VOV4.Xơ Đăng - Kơxê hâi lơ 19/4, pôa Phạm Minh Chính, Ngế pro xiâm hnê ngăn tơnêi têa hiăng trâm mâ khu krâ pơlê, kăn pơlê, ngê̆ nhân, mơngế châ kuăn pơlê loi nhoăm, drêng troh hâi “Tuá lĕm tro mâu hdroâng kuăn ngo Việt Nam” hơnăm 2024.

VOV4.Xơ Đăng – Tơmeăm pê  lo tê châ yă kơnâ, tê ăm kong têa ê tâk hên, mê cho tơdroăng ki phiu ro tung cheăng kâ, rêh ối mâu kong pơlê a Tây Nguyên tung mâu khế apoăng hơnăm 2024. La a mâu kong pơlê xuân ối trâm hên tơdroăng pá tung chêl thiê̆n liăn xĕn tơnêi tơníu, hrá châ xo liăn vâ mơjiâng tơmeăm khoăng dêi tơnêi têa. Tơdroăng kố kal thế mâu kong pơlê pơtối mơdêk hnoăng cheăng, tí tăng hriăn plĕng, mơ-eăm pêi tơƀrê tơdroăng hnê mơhno cheăng, hnoăng pơkuâ hnê mơhno dêi Chin phuh mê nếo pêi châ rơhéa rơhối tâ mâu tơdroăng pơkâ tung hơnăm 2024.

VOV4.Xơ Đăng - Kơxo hâi lơ 19/4 a tíu pêi cheăng Chin phuh, pôa Trần Hồng Hà - Ngế pro xiâm phŏ hnê ngăn tơnêi têa veăng hôp tơpui ‘na tơdroăng Tơkêa bro tâi tâng pơxá ăm tơkŭm pro nếo mâu hngêi pơkeăng cho dêi khu xiâm ngăn pơkeăng pơla hơnăm 2023 – 2030.

VOV4.Xơ Đăng - Pơlê kong kơdrâm Tịnh Tây, Quảng Tây, Sinuâ hiăng tơkŭm po Hneăng hôp tơpui tơno Pái khế apoăng hơnăm 2024 pơla khu râ kăn teăng mâ khu 12 đông Mô đô̆i gâk tơkăng kong ối tung Mô đô̆i gâk tơkăng kong Cao Bằng ƀă Mô đô̆i gâk tơkăng kong Hà Giang (Việt Nam) ƀă Khu kăn teăng mâ khu pơkuâ tơkăng kong Bách Sắc, Quảng Tây, Sinuâ.

VOV4.Xơ Đăng - "Mơhé vâ prôk ulâi ulâ, xuân pâ troh hâi Xối tơbâ hâi lơ 10 khế pái’’, kơxo hâi lơ 18/4 (tơkéa vâ tối hâi má 10 khế 3 hơnăm Giáp Thìn), pôa Phạm Minh Chính - Ngế pro xiâm hnê ngăn Chin phuh veăng mơdĭng chôu nhang tơbâ mâu pơtáu Hùng a Điện Kính Thiên a kối ngo Nghĩa Lĩnh cho kơpong Tíu tơbâ ton nah dêi Tơnêi têa dêi Đền Hùng a pơlê kong kơdrâm Việt Trì, kong pơlê Phú Thọ.

VOV4.Xơ Đăng - Xuân tung hâi lơ 18/4, cho hâi má 10/3 (hâi mâ khế) a hên kơpong kuăn pơlê rêh ối, tíu ki xối tơbâ a mâu kong pơlê kơpong Tây Nguyên po mâu tơdroăng tơbâ hâi pơtáu Hùng hlâ ƀă hiâm mơno pêi pro tơrŭm krá kâk rơtế tơdjuôm kơto mơheăm Lạc Hồng tơmiât troh pơlê xiâm dêi hdroâng mơngế.

VOV4.Xơ Đăng - Kơ’nâi rôh kong mêi ôh tá tro rơnó a mơ’nui khế 3 kố nah, tung kong pơlê Kon Tum pơtối ai mâu hâi kong tô ó ‘nâng, nôkố hrĭng rơpâu ha kong mơni tơ’lêi tro on chếo.

VOV4.Xơ Đăng - tơdroăng ko ‘nhiê kong a Dak Lak tung pơla achê kố chiâng tơdroăng ki tôu hên tâ mâu tơdroăng ki ê. Hên hĭn xá, ƀăng kong tro ko ‘nhiê tung pơla hên ngế ki pơkuâ ngăn kong ôh tá vâ tơmâng tung pơkuâ ngăn, hên ngế ki pơkuâ ngăn kong hiăng ôh tá ai ivá rak ngăn kong. Ai mâu tơring cheăm ki ‘nâ dêi Dak Lak ôh tá ai kong xếo.

.VOV4.Xơ Đăng - Kơxo hâi lơ 18/4, pôa Phạm Minh Chính - Ngế pro xiâm hnê ngăn tơnêi têa hiăng lăm pôu Tíu xiâm tối ăm ‘nâi mâu tơdroăng ki pơkuâ kŏng an kong pơlê Phú Thọ, pêi cheăng ƀă Kŏng an kong pơlê Phú Thọ ‘na tơdroăng tơbleăng pêi tơdroăng tơkêa bro 06 ƀă pêi mâu tơdroăng cheăng ki pơcháu.

VOV4.Xơ Đăng - Kơnôm rĕng hbrâ rơnáu mâu troăng hơlâ hbrâ ví, troăng kơxái on tơhrik kong pơlê Dak Lak ối mơ’no on tơhrik tơniăn, rak vế tŭm on tơhrik vâ mơ’no pơtối hlối ăm kuăn pơlê.