Khu xiâm pơkuâ ngăn lêng kong pơlê Khánh Hòa hiăng tơdah xo lối 80 tơdroăng tối ăm nâi ‘na kơpong ki nhôm ối ai tơnâp ‘mé mâu ngế hlâ ai hnoăng tơnêi têa. Tung mê ai 7 tơdroăng tối ‘na tơnâp ki tâp pú hên, tiô tối hdrối ai lối 200 kơxêng. Klêi tăng ngăn, mơnhên, rôh apoăng hiăng tơkŭm châ chiâ 6 to tơnâp ‘mé mâu ki hlâ djâ troh a ilâng kiâ tung kong pơlê.

Tơdrêng ƀă lăm tăng, tơkŭm, Khánh Hòa dế mơdêk rĕng mơnhên inâi mơngế hlâ ai hnoăng ƀă tơdroăng mơnhên ADN. Troh nốkố, kong pơlê hiăng xo dâng 2.700 túa dêi 3.000 ngế nhŏng o mơngế ki hlâ hiăng chêh inâi ăm mơnhên, châ 90% tơdroăng pơcháu ƀă tơkâ luâ 550 túa tâng vâ pơchông ƀă kơxô̆ pơcháu. Vâ chê 80 ngế hơnăm hiăng krâ, ivá pá hro kal châ kơjo kum xo túa a hngêi.

Tiô tăng ngăn, Khánh Hòa nôkố ai lối 12.000 tơdroăng ăm ‘nâi ‘na mơngế hlâ ai hnoăng, tung mê, vâ chê 4.900 ngế hâi châ mơnhên ăm ‘nâi ‘na tơnâp tâp. Xua mê, rêm ngế ki hlo, rêm ngế kuăn pơlê ki châ ’nâi ‘na tíu tơplâ, hdrối nah hiăng hlo tíu ‘mé apoăng dêi ngế ki hlâ xuân kô chiâng veăng ‘no hnoăng ki kal tung tơdroăng lăm tăng.