Troh nôkố, tung tơdroăng ki tăng rup dêi khu lêng ki ai tơdjâk troh, rơtế ƀă ivá mơ-eăm hnê tối, pơtrui ngăn hbrâ mơdât, rak vế tơniăn dêi khu kăn pơkuâ cheăm, tơring, vêh bro tơniăn lĕm a tơring Čư̆ Kuin, kong pơlê Dak Lak.

Hâi kố, troh a Ea Ktur pái hâi klêi kơ’nâi ai roh tơdroăng, kuăn pơlê tung cheăm hiăng vêh ƀă tơdroăng rêh ối tiah hmâ rêm hâi. Drô troăng kân troh tíu xiâm cheăm lăm a mâu thôn, pơlê, tơdroăng rêh ối hiăng vêh tơniăn tiah hmâ.

Mâu tíu tê tơmeăm hiăng lôu péa, mâu tơdroăng tê mơdró tơmeăm hiăng vêh po tơniăn. Vâ tơniăn ăm kuăn pơlê, kong pơlê hiăng pro tíu gâk ai khu kŏng an gâk plâ hâi plâ măng. Cho ing tơdroăng kố hiăng pro hiâm mơno tơniăn, hmiân tuăn ăm kuăn pơlê.

Hbrâ drêng kong tơniăn lĕm, pôa Ngô Văn Hồng (thôn 22, cheăm Ea Ning, tơring Čư Kuin) thâ chiâ klôh hbrâ pêt kơphế. Mâu tơdroăng cheăng kố, rơpŏng pôa tối vâ pêi pro sap ing to lâi hâi hdrối laga thế pơtê xua tâi tâng ƀăng deăng chiâk dêi rơpŏng pơrá ối tung kơpong cheăm Ea Ktur. Klêi tơdroăng khu mơngế râng hnêa mot tung tíu pêi cheăng Vi ƀan péa cheăm Ea Tiêu ƀă Ea Ktur, rơpŏng pôa pơtê tơdroăng lăm a chiâk deăng xua xâu.

Laga, drêng châ hlo mâu tơdroăng mơ-eăm dêi khu cheăng ƀă rơtế ƀă tơdroăng pơtâng tối, pro hiâm kuăn pơlê tơniăn lĕm dêi khu râ kăn pơkuâ, pôa hiăng hmiân tuăn pêi chiâk deăng.

Pôa Ngô Văn Hồng tối: ‘’Klêi tơdroăng pêi pro ‘mêi ó dêi khu ‘mêi a kơmăng lơ 11/6, kuăn pơlê xâu, préa ‘nâng. Laga troh nôkố hlo khu cheăng lăm pơtrui rup kơtăng, khu râ kăn pơkuâ pơtâng tối, tơbleăng tơdroăng teăm tơdrêng ‘na roh tơdroăng mê tung loa cheăm xua mê á xuân môi tiah kuăn pơlê tung thôn, pơlê hiăng hmiân tuăn tâ. Ƀă tơdroăng môi tiah nôkố, ngin rĕng tơniăn hiâm mơno ƀă vêh rêh ối tơniăn lĕm tiah hmâ’’.

Xuân vêh po tíu tê mơdró tơmeăm pêi lo ing chiâk deăng, uâ báu ăm kuăn pơlê klêi kơ’nâi péa hâi klĭng péa vâ gâk kring rơpŏng, nâ Nguyễn Thị Anh, cheăm Ea Ktur xuân tá hâi tâi ki préa. Tíu tê tơmeăm dêi nâ ối a troăng kân, kơtăn tíu pêi cheăng Vi ƀan cheăm Ea Ktur dâng 1 km. Tung kơxo hâi lơ 11/6, drêng ‘nâi ‘na roh tơdroăng, rơpŏng nâ xâu xua mê ôh tá khên lôu péa vâ tê tơmeăm.

Troh nôkố, ing mâu rơ’jíu, um tơvi, phôn ‘nâi tơdroăng hiăng châ khu cheăng mơdât tâi tâng xua mê rơpŏng nâ Anh hiăng vêh lôu péa hngêi tê mơdró vâ tê mơdró.

Nâ Nguyễn Thị Anh tối ăm ‘nâi, klêi kơ’nâi ai tơdroăng kố, kơnôm khu râ kăn pơkuâ, mâu khu cheăng ‘na gâk kring ăm pơlê xua mê rơpŏng nâ ƀă kuăn pơlê rơtâ tá xuân hmiân tuăn lôu péa tê mơdró, pêt mơjiâng tơmeăm tê mơdró, lăm chiâk deăng. Ki rơhêng vâ tối, drêng khu cheăng pơtrui rup mâu ngế ‘mêi, kuăn pơlê xuân kơdroh xâu préa, thăm loi tơngah a khu râ kăn pơkuâ.

Tơdroăng pêi pro ‘mêi ó dêi khu ngế râng hnêa pĕng, râng xơkê mot tung Vi ƀan péa cheăm Ea Tiêu ƀă Ea Ktur hiăng pro hiâm mơno kuăn pơlê a tơring Čư Kuin hêng hôu.  Ƀok Tin Lành Ae Smit (ối tối cho Y Djan Êban, 73 hơnăm, ối a ƀuôn Kniết, cheăm Ea Ktur, tơring Čư Kuin, kong pơlê Dak Lak) hêng hôu: ‘’Á hlo kố cho môi tơdroăng pêi pro ki ‘mêi, sap ing kŭn nah troh kân nôkố tá hâi chói hlo xua mê xâu préa ‘nâng’’.

Vâ mâu thôn, pơlê a péa cheăm Ea Tiêu, Ea Ktur (tơring Čư Kuin, kong pơlê Dak Lak) rĕng vêh tơniăn lĕm tiah hmâ, tơniăn tơdroăng rêh ối, mâu khu cheăng dêi kong pơlê, khu râ kăn pơkuâ, cheăm hiăng gâk plâ hâi plâ măng, mơ-eăm pơtrui rup, tăng rup mâu ngế ki pro ôh tá tơniăn.

Pakĭng mê, ƀă hên troăng pơtâng tối, hơlêm hiâm mơno kuăn pơlê, bu klêi kơ’nâi 3 hâi ai roh tơdroăng ki tơniăn hiăng troh a mâu pơlê dêi péa cheăm.

Pôa Nguyễn Kim May, Kăn phŏ pơkuâ hnê ngăn Đảng ŭy, Kăn hnê ngăn Vi ƀan cheăm Ea Ktur, tơring Čư Kuin, kong pơlê Dak Lak tối ăm ‘nâi, nôkố, tơdroăng rêh ối ƀă hiâm mơno dêi kuăn pơlê tung 19 thôn, pơlê hiăng hmiân tuăn ƀă vêh tơniăn tơdroăng rêh ối tiah hmâ sap ing hâi lơ 12/6.

Vâ tơniăn ăm kuăn pơlê tơniăn lĕm hiâm mơno, pêt mơjiâng tơmeăm, tê mơdró klêi kơ’nâi ai tơdroăng ki ôh tá lĕm, cheăm pơtâng tối, tơbleăng troh khu cheăng kal kí mâu thôn, pơlê ƀă kuăn pơlê ‘na tơdroăng ki pêi cheăng dêi kơ koan cheăng séa ngăn, mơdât tŭm tơdroăng; hơlêm kuăn pơlê pôi tá xâu préa ƀă hiăng pơchân tối kuăn pơlê drêng ôh tá kal mê ôh tá lo pakong a kơmăng lơ kơxo má; mơdêk hlê plĕng kơchăng tung kuăn pơlê, krếo djâ kuăn pơlê tâng hlo ôh tá tơniăn a pơlê cheăm mê tơbleăng tối tơdrêng ăm khu râ kăn pơkuâ pơlê cheăm lơ kơ koan ai hnoăng ‘nâi vâ tơleăng teăm tơdrêng.

Pakĭng tơdroăng pơtâng tối dêi khu râ kăn pơkuâ kong pơlê, mâu tíu hngêi khôp xuân thăm pơtâng tối vâ tơniăn hiâm mơno kuăn pơlê, kum kuăn pơlê rĕng vêh tơniăn tơdroăng rêh ối tơniăn tiah hmâ. Ƀok Tin Lành Ae Smit  tối ăm ‘nâi tơ’nôm, tung la ngiâ, a mâu tíu hngêi khôp, ngin kô tơkŭm pơtâng tối ăm vâi krâ kuăn pơlê mơ-eăm tiô khôp, pro ti lâi lĕm tá ‘na châ ‘na mơhúa ƀă nhuô̆m pâ tơnêi têa.

Mơ-eăm kêi đeăng hnoăng cheăng Đảng ƀă Tơnêi têa pơcháu; pêi tiô tro pơkâ, troăng pơkâ pêi, troăng hơlâ dêi mâu khu râ kăn pơkuâ kong pơlê.