veăng kum pơtối 'mâi mơnhông ƀă mơdêk tâ nếo tơrŭm cheăng pơla Việt Nam - Sinuâ, mơdêk châ tơƀrê tơrŭm cheăng pơla Kuô̆k hô̆i Việt Nam ƀă Kuô̆k hô̆i Sinuâ, mơnhên hnoăng cheăng ki xiâm dêi mâu tơdroăng tơrŭm cheăng Kuô̆k hô̆i tung tâi tâng tơrŭm cheăng tung la ngiâ dêi Việt Nam - Sinuâ.

A rôh lăm pôu pêi cheăng rôh kố, pôa Trần Thanh Mẫn, Kăn xiâm hnê ngăn Kuô̆k hô̆i ƀă pôa Triệu Lạc Tế, Kăn xiâm hnê ngăn Kuô̆k hô̆i kong têa Sinuâ kô rơtế pơkuâ Hneăng hôp rôh má péa Vi ƀan tơrŭm cheăng pơla Kuô̆k hô̆i Việt Nam ƀă Kuô̆k hô̆i râ má môi kong têa Sinuâ.